Kuciindizya Kumvwana Amuntu Ngomutakwetene Limwi

BUYUMUYUMU

Sena mulamvwana amuntu ngomutakwetene limwi alimwi ulamubikkila kapati maano cakuti mulaambilana makani aali woonse? Inga kamwaamba buyo kuti: ‘Tumvwana buyo,’ pele ngomukwetene limwi takonzyi kukkomana kuti waimvwa mibandi yanu.

Aboobo, kuti kacili boobo nkokuti mulaciindizya kumvwana amuntu ooyo, alimwi mweelede kucilanga-langa cilongwe canu. Pele cakusaanguna mweelede kuzyiba cakapa kuti mutalike kumvwana amuntu ooyo.

ICIPA KUTI KUBE BUYUMUYUMU

Kulikkomanisya. Ikwaamba masimpe, kubikkilwa maano amuntu ngomwiindene limwi zizo kulakkomanisya. Citupa kulimvwa kuti tulabikkilwa maano, alimwi akuti tulayandwa. Kwainda ciindi kuzwa nimwakakwatwa naa kukwata, ambweni inga mwatalika kulombozya kuyanzana amuntu ngomutakwetene limwi. Pele amuzyibe kuti: Kulombozya kuli boobu kuletela ntenda. Kuti mwatalika kuciindizya kuyanzana amuntu ngomutakwetene limwi, luyando ndomujisi kuliyooyo ngomukwetene limwi lulakonzya kuceya. Munzila imwi, mulacileka kumuyanda ooyo ngomukwetene limwi.

• Amulibuzye kuti: ‘Ino nzyintu nzi nzyondicita amuntu ooyo zyalo zyeelede buyo kucitwa amuntu ngondikwetene limwi?’

Kulendelelwa. Ibbaibbele lilazuminizya kuti aabo bakwata naa kukwatwa “banoojisi mapenzi.” (1 Bakolinto 7:28) Mucikozyanyo, zimwi ziindi mulakonzya kulimvwa kutabikkilwa maano angomukwetene limwi, naa kubikkilila makani amwi aakamupede kuzwangana. Ambweni ngomukwetene limwi tayandi kwaabandika makani aayo, cakuti umuleka buyo kamunyemede calo cipa kuti mutalike kulendelelwa akulombozya kubikkilwa maano amuntu uumbi. Basyaazibwene bamwi baamba kuti kwaalilwa kubandika makani aakatazya mulukwatano, kulakonzya kupa kuti kubule lukkomano alimwi nokuba kulekana buya.

• Amulibuzye kuti: ‘Sena kuli kutamvwana mulukwatano lwesu kwalo kupa kuti nditalike kulombozya kuba azilongwe zitali kabotu?’

NCOMUKONZYA KUCITA

Amwiizyibe ntenda. Ibbaibbele lyaamba kuti: “Sa muntu ulakonzya kubweza mulilo akaango kakwe akutapidwa zyakusama zyakwe?” (Tusimpi 6:27) Masimpe ngakuti, kuti kamukwete naa kukwatwa, kuciindizya kumvwana amuntu ngomutakwetene limwi kulanyonganya. (Jakobo 1:14, 15) Makani taajatikizyi buyo zyintu zikonzya kucitika, pele amubone azyeezyo zyakacitika kale. Kwiinda mukubikkila kapati maano kumuntu ngomutakwetene limwi, nkokuti ooyo ngomukwetene limwi tatondezyegwi luyando ndwayelede kuzwa kulindinywe.

Mutalyeeni pe. Kuciindizya kumvwana amuntu ngomutakwetene limwi kulakonzya kumupa kutalika kuyeeya kuti zyintu nozyali kabotu nimwakakwatana amuntu ooyo. Kuyeeya kuli boobo kupa kuti mutalike kweezyanisya bubotu bwamuntu ooyo kumuntu ngomukwetene limwi. Kamuyeeya kuti lukkomano oolo ndomubaandulo ciindi nomuyeeya mweenzinyoko ooyo, ndondulo lukkomano ndomwakajisi kumatalikilo kuliyooyo ngomukwetene limwi.—Mpoijanika njiisyo eeyi mu Bbaibbele: Jeremiya 17:9.

Amulibikkile minyinza. Bantu balabikka maalamu mumyootokala naa mumaanda aabo kutegwa balikwabilile kubabbi. Andinywe mulakonzya kucita mbubwenya oobo mulukwatano lwanu. Bbaibbele lyaamba kuti: “Bamba moyo wako.” (Tusimpi 4:23) Ino mbuti mbomukonzya kucita oobo? Amusole kubelesya nzila eezyi zitobela:

• Amulitondezye kuti mulikwete naa kukwatwa, ambweni kwiinda mukubikka zifwoto zyamuntu ngomukwetene limwi kumulimo.—Mpoijanika njiisyo eeyi mu Bbaibbele: Matalikilo 2:24.

• Amwaambile limwi zyintu nzyomukonzya kucita alimwi anzyomutakonzyi kucita amuntu ngomutakwetene limwi. Mucikozyanyo, inga cagwasya kutabandika mapenzi aamulukwatano lwanu naa kuyakujanika mumasena amwi kamuli buyo nyobilo amubelesinyoko ngomutakwetene limwi.

• Ikuti mwaciindizya kumvwana amuntu ngomutakwetene limwi, amucileke kumvwana amuntu ooyo. Kuti naa camwaalila kucita boobo, amulibuzye kuti, ino nkaambo nzi? Muciindi cakukwabilila cilongwe canu amuntu ooyo, amukwabilile lukwatano lwanu kwiinda mukugwasyilizya muntu ngomukwetene limwi.—Mpoijanika njiisyo eeyi mu Bbaibbele: Tusimpi 5:18, 19.