Buumi Buumi

Sena Leza ulabikkila maano kujatikizya mbotwiiyendelezya mibili yesu?

“Utakali akati kabacakolwa, nanka akati kamadyanyama.”—Tusimpi 23:20.

NKAAMBO NZI NCOTWEELEDE KUUBIKKILA MAANO MUBUZYO OOYU?

Ibbaibbele talili bbuku lyaamba makani aabusilisi, alimwi talyaambi micito yoonse yabantu. Nokuba boobo, mulakonzya kugwasyigwa kwiinda mukuzyiba mbwabubona buumi Leza kweelana ambokutondezyedwe mu Bbaibbele.

NCOLYAAMBA BBAIBBELE

Zibalo zinji zyamu Bbaibbele zilatondezya mbwalimvwa Leza kujatikizya mbotwiiyendelezya mibili yesu. Mucikozyanyo, Bbaibbele lilakasya kuciindizya kucita zyintu, mbuli bukolwi alimwi abulyato. (Tusimpi 23:20) Mulawo wakapedwe bana Israyeli bansiku wakali kugwasya nokuba kukwabilila malwazi. Mulawo ooyo wakali kubikkilizya amalailile aajatikizya kulikwabilila kuntenda zyakulicisa. (Deuteronomo 22:8) Cakusalazya, Bbaibbele lilatukulwaizya kwiilanganya kabotu mibili yesu alimwi akubweza ntaamu ziyandika kutegwa tukwabilile buumi bwesu.

Kweelana ancolyaamba Bbaibbele, nkaambo nzi ncotuciswa?

“Cibi mbocakanjila munyika kwiinda mumuntu omwe alufwu kwiinda mucibi.”—Baloma 5:12.

NZYOBAAMBA BANTU

Bantu banji basyoma kuti kuciswa nkubula buyo coolwe kwabantu kuboola akaambo kakusanduka kwazyintu. Bamwi bayeeya kuti myuuya iitazizilwe, mbuli myuuya mibi nzezipa kuti katuciswa.

NCOLYAAMBA BBAIBBELE

Kweelana ancolyaamba Bbaibbele, tulaciswa akaambo kakuti bantu bakusaanguna bakamuzangila Jehova. (Baloma 5:12) Kabatanazanga, bazyali besu bakusaanguna, ba Adamu a Eva, bakali kupona buumi bulondokede. Bakalizyi kuti bakali kuyoofwa kuti baleka kulanganizyigwa a Leza. (Matalikilo 2:16, 17) Nokuba boobo, bakacinyonyoona acaali cilongwe cabo a Jehova alimwi akusweekelwa buumi bwabo bulondokede.

Nobakasweekelwa buumi bulondokede ba Adamu a Eva, bakatuyambukizya kutalondoka kwabo. Nkakaambo kaako, nokuba kuti bantu basoleka buti kugwisya malwazi, tulazumanana kuciswa.

NCINZI NCOMUKONZYA KUCITA?

Ibbaibbele liyiisya kuti ikuti mwayanzana a Leza kwiinda mukutobela njiisyo zyakwe zyabusongo, muyakupona buumi bulondokede muparadaiso anyika. (Isaya 33:24) Leza usyomezya kuti uyakukugwisya kucisa, kuciswa, alimwi alufwu.—Ciyubunuzyo 21:3, 4.

Sena Bbaibbele lilakasya busilisi?

“Bantu bataciswi tabayandiki musilisi, ccita baciswa.”—Matayo 9:12.

NZYOBAAMBA BANTU

Bamwi balayanda kusilikwa kwiinda mukupaililwa muciindi cakuya kucibbadela.

NCOLYAAMBA BBAIBBELE

Ciindi Bbaibbele nolyakacili kulembwa, Leza wakabazumizya basilisi kuponya bantu bakwe. (Matalikilo 38:28; Bakolose 4:14) Kunyina Bbaibbele mpolitondezya kuti Leza wakanyema akaambo kakubelesya misamu yamusyokwe, mafuta, zyakulya, alimwi anzila zimwi zyabusilisi. Nkakaambo kaako Jesu ncaakaambila kuti “Bantu bataciswi tabayandiki musilisi, ccita baciswa.”—Matayo 9:12.

Nokuba boobo, tabuli busilisi boonse mbolizumizya Bbaibbele. Mucikozyanyo, Ibbaibbele talizumizyi kuponya bantu kwiinda mukubapailila. Abwalo busilisi bubikkilizya mizimo tabuzumizyi Leza. (Bagalatiya 5:19-21) Kuti naa twaciswa, inga cagwasya kuyandaula nzila zimbi zyabusilisi kuti kaziliko muciindi cakubelesya nzila busilisi mbolitazumizyi Bbaibbele.