Mbomukonzya Kulekelela

BUYUMUYUMU

Kuti nywebo angomukwetene limwi mwazwangana, kanji-kanji mwaamba twaambo twakainda kale, muleta matongoosi manji aakaindi aakeelede kubandikwa aciindi eeco. Ncinzi cipa kucita boobo? Ambweni umwi akati kanu naa nyoonse inga kamutacizyi kulekelela.

Mulakonzya kwiiya kulekelela. Nokuba boobo, cakusaanguna, amulange-lange kaambo ncocikonzya kumuyumina mulumi naa mukaintu kulekelela mweenzinyina.

ICIPA KUTI KUBE BUYUMUYUMU

Nguzu zyakweendelezya. Bamaalumi alimwi abamakaintu bamwi tabayandi kulekelela mweenzinyina kutegwa bazumanane kweendelezya ngobakwetene limwi. Aboobo, ciindi nobazwangana, baamba twaambo twakainda kale kutegwa ayendelezye ngobakwetene limwi.

Kubikkilila. Twaambo twakaindi itwakamupa kuzwangana tulatola ciindi kutuluba. Ngomukwetene limwi ulakonzya kwaamba kuti ‘Ndamulekelela,’ pele kakuli wamubikkilila akaambo kacintu cacitika—ambweni buya kayanda kujolela.

Kutyompwa. Bantu bamwi balanjila mulukwatano kabayeeya kuti buumi bwabo bunooli kabotu lyoonse. Aboobo ciindi nokwaba kutamvwana akati kabo, balakaka kucinca mizeezo yabo, kabayeeya kuti muntu ngobakali kweendelana kabotu-kabotu lino watalika kuzyibona bumbi zyintu. Kuyeeyela zyintu zitakonzyi kucitika kulakonzya kupa muntu kujanina mweenzinyina mulandu alimwi akwaalilwa kumulekelela.

Kutamvwana mutwaambo. Banabukwetene banji balakaka kulekelela akaambo kakuti tabazyi cikonzya kucitika kuti naa bacita oobo. Mucikozyanyo bamwi balakonzya kwaamba kuti:

Kuti naa ndamulekelela, nduubya-ubya penzi.

Kuti naa ndamulekelela, ndeelede kuciluba cibi cakacitika.

Kuti naa ndamulekelela, ndilapa kuti penzi liindile.

Masimpe ngakuti, kulekelela tacaambi cili coonse cazyintu zyaambidwe kale. Nokuba boobo, kulekelela kulakonzya kukatazya—ikapati kubanabukwetene.

NCOMUKONZYA KUCITA

Amuzyibe kulekelela ncokwaamba. Mu Bbaibbele, zimwi ziindi bbala lyakuti “kulekelela” lipandulula ‘kuleka buyo.’ Aboobo talili lyoonse kulekelela nikwaamba kuluba naa kuubya-ubya cibi cakacitika. Zimwi ziindi kuyandika kwaaleka buyo makani kutegwa kube luumuno mulukwatano lwanu.

Amuzyibe bubi buboola akaambo kakutalekelela. Basyaazibwene mulukwatano alimwi akubandika kwabanabukwetene baamba kuti kubikkilila kulakonzya kubikka muntu muntenda yakumubili amumizeezo, eeci cibikkilizya kutyompwa akuciswa bulwazi bwa BP—alimwi amapenzi amwi buyo aakonzya kuboola mulukwatano lwanu. Nkakaambo kaako, Bbaibbele ncolyaamba kuti: “Amufwidilane luzyalo, mube amoyo mutete walubomba, akulekelelana camoyo woonse.”—Baefeso 4:32.

Amuzyibe bubotu bwakulekelela. Muciindi cakubikkilila, muuya wakulekelela upa kuti nywebo angomukwetene limwi kamusyoma kuti mweenzinyoko kunyina naakajisi makanze mabi pe. Kucita boobo kulamugwasya kutabikkilila alimwi akukomezya luyando lwanu.—Mpoijanika njiisyo eeyi mu Bbaibbele: Bakolose 3:13.

Amuzibone munzila yeelede zyintu. Kuti ngomukwetene limwi mwamuzumina mbuli mbwabede kweelana akutalondoka kwakwe, ciyoomuubaubila kumulekelela. Bbuku lyakuti Fighting for Your Marriage lyaamba kuti: “Kuti mwabikkila maano kuzyintu nzyomutajisi, ncuuba-uba kuziluba zyoonse nzyomujisi. Nzyintu nzi nzyomuyanda kubikkila maano mubuumi aciindi cino?” Kamuyeeya kuti, kunyina uulondokede—kubikkilizya andinywe.—Mpoijanika njiisyo eeyi mu Bbaibbele: Jakobo 3:2.

Amunyoneke. Ciindi ciboola mwaakunyema ambweni akaambo kamajwi ngaamba naa ncintu ncaacita ngomukwetene limwi, amukalibuzye kuti: ‘Sena makani aaya mapati? Sena ndiyanda kuti ngotukwetene limwi alilekelele, naa ndeelede kwaaluba buyo makani aayo?’—Mpoijanika njiisyo eeyi mu Bbaibbele: 1 Petulo 4:8.

Ikuti kakuyandika, amwaabandike makani aayo. Cakukkazyika moyo, amwaambe camunyemya alimwi akaambo ncicamupa kulimvwa boobo. Mutamutamikizyi kuba amakanze mabi naa kumupa mulandu ngomukwetene limwi, nkaambo eeci inga capa kuti mutalike kukazyanya. Muciindi caboobo, amwaambe buyo mbomwalimvwa akaambo kazyintu nzyaacita.