‘Busongo Bulaita’—Sena Mulibumvwide?
“Sa busongo tabwiiti? Sa maanu taaongololi? Atala atulundu kumbali lyanzila, kumapambukilo aanzila, nkobwiimina. . . . Kumanjililo aamunzi, nkoboongolweda.”—TUSIMPI 8:1-3.
BUSONGO bulayandika kapati. Ikubula busongo kulakonzya kutupa kunoolubizya lyoonse. Ino nkuli nkotukonzya kubujana busongo bwini-bwini? Sikulemba bbuku lya Tusimpi wakali kuyeeya busongo buteeli bwa Mulengi wesu. Nokuba boobo, muntu uuli woonse ulakonzya kubujana busongo kwiinda mubbuku lyaalubazu, Ibbaibbele. Amubone twaambo ootu tutobela:
Ibbuku limwi lyaamba kuti Bbaibbele “ndebbuku limwaigwa kwiinda mabbuku woonse. Lyasandululwa ziindi zinji, alimwi mumyaambo minji kwiinda bbuku lili lyoonse.” Lino Bbaibbele likkwene naa cibeela candilyo lilajanika mumyaambo iitandila ku 2,600, calo cipa kuti bantu bainda ku 90 pesenti bacikonzye kulibala.
Busongo alimwi ‘bulazumanana koongolola’ munzila iini-ini buya. Mulugwalo lwa Matayo 24:14, tubala kuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino [aabweende oobu bwazintu] ayoosika.”
“Makani mabotu” aaya mbusongo bwini-bwini nkaambo asololela kunzila ya Leza yabusongo yalo njayoobelesya kumanizya mapenzi aabantu, nkokuti Bwami bwakwe. Bwami oobu nimfwulumende ya Leza iyooyendelezya nyika yoonse, aboobo, kuyooba nyika yomwe, amfwulumende yomwe. (Daniele 2:44; 7:13, 14) Nkakaambo kaako Jesu Kristo wakapaila kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.”—Matayo 6:9, 10.
Bakamboni ba Jehova bacibona kuti ncoolwe kwaambilizya Bwami bwa Leza muzisi zili 239! Masimpe, busongo—busongo buzwa kuli Leza ‘bulaita, nokuba kumanjililo aamunzi.’ Sena mulibumvwide?