ZICITIKA MUNYIKA

Munyika

“Mwaka amwaka, mweelwe wabana bavwanda uusika ku 3 miliyoni balafwa mwezi nguwenya ngobazyalwa, kanji-kanji balafwa kuzintu nzyobakonzya kukwabililwa. Mweelwe wabana aaba wiinda acisela balafwa mubuzuba mbubwenya mbobazyalwa.”—Oobu mbobakaamba bamukabunga kaitwa kuti, Amubakwabilile Bana.

Britain

Bamukabunga Kalanganya Buumi Bwabanamaleya ku England bakajana kuti mu 2011, mutudolopo tusyoonto-syoonto tuli 15 mu London mweelwe wabantu ibakafwa akaambo kakuyoya muya uutali kabotu wakayungizyigwa. Cigambya ncakuti, dizilo uyeeyelwa kuti tausofwaazyi muya kwiinda mingwimba iimwi, nkaambo ulabeleka kabotu alimwi taugwisyi muya wa carbon dioxide munji. Nokuba boobo, 91 pesenti yamuya mubi mubusena oobu uzwa kumyootokala iibelesya dizilo.

Russia

Mubuvwuntauzi ibwakacitwa mu 2013 abamucibeela caku Russia ca Public Opinion Foundation, kwakajanwa kuti 52 pesenti yabantu bamucisi eeci ibalyaamba kuti mba Cikombelo ca Orthodox bakaamba kuti tabana buzuba balibala Bbaibbele, alimwi ibali 28 pesenti bakaamba kuti kanji-kanji tiibakali kupaila.

Africa

Ibamukabunga ka World Bank baamba kuti kulwanina nyika kwapa kuti bulimi buyaansi kapati akupa kuti nzala ikomene. Cisela canyika iikkede buyo iitalimwi icisika kumahekele aali 202 miliyoni cili mu Africa, mwalo zilyo zilimwa mozisika buyo ku 25 pesenti kweelana azilyo zyeelede kulimwa.

United States

Bunji bwazikolo alimwi amayunivesiti ayaabucileka kubelesya mabbuku aakwiiya akutalika kubelesya tutabbuleti tujisi makani ngoonya aali mumabbuku, alimwi amakani aamwi buyo. Nokuba kuti tutabbuleti ootu tatuduli kapati, pele alimwi tuladoonekwa naa inga twagwasya kucesya mali aabelesyegwa.