Kufwidwa Muyandwa

Ba Ronaldo, ibaku Brazil, bakajanika muntenda yamumugwagwa mwalo banamukwasyi bosanwe mobakafwa, kubikkilizya abanyina abausyi. Baamba kuti: “Ndakali mucibbadela kwamyezi yobilo nobakandaambila kuti banamukwasyi wangu bakafwa muntenda.”

“Kumatalikilo tiindakasyoma kuti bakafwa ncobeni. Aboobo, ndakali kulibuzya kuti: ‘Mbuti mbobakonzya kufwa boonse?’ Nindakazyiba kuti masimpe bakafwa, ndakagambwa kapati. Alimwi kunyina nindakauside boobu. Mumazuba aakatobela, ndakali kulimvwa kuti tiindakeelede kuzumanana kupona kakunyina kubonana ambabo. Ndakali kulila abuzuba kwamyezi iili mbwiibede. Ndakalipa mulandu akaambo kakupa muntu uumbi kuti ayenzye nguwe mootokala. Ikuti nindakali ndime ndakali kweenzya, ambweni nibatakafwa.

“Lino kwainda myaka iili 16 kabafwide, pele ndacikonzya kupiluka kubuumi bwangu bwalyoonse. Nokuba boobo, lufwu lwabo tandikalulubi pe.”

KULIYUMYA CIINDI NOKWACITIKA NTENDA

Amuuse kuti mwafwidwa. Ibbaibbele lyaamba kuti kuli “ciindi cakulila.” (Mukambausi 3:1, 4) Ba Ronaldo baamba kuti: “Lyoonse nindakali kulimvwa kuti ndiyanda kulila, ndakali kulila. Alimwi cakali kundaalila kulijata kutegwa nditazwi mizosi, pele ndamana kulila, ndakali kulimvwa kabotu.” Masimpe ngakuti bantu boonse baliindene mbobalila. Ikuti kamutalitondezyi kuti muluuside, eeci tacaambi kuti mweelede kulisinikizya kuzwa misozi pe, alimwi akuti mulaalilwa kulitondezya mbomulimvwa.

Mutanoolizanduli. (Tusimpi 18:1) Ba Ronaldo baamba kuti: “Ndakali kusola kuukazya muzeezo wakuyanda kulizandula. Bantu ibakali kundiswaya, ndakali kubatambula. Alimwi ndakali kumwaambila mukaintu wangu alimwi abalongwe mbondakali kulimvwa.”

Amukkazike moyo ikuti muntu uumwi wamwaambila majwi aamupa kuusa. Aaya alakonzya kuba majwi aakuti: “Lufwu lwakabagwasya kutegwa balyookezye.” Ba Ronaldo baamba kuti: “Majwi amwi inga kaali aakunduumbulizya, pele apa kuti ndiindile buya kuusa.” Muciindi cakubikkila maano kumajwi aamupa kuusa, amutobele lulayo lwamu Bbaibbele lwakuti: “Utabiki moyo wako kumajwi oonse ngebaamba bantu.”—Mukambausi 7:21.

Amuzyibe kasimpe kajatikizya ciimo cabafwide. Ba Ronaldo baamba kuti: “Mulugwalo lwa Mukambausi 9:5, Bbaibbele litondezya kuti bafwide tabapengi pe, kaambo aaka kandipa kuba aluumuno lwamumizeezo. Ibbaibbele alimwi liyiisya kuti kuyooba bubuke akuti bafwide bayooba abuumi alimwi. Aboobo, kujatikizya bayandwa bangu bakafwa, ndiyeeya buyo mbuli kuti bakaunka kuyooswaya.”—Milimo 24:15.

Sena mulizyi? Ibbaibbele lisyomezya kuti kuyooba ciindi Leza ‘nayoolumenenena lufwu mane kukabe kutamani.’a—Isaya 25:8.