ZICITIKA MUNYIKA | MIDDLE EAST
Kulanga-langa Zicitika Ku Middle East
Cooko ca Middle East cili akati kamasena aakasaanguna kuba alusumpuko munyika yoonse alimwi nkokujanika zintu ziyandisi zinji zyakuvwukkula.
Basikupanga Waini Bana Kanana
Mumwaka wa 2013, basikuvwukkula zintu bakajana busena bwakubikkila waini bupati mbobaamba kuti bwakaliko myaka iili 3,700 yainda. Busena oobu bwakajisi nongo izili 40 izikonzya kuyobola mabbodela aawaini aasika ku 3,000 aamazuba aano. Sikuvwukkula zintu eezyi iwakalanga-langa mbozyakabede nongo zyawaini wakajana kuti bana Kanana bakali basikupanga waini bacibwene. Wakaamba kuti: “Waini ooyu wakapangidwe munzila yomwe munongo imwi aimwi.”
SENA MULIZYI? Bbaibbele lilaamba kujatikizya “waini mubotu” wamu Israyeli wansiku alimwi akuyobolwa kwawaini munongo zipati.—Lwiimbo lwa Solomoni 7:9; Jeremiya 13:12.
Kuvwula Kwabantu
Kweelana alipooti iili mumuteende uutegwa Guardian, mumwaka wa 2012 ku Egypt kwakazyalwa bana ibali 560,000 kwiinda mumwaka wa 2010. Magued Osman uubeleka kukkampani iivwuntauzya iitegwa Baseera wakaamba kuti: “Tatunabwene mweelwe mupati boobu mu Egypt.” Basyaazibwene bamwi baamba kuti, ikuti naa mweelwe wabantu uzumanane kuvwula, mapenzi aakubula maanzi, malaiti, alimwi acakulya ayakwiindila.
SENA MULIZYI? Kweelana ancolyaamba Bbaibbele, makanze aa Leza ngakuti bantu ‘bazuzye nyika,’ alimwi akuti boonse kabajisi nzyobayandika.—Matalikilo 1:28; Intembauzyo 72:16.
Kujanwa Kwamali Aakayobwedwe
Makkoini aamali aainda ku 100 aa bronze aalembedwe kuti “Year Four” (Mwaka Wane) akajanwa kufwaafwi anzila imwi ku Israel. Deeti iilembedwe amakkoini itondezya ciindi ba Juda nobakazangila bweendelezi bwabana Roma (69-70 C.E.)—buzangi ibwakapa kuti Jerusalemu anyonyoonwe. Pablo Betzer, mupati-pati wabasikuvwukkula zyakaindi waamba kuti: “Kweelede kuti muntu iwakasisa mali aaya wakali kuyoowa kuti mamanino akali afwaafwi—ambweni wakali kubona kuti basikalumamba bana Roma bakali kuyaabuswena afwaafwi. Wakasisa zintu zyakwe kajisi muzeezo wakuyoozibweza kumbele.”
SENA MULIZYI? Mumwaka wa 33 C.E., Jesu wakaamba kujatikizya bana Roma mbobakali kuyoozinguluka munzi wa Jerusalemu. Wakakulwaizya Banakristo kuti batijile kumalundu kutegwa balikwabilile.—Luka 21:20-24.