Amumuyiisye Mwanaanu Kuba Muntu Uubikkila Maano

INO KUBA MUNTU UUBIKKILA MAANO CIBIKKILIZYA NZI?

Bantu ibabikkila maano balasyomeka. Balakonzya kwiicita milimo yoonse njobapegwa alimwi akwiimanizya muciindi ceelede.

Mwana ulakonzya kutalika kwiiya kuba muntu uubikkila maano noliba leelyo nacili muniini kapati. Bbuku litegwa Parenting Without Borders lyaamba kuti: “Ciindi mwana najisi mwaka omwe amyezi yotatwe ulakonzya kucita kufwumbwa ncamwaambila muzyali wakwe. Mpoonya ciindi akkwanya mwaka omwe amyezi iili 6 inga uyanda kucita kufwumbwa ncaabona kumuzyali wakwe. Mumasena manji, ciindi bana nobajisi myaka iili akati ka 5 alimwi a 7, bazyali babo inga balatalika kubatondezya mbobakonzya kugwasya milimo yaaŋanda. Nokuba kuti inga bacili baniini, bana balakonzya kwiicita kabotu milimo minji.”

NKAAMBO NZI KUBIKKILA MAANO NCOKUYANDIKA KAPATI?

Zimwi ziindi bakubusi balazwa aŋanda kutegwa bakalikkalile pele ciindi buumi nobubayumuna balajokela alimwi kuŋanda yabazyali babo. Eeci cakacitika kubakubusi bamwi akaambo kakuti bazyali babo kunyina nobakabayiisya mbobakonzya kwaabelesya kabotu mali, mbobakonzya kwiilanganya kabotu ŋanda, naa mbobakonzya kulanganya zintu ziyandika zyabuzuba abuzuba.

Aboobo, inga cabota kubayiisya bana banu lino mbobakonzya kuba bantu babikkila maano kutegwa kabazyi ncobeelede kucita baakukomena. Bbuku litegwa How to Raise an Adult lyaamba kuti: “Tamweelede kunoobacitila zintu zyoonse kusikila mane bakkwanya myaka iili 18 nkokuya mubaleke kuti bakalikkalile balikke.”

MBOMUKONZYA KUMUYIISYA KUBA MUNTU UUBIKKILA MAANO

Amumupe mulimo wakucita aŋanda.

NJIISYO YAMU BBAIBBELE: “Mulimo uuli woonse uubelekwa canguzu ujanya mpindu.”—Tusimpi 14:23.

Bana baniini lyoonse balayandisya kubelekela antoomwe abazyali babo. Aboobo mulakonzya kubelesya ciindi eeci kwiinda mukubapa milimo yakucita aŋanda.

Pele bazyali bamwi balawayawaya kucita boobo. Bazyali bamwi baamba kuti tabayandi kubapa milimo yaaŋanda bana babo nkaambo inga bajisi kale milimo minji yakucikolo njobeelede kucita.

Nokuba boobo, bana ibabeleka milimo yaaŋanda balalangilwa kuzwidilila kucikolo nkaambo milimo yaaŋanda ibayiisya kuzumina mulimo uuli woonse ngobapegwa alimwi akuumanizya kuucita. Kuyungizya waawo, bbuku litegwa Parenting Without Borders lyaamba kuti: “Ikuti katutabazumizyi bana besu kutugwasya ciindi nobacili baniini, balakonzya kutalika kuyeeya kuti kugwasya bamwi taciyandiki kapati . . . Alimwi balakonzya kutalika kuyeeya kuti ibamwi balabacitila milimo yabo.”

Kweelana amajwi aazubululwa mbwaatondezya, ciindi bana nobabeleka milimo yaaŋanda, balaiya mbobakonzya kugwasya bamwi muciindi cakuba bantu baliyanda. Kubeleka milimo yaaŋanda kugwasya bana kuzyiba kuti balayandika kapati mumukwasyi alimwi akuti eeci ncencico ncobeelede kunoocita.

Amumugwasye kuzyiba kuti kuli zintu zikonzya kutobela kuti naa walubizya.

NJIISYO YAMU BBAIBBELE: “Koswiilila lulayo akuzumina kulaigwa, kutegwa ukabe musongo kumbele aamazuba.”—Tusimpi 19:20.

Ikuti mwanaanu walubizya, ambweni kuti wajaya cintu camuntu ikutali acaali, tamweelede kusisa pe kujatikizya cacitika. Mwana ulakonzya kucita cintu cimwi nokuba kuti cilakatazya, nkokuti weelede kulilekelela ambweni buya akucibbadelela cintu eeco.

Ikuti mwana wazyiba kuti ngonguwe weelede kupegwa mulandu akaambo kakulubizya kwakwe ciyoomugwasya . . .

• kusyomeka alimwi akuzumina kulubizya kwakwe

• kweeleba cilengwa cakupa bamwi mulandu

• kweeleba cilengwa cakupa twaambo twakulitamizya

• kulilekelela, ikuti kaceelela