ZICITIKA MUNYIKA

Southeast Asia

Kweelana akabunga ka World Wildlife Fund (Ibunga Iilanganya Banyama), akati kamwaka wa 1997 awa 2011, misyobo minji yabanyama mipya alimwi azisyango kubikkilizya anzoka iitwa kuti ruby-eyed pit viper, yakajanika mubusena butegwa Greater Mekong, busena oobu bubikkilizya Cambodia, Laos, Myanmar, Thailand, Vietnam, alimwi acooko cimwi camu China citegwa Yunnan. Akati kamisyobo iyakajanika mu 2011 molikke, kuli misyobo yazisyango iili 82, misyobo yabanyama bali mbuli baciwena anzoka iili 21, misyobo yanswi iili 13, misyobo yabacula yosanwe, alimwi amisyobo yabanyama bali mbuli ŋombe yosanwe.

Europe

Lipooti iyakalembwa mumuteende wa The Moscow Times yakaamba kuti kuula alimwi akusambala bantu lyaba penzi lipati “muzisi zyoonse zyamu Europe.” Bantu balasambalwa akaambo kamakwebo aakoonana, kusinikizyigwa kubeleka, alimwi naaba “makwebo aatazumizyidwe amulawo aakusambala zizo zyabantu.” Aabo bacita makwebo aali boobu, balabalida masuku amutwe aabo mbobasambala akaambo kakuti mbacete, tababeleki, alimwi akaambo kakuti mbakaintu.

New Zealand

Ibuvwuntauzi ibwakacitwa kubana alimwi akubakubusi ibakali kweebelela TV, bwakatondezya kuti kutola ciindi cilamfwu kweebelela TV “kuliswaangene akutalilemeka nkwacita muntu akomena.” Basikuvwuntauzya baamba kuti makani ngobakajana alausumpula muzeezo wakuti bana “tabeelede kwiindilila awoola lyomwe naa obilo kabeebelela TV abuzuba.”

Alaska

Bunji Bwaminzi Yabana Alaska ili kunkomwe naa afwaafwi amilonga, alimwi 86 pesenti yaminzi eeyi ilajatikizyigwa akupaya kwamaanzi alimwi ivwu lilaunka amaanzi. Malipooti atondezya kuti kupya kapati kupa kuti caanda cikwabilila kuti ivwu kalitaunki amaanzi cimuke kupangwa, calo cipa kuti minzi eeyi ibe muntenda kapati ikuti kwaboola guwo.

Munyika

Nokuba kuti kwabelesyegwa mali manji kusumpula nzila zyakupanga magesi, kubelesya nzila mbuli muwo alimwi azuba, ba Maria van der Hoeven, ibalupati-pati mucibeela ca International Energy Agency bakaamba kuti, “muya wa carbon dioxide uupangwa munji kapati mbubwenya mbowakabede myaka iili 20 yainda.”