BBAIBBELE NCOLYAAMBA
Bangelo
Bangelo balatondezyegwa mumabbuku, muzyakuzekaula alimwi amumafilimu. Ino bangelo mbaani, alimwi babeleka mulimo nzi?
Ino bangelo mbaani?
BBAIBBELE NCOLYAAMBA
Leza katanalenga bubumbo alimwi abantu bakusaanguna, wakalilengede kale zilenge zisongo izisumpukide kapati. Zilaanguzu kapati kwiinda bantu, alimwi zikkala mubusena mumwenya mwakkala Leza—ibusena bantu mbobatakonzyi kusika alimwi akubona. (Jobu 38:4, 7) Bbaibbele liita zilenge eezyo zisumpukide kuti “myuuya” alimwi akuti “bangelo.”—Intembauzyo 104:4.a
Ino bangelo bali bongaye? Mbanji kapati. Bangelo ibazingulukide cuuno ca Leza cabwami bali “makumi-makumi aazyuulu alimwi azyuulu-zyuulu zyazyuulu.” (Ciyubunuzyo 5:11) Ikuti mweelwe ooyu twaubweza mbubwenya mboulembedwe, nkokuti bangelo balasika kumamiliyoni aamyaanda!
“Ndakabona . . bangelo banji bakazingulukide cuuno cabwami . . . , alimwi mweelwe wabo wakali makumi-makumi aazyuulu alimwi azyuulu-zyuulu zyazyuulu.”—Ciyubunuzyo 5:11.
Ino bangelo bakali kubeleka mulimo nzi kaindi?
NCOLYAAMBA BBAIBBELE
Kanji-kanji bangelo bakali kubeleka kabali baambilizi naa batumwa ba Leza.b Alimwi mu Bbaibbele baambidwe kuti bakali kubeleka milimo ya Leza yamaleele. Leza wakatuma mungelo kutegwa alongezye Abrahamu alimwi akumulesya kuti atatuuli mwanaakwe Izaka. (Matalikilo 22:11-18) Mungelo wakalibonya kuli Musa mucitewo icakali kuyaka mulilo kutegwa amwaambile mulumbe iwakali kuyoocinca buumi bwakwe. (Kulonga 3:1, 2) Ciindi musinsimi Daniele naakawaalwa mumulindi wabasyuumbwa, ‘Leza wakatuma mungelo wakwe ooyo wakajala milomo yabasyuumbwa.’—Daniele 6:22.
“Mpoonya mungelo wa Jehova wakalibonya kulinguwe [Musa] mubbibi lyamulilo akati kacitewo camamvwa.”—Kulonga 3:2.
Ino bangelo babeleka mulimo nzi lino?
NCOLYAAMBA BBAIBBELE
Tatukonzyi kwiizyiba milimo yoonse njobacita bangelo mazuba aano. Nokuba boobo, Bbaibbele litondezya kuti balijatikizyidwe mukugwasya bantu babombe myoyo kuzyiba zinji kujatikizya Leza.—Milimo 8:26-35; 10:1-22; Ciyubunuzyo 14:6, 7.
Jehova wakapa sinsiku Jakobo ciloto mwalo mwaakabona bangelo kabatanta akuseluka ‘amatantilo’ akati kajulu anyika. (Matalikilo 28:10-12) Kuzwa muciloto eeco kweelede kuti Jakobo wakayeeya mbotukonzya kuyeeya andiswe—kuti Jehova Leza ulatuma bangelo anyika, kutegwa bagwasye bantu basyomeka balo bayandika lugwasyo lwakwe.—Matalikilo 24:40; Kulonga 14:19; Intembauzyo 34:7.
“Wakabona matantilo aakaimikidwe anyika kaasika kujulu; alimwi bangelo ba Leza bakali kutanta akuseluka alingawo.”—Matalikilo 28:12.
a Bbaibbele litondezya kuti kuli myuuya imwi iyakazangila bweendelezi bwa Leza, alimwi liita bangelo babyaabi aabo kuti “madaimona.”—Luka 10:17-20.
b Mubwini, mabala amumwaambo wa Chihebrayo alimwi a Chigiriki aabelesyedwe mu Bbaibbele kwaamba “mungelo” oonse obilo apandulula “mutumwa.”