4. Sena Twakalengelwa kuti Katupenga?

Ikaambo Ncociyandika

Bwiinguzi kumubuzyo ooyu inga bwapa kuti tucince mbotuzibona zintu mubuumi.

Ncomweelede Kuyeeya

Sena ncamaano kuti Leza iwakalenga zintu zibotu boobu munyika inga wayanda kuti katupona buumi bwamapenzi?

Bantu batakombi babona kupenga kuti nkaambo ikabapa kudooneka kuti Leza ulatulanganya naa kuti nkwali ncobeni. Basyoma kuti kupenga kutondezya kuti (1) Leza tajisi nguzu zyakukulesya, (2) Leza tayandi kukulesya, naa (3) Leza tako.

Sena ootu ntotwaambo tulikke tukonzya kupa kuti bantu kabapenga?

Ncolyaamba Bbaibbele

Leza tanaakatulengela kuti katupenga.

Uyanda kuti katukkomana mubuumi.

“Kunyina cintu ciinda kubota [kubantu] kunze lyakukondwa akucita zibotu eelyo nobacipona, alimwi akuti muntu woonse kalya, kanywa alimwi akukkomana akaambo kamilimo yakwe yoonse njabeleka canguzu. Eeci ncipego ca Leza.”—MUKAMBAUSI 3:12, 13.

Leza wakabapa bantu bakusaanguna bobilo zintu zyoonse nzyobakali kuyandika kutegwa kabatapengi.

Tanaakabalengela kuti balo naa bana babo kabapenga.

Leza wakabaambila kuti: “Amuzyalane muvwule, muzuzye nyika akuyeendelezya.”—MATALIKILO 1:28.

Bantu bakusaanguna bobilo bakasala kutamumvwida Leza.

Akaambo kaceeci, bakaliletela mapenzi aataambiki balo alimwi abana babo boonse.

‘Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.’—BAROMA 5:12.a

Leza tanaakatulenga kuti katulyeendelezya tobeni.

Tiitwakalengwa katujisi nguzu zyakulyeendelezya tobeni mbubwenya mbotwatakalengwa kuti katukkala mumaanzi.

“Muntu weenda tapedwe nguzu zyakusololela noziba ntaamu zyakwe.”—JEREMIYA 10:23.

Leza tayandi kuti katupenga.

Uyanda kuti katucita kufwumbwa ncotukonzya kutegwa tweelebe mapenzi.

“Eelo kaka inga cabota kuti waiswiilila milawo yangu! Aboobo luumuno lwako inga lwaba mbuli mulonga.”—ISAYA 48:18.