Lukanda Lwanzoka

AKAAMBO kakuti nzoka tazijisi maulu, zyeelede kuba alukanda luyumu kapati lutakonzyi kumana kufwambaana. Misyobo imwi yanzoka ilacikozya kutanta muzisamu zyamakwa aayasa alimwi iimwi ilacikonzya kweenda mumusenga watubwe-tubwe. Ino nkaambo nzi lukanda lwanzoka ncolucikonzya kukkala kwaciindi cilamfwu?

Amubone kaambo aaka: Zikanda zyanzoka zilaindana kukomena alimwi ambozipangidwe kweelana amusyobo wanzoka. Nokuba boobo, zikanda zyanzoka zyoonse zilikozyenye munzila imwi yakuti: Mpozili aatala nziyumu, mpoonya inga ziyaabuteteeta mozili mukati. Ino mbubotu nzi buliko? Basikuvwuntauzya ba Marie-Christin Klein baamba kuti: “Cintu ciyumu anze alimwi citeteete mocili mukati cilakonzya kupa nguzu zyakucikonzya kucita milimo imwi abusena bupati.” Kupangwa munzila iilibedelede kwalukanda lwanzoka kupa kuti kacikonzyeka kunamatila aansi akupa kuti nzoka icikonzye kweenda alimwi aciindi nciconya eeco akuliyumya kuzintu mbuli mabwe aakonzya kunyonyoona lukanda. Aboobo, lukanda lwanzoka lweelede kukkala kwaciindi cilamfwu mbwaanga nzoka zilikwama buyo kwainda myezi yobilo naa yotatwe.

Zintu zipangidwe mbuli lukanda lwanzoka zilakonzya kugwasya mubusilisi. Mucikozyanyo, zilakonzya kubelesyegwa kupanga tuntu tutatezemuki alimwi tuyumu kapati tukonzya kubikkwa mumubili. Alimwi zilakonzya kubelesyegwa mumincini iizinguluka alimwi ayeeyo iibelesyegwa kupanga zintu izili mbuli lukanda lwanzoka kwiinda mukutabelesya mafwuta manji.

Ino muyeeya buti? Sena lukanda lwanzoka lwakaba akaambo kakusanduka kwazintu naa lwakalengwa buya?