Amutondezye Lweetelelo
Penzi
Ikuti naa twabikkila kapati maano kuyeeya bamwi mbobaindene andiswe, tulakonzya kwaamba kuti kwiindana ooko nkulubizya. Aboobo, tulakonzya kutalika kubabona kuti mbaansi aabo ibaindene andiswe. Ikuti twatalika kubabona munzila iili boobu bamwi, cilakonzya kukatazya kutondezya lweetelelo. Kutatondezya lweetelelo kulakonzya kuba citondezyo capenzi lipati ndyotujisi, ipenzi lyakusalulula.
Njiisyo Yamu Bbaibbele
“Amukondwe abaabo bakondwa; amulile abaabo balila.”—BAROMA 12:15.
Ino eeci caamba nzi? Injiisyo eeyi ituyiisya kuti tweelede kutondezya lweetelelo. Lweetelelo nkulibikka mubukkale bwaumwi alimwi akulimvwa mbwalimvwide.
Mbolugwasya Lweetelelo
Ciindi notumweetelela muntu umwi, tulazyiba mbotweelene amuntu ooyo. Tulakonzya kuzyiba kuti awalo ulalimvwa mbuli mbotulimvwa alimwi akuti ulakonzya kucita zintu mbubonya mbuli mbotucita. Lweetelelo lulatugwasya kubona kuti toonse, tacikwe makani ambotwakakomena, tuli mukwasyi omwe. Ikuti twabikkila kapati maano kuyeeya bamwi mbobakozyenye andiswe, ciyoopa kuti katutababoni munzila mbyaabi.
Lweetelelo alimwi lulakonzya kutugwasya kulemeka bamwi. Ba Anne-Marie, ibakkala ku Senegal, aciindi cimwi tiibakali kubalemeka bantu aabo ibakali kubonwa kuti mbaansi abantu banji. Kujatikizya lweetelelo mbolwakabagwasya, bakaamba kuti: “Nondakabona buyumuyumu mbobakajisi bantu aabo ibakali kubonwa kuti mbaansi, ndakalibuzya kujatikizya mbondikonzya kulimvwa ikuti kandili mubukkale bwabo. Aboobo ndakatalika kuyeeya kuti tandili waatala kwiinda mbabo. Kunyina ncondakacita icakapa kuti kandili waatala kwiinda mbabo.” Masimpe, ikuti twasolekesya kumvwisya buyumuyumu mbwajisi umwi, tulalangilwa kutondezya lweetelelo muciindi cakumubona munzila mbyaabi.
Ncomukonzya Kucita
Ikuti kamubabona munzila mbyaabi bantu bamwi, amusole kujana mbazu nzyomukozyenye ambabo. Mucikozyanyo, amweezeezye mbobalimvwa ciindi
Lweetelelo lulatugwasya kubona bantu boonse kuti mbamukwasyi omwe
nobalya cakulya amukwasyi wabo
nobamanizya kucita mulimo muyumu
nobayanzana abalongwe babo
nobaswiilila nyimbo nzyobayandisya
Mpoonya, amusole kulibikka mubukkale bwabo. Amulibuzye kuti:
‘Ino inga ndalimvwa buti kuti muntu umwi wandipa kulimvwa kuti ndinyina mpindu?’
‘Ino inga ndalimvwa buti ikuti bamwi batalika kundibona munzila iteelede noliba leelyo nobatanandizyiba kabotu?’
‘Ikuti nondali umwi wambabo, ino inga ndayanda kuti bamwi kabandeendelezya buti?’