LUGWASYO KUMUKWASYI | BAKUBUSI
Mbomukonzya Kutambula Lulayo
BUYUMUYUMU
“Ikuti muntu umwi wamupa lulayo, nkokuti muntu ooyo umwaambila kuti kuli ncomwalubizya. Alimwi kunyina muntu ngondakamvwa kale waamba kuti, ‘Ndilakkomana kwaambilwa kuti kuli mpolubizya.’”—Oobu mbwaakaamba Amy, uujisi myaka yakuzyalwa iili 17.a
Muntu uukaka lulayo uli mbuli sikweenzya ndeke uutabikkili maano kumalailile ngapegwa kuzwa kuli sikupa malailile uuli kubbuwa lyandeke. Alimwi eeci cilakonzya kuleta ntenda.
Sena cilamuyumina kutambula lulayo kuzwa kubazyali banu, bamayi naa bantu bambi bapati? Ikuti kacili boobo, cibalo eeci cilamugwasya.
NCOMWEELEDE KUZYIBA
Toonse tuyandika lulayo.
“Toonse tulalubizya ziindi zinji.”—Jakobo 3:2.
“Tatweelede kufwa nsoni kuti katuyandika lulayo akaambo kakulubizya kwesu.”—Oobo mbobakaamba ba Jessica.
Kupegwa lulayo tacaambi kuti muli babyaabi.
“Kufumbwa muntu ngwayanda Jehovab, ulamweempya.” —Tusimpi 3:12.
“Ikuti bantu bandipa lulayo, ndilasola kuyeeya mbocili ciyumu kulimbabo kucita boobo alimwi akubona kuti kutegwa bandipe lulayo nkokuti balandiyanda.”—Oobo mbwaakaamba Tamara.
Lulayo lulakonzya kumugwasya kuba muntu uuli kabotu.
“Amuswiilile lulayo, musongwaale.”—Tusimpi 8:33.
“Lulayo lupa muntu kuyaambele. Alimwi lupa kuzyiba bamwi mbobakubona alimwi akukugwasya kuleka zilengwa zimwi nzyootazyi kuti ulizijisi.”—Oobo mbwaakaamba Deanne.
NCOMUKONZYA KUCITA
Amululange munzila iili kabotu lulayo. Ambweni mulakonzya kunyema akaambo kalulayo oolo. Pele mutabikkili buyo maano mbomulimvwa. Kutegwa mucikonzye kucita boobo, amulibikke muciimo cakuti ndinywe mupa muntu uumbi lulayo, ambweni musyoonto wanu. Sena mulakonzya kububona bubotu bwalulayo oolo? Lino amulibikke alimwi muciimo cayooyo uupegwa lulayo alimwi akubona bukkale oobu munzila njiyonya. —Mpoijanika njiisyo eeyi mu Bbaibbele: Mukambausi 7:9.
“Zimwi ziindi inga mwanyema akaambo kamajwi muntu ooyu ngabelesya, akuluba kuti usola kumugwasya kuba muntu uuli kabotu, ikutali kumunyemya pe.”—Oobo mbwaakaamba Theresa.
Amuzumanane kulicesya. Mutalekeli kulisumpula kumupa kukaka lulayo. Kulubazu lumwi, tamweelede kutyompwa akaambo kakuti kuli mpomweelede kubelekela. Kulicesya kuyoomugwasya kutaciindizya. Kamuyeeya kuti: Ilulayo lucisa ambweni ndolulayo ndomuyandika kapati. Ikuti akaambo katwaambo tumwi mwalukaka lulayo oolo, nkokuti tamukagwasyigwi acoolwe cakuyaambele.—Mpoijanika njiisyo eeyi mu Bbaibbele: Tusimpi 16:18.
Ilulayo lucisa ambweni ndolulayo ndomuyandika kapati
“Kutambula lulayo kulayandika kapati kutegwa muntu asime. Ikuti katutatambuli lulayo ndotupegwa, tatukagwasyigwi pe, alimwi kumbele inga tatukabukkomanini bube bwesu.”—Oobo mbwaakaamba Lena.
Amulumbe. Nokuba kuti inga camuyumina kulutambula lulayo ndomwapegwa, amumulumbe muntu wamupa lulayo oolo. Cakutadooneka, muntu ooyo ulamubikkila maano alimwi uyanda kuti muzwidilile.—Mpoijanika njiisyo eeyi mu Bbaibbele: Intembauzyo 141:5.
“Tamukausi pe ikuti mwaamba kuti ‘Ndalumba,’ kwaambisya ikuti kamuyandika lulayo oolo. Nokuba kuti tamuyandiki lulayo, mulakonzya kumulumba muntu ooyo akaambo kakumusikila.”—Oobo mbwaakaamba Carla.
a Mazina amwi mucibalo eeci acincwa.
b Jehova ndizina lya Leza kweelana ambolitondezyedwe mu Bbaibbele.