Nyika

Ino Leza ujisi makanze nzi kujatikizya nyika?

“Mboobu mbwaamba Jehova, . . . Ooyo wakabumba nyika, . . . watakailenga buyo kakunyina kaambo, pele iwakaibumba kutegwa kaikkalwa bantu.” —Isaya 45:18.

NZYOBAAMBA BANTU

Bantu banji baamba kuti nyika tiiyakapangwa amulengi. Zikombelo zimwi ziyiisya kuti nyika mbusena Leza mpasunkila bantu kutegwa abone naa baleelela kupegwa buumi bwakujulu naa kuumpwa mumulilo wahelo.

NCOLYAAMBA BBAIBBELE

Ibbaibbele lyaamba kuti “Leza wakalenga julu anyika.” (Matalikilo 1:1) Wakaambila banabukwetene bakusaanguna kuti: “Amuzyalane muvwule, muzuzye nyika akuyeendelezya, alimwi amweendelezye . . . azilenge zyoonse zyeenda anyika.” (Matalikilo 1:28) Lufwu lwaambidwe kuti lwakali kuyakuboola buyo akaambo kakutamvwida. (Matalikilo 2:17) Aboobo Leza wakabamba nyika kuti ube munzi wabantu kukabe kutamani. Nyika yakeelede kukkalwa buyo abantu bamvwida ibakali kunooilanganya akukkala alinjiyo mane kukabe kutamani.

Sena nyika iyoonyonyonwa?

“Wakkazikizya nyika antalisyo zyanjiyo ziyumu; kunyina noiyoogwisyigwa abusena bwanjiyo lyoonse alyoonse, mane kukabe kutamani.” —Intembauzyo 104:5.

NZYOBAAMBA BANTU

Basayaansi baamba zintu zisiyene-siyene zikonzya kupa kuti nyika inyonyoonwe naa kupa kuti itakkalwi. Zintu eezyi zilakonzya kubikka buumi bwabantu muntenda alimwi zilabikkilizya antenda zilicitikila—mbuli kupwayana kwanyenyeezi, malundu aazwa mulilo, kufwa kwazuba naa kupya kapati kwanyika—alimwi zilabikkilizya azintu zibyaabi nzyobapanga bantu—mbuli mabbomba aanyukkiliya naa misamu iijaya zintu zyuumi.

NCOLYAAMBA BBAIBBELE

Makanze aa Leza kujatikizya nyika tanaacinca pe. Ijwi lya Leza lyaamba kuti: “Nyika inooliko lyoonse mane kukabe kutamani.” (Mukambausi 1:4) Kuyungizya waawo, inookkalwa abantu lyoonse: “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.

NKAAMBO NZI NCOCIYANDIKA?

Kusyoma kuti nyika iyoonyonyoonwa capa kuti bamwi banyonyoone zilengwaleza. Capa kuti bamwi babule bulangizi bwakumbele alimwi akuponena bwasunu. Eeci inga capa kuba abuumi bunyina mpindu. Kulubazu lumwi, ikuti katusyoma kuti tulakonzya kupona kukabe kutamani anyika, tulalangilwa kusala munzila iikonzya kutugwasya tobeni alimwi amikwasyi yesu—nokuba kumbele.

Sena bantu boonse bayakuunka kuyookkala kujulu?

“Majulu nga Jehova, pele nyika wakaipa bana babantu.”—Intembauzyo 115:16.

NZYOBAAMBA BANTU

Bantu banji basyoma kuti bantu boonse bali kabotu baunka kujulu.

NCOLYAAMBA BBAIBBELE

Kujulu nkwa Leza, pele nyika njabantu. Ibbaibbele lyaamba ‘zyanyika eeyo iiboola.’ (Bahebrayo 2:5) Jesu ngomuntu wakusaanguna wakaunka kujulu, alimwi Bbaibbele lilaamba kujatikizya bantu basyoonto ibakasalwa kuunka kujulu kuyoocita mulimo uugaminide. Antoomwe a Jesu, “bayooba bami ibayoolela nyika.”—Ciyubunuzyo 5:9, 10; Luka 12:32; Johane 3:13.

NKAAMBO NZI NCOCIYANDIKA?

Kusyoma kuti bantu boonse bali kabotu baunka kujulu takweendelani acini ncoliyiisya Bbaibbele. Ikuti naa Leza wabatola kujulu bantu boonse bali kabotu, cilakonzya kwaamba kuti waalilwa kuzuzikizya makanze aakwe aakusaanguna kujatikizya nyika alimwi akuti zisyomezyo zyakwe kujatikizya buumi butamani anyika nzyakubeja. Mukwiimpana, Ijwi lya Leza lisyomezya kuti: “Kolangila Jehova akutobela nzila yakwe, eelyo uyookusumpula kuti ukone nyika.”—Intembauzyo 37:34.