MUNYIKA IIZWIDE MAPENZI

1 | Amubukwabilile Buumi Bwanu

IKAAMBO NCOCIYANDIKA

Mapenzi naa ntenda zilicitikila zilakonzya kubujatikizya kapati buumi bwesu munzila ziindene-indene.

Ntenda zilicitikila naa malwazi zilakonzya kupa bantu kulibilika naa kutyompwa kapati. Pele kulimvwa boobo kwaciindi cilamfwu kulakonzya kubapa kuciswa.
Ntenda zilicitikila naa malwazi, zilakonzya kupa kuti cikatazye kujana busilisi buli kabotu kuzibbadela, nkaambo basilisi inga bajata bubi kulanganya balwazi banji aciindi comwe alimwi ayalo misamu ilakonzya kuceya.
Kuyungizya waawo, ntenda zilicitikila naa malwazi zilakonzya kupa kuti cikatazye kujana mali aakuula zintu ziyandika kapati mbuli cakulya alimwi amisamu.

Ncomweelede Kuzyiba

Kuciswa alimwi akukopana kapati mumizeezo zilakonzya kumupa kutasala kabotu, calo icikonzya kumupa kwaalilwa kucita zintu izikwabilila buumi bwanu. Akaambo kaceeci, mulakonzya kwiindila buya kuciswa.
Ikuti tiimwabikkila maano kulanganya buumi bwanu, mulakonzya kuciswa kapati ambweni akufwa buya.
Ikuti kamuli kabotu, inga mwacikonzya kusala kabotu noliba leelyo nomuli mumapenzi aakatazya kapati.
Kufwumbwa naa muli bavwubi naa pe, mulakonzya kucita zintu izikonzya kukwabilila buumi bwanu.

Ncomukonzya Kucita Lino

Kufwumbwa leelyo nocikonzyeka, muntu musongo ulayeeya zintu izikonzya kumubikka muntenda mpoonya akucita kufwumbwa ncakonzya kutegwa azyeelebe. Eeci cilakonzya kubikkilizya amakani aabuumi. Kanji-kanji mulakonzya kwaayeleba malwazi aamwi kwiinda mukuba balondo. Batonga bakati suntwe moowa nguwoongola.

“Kuba balondo alimwi akusalazya maanda eesu, cilatugwasya kutasowa mali manji kubbadelela misamu abamadokota ibaboola kutusilika.”—Mbobakaamba ba Andreas.a

a Mazina aamwi mumagazini eeyi acincwa.

MBOMUKONZYA KULIYUMYA—Nzila Zigwasya

Ciindi nokwacitika ntenda naa nokwabbuka bulwazi bumwi, amubukwabilile buumi bwanu kwiinda mukutobela nzila eezyi

AMUBE BALONDO

Amube Balondo

Bbaibbele lyaamba kuti: “Muntu uucenjede abona mapenzi ulayuba.” (Tusimpi 22:3) Amusole kuyeeyela limwi zintu zikonzya kubikka buumi bwanu muntenda mpoonya akuzyeeleba.

Ciindi aciindi, kamusamba kumaanza ansipa kwaambisya ciindi nomuyanda kujata cakulya naa nomwazwa kucimbuzi.
Lyoonse kamusalazya muŋanda, kwaambisya oomo muvwula kujatwa-jatwa alimwi azintu zivwula kujatwa-jatwa.
Ikuti kacikonzyeka, amubatantamuke bantu baciswa bulwazi buyambukila.

KAMULYA ZILYO ZILI KABOTU

Kamulya Zilyo Zili Kabotu

Bbaibbele lyaamba kuti: “Kunyina muntu wakasulide kale mubili wakwe mwini, pele ulausanina akuubamba kabotu.” (Baefeso 5:29) Tulatondezya kuti tulauyanda mubili wesu kwiinda mukubikkila maano kujatikizya zintu nzyotulya, nzyotunywa alimwi amisamu njotubelesya.

Kamunywa maanzi manji.
Kamulya mafuluti aayindene-indene alimwi azisyumani ziindeene-indene.
Amucesye kulya zintu zyamafwuta kapati, sautu alimwi asyuga.
Mutanoofwebi naa kubelesya misamu iikola alimwi mutanoociindizyi kunywa bukoko.

“Kutegwa tutaciswi, mebo abakaintu bangu tulasola kulya zilyo zili kabotu; ikuti naa tiitwacita oobo, inga twatalika kubelesya tumali ntotujana kubbadela bamadokota alimwi akuula misamu. Swebo twabona kuti cilagwasya kubelesya mali eesu kuula zyakulya zili kabotu.”—Mbobakaamba ba Carlos.

KAMUNYANYAASYA MUBILI ALIMWI AKUJANA CIINDI CINJI CAKULYOOKEZYA

Kamunyanyaasya Mubili

Bbaibbele lyaamba kuti: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.” (Mukambausi 4:6) Tuyandika kubeleka, pele alimwi tuyandika kujana ciindi cakulyookezya.

Kamunyanyaasya mubili. Mulakonzya kutalika kwiinda mukujana buyo ciindi cakweenda lyoonse. Kucita zintu zinyanyaasya mubili kulakonzya kumupa kuba abuumi buli kabotu nokuba kuti mulicembeede, muli balema naa mulaciswa-ciswa.
Kamujana Ciindi Cakulyookezya

Amujane ciindi cinji cakoona. Kutaba aciindi cinji cakoona kulakonzya kupa kuti mwiindile kulimvwa kutyompwa alimwi eeci inga capa kuti kamutabikkili maano kuzintu nzyomucita. Mukuya kwaciindi, inga camupa kuciswa buya.
Amulibikkile ciindi cakuunka kukoona alimwi amucitobele. Amusole kunikoona aciindi ncoona eeco ncomwasala alimwi akubuka aciindi comwe buzuba abuzuba.
Amweelebe kweebelela TV, kubelesya fooni naa tuncini tumwi nomuli abulo ciindi cakoona.
Mutanoonywi kkofi, bukoko naa kulya cakulya cipa kukkuta kapati kamutanoona.

“Ndakabona kuti koona, kulabujatikizya buumi bwangu boonse. Mucikozyanyo, ikuti naa tiindoona kapati, zimwi ziindi inga mutwe ulacisa alimwi inga ndilimvwa kukatala. Pele kuti naa ndoona ciindi cinji, inga ndilimvwa kabotu alimwi inga ndililibambilide kubeleka mulimo uuli woonse uuyandika. Inga ndilimvwa kuba anguzu alimwi inga tandivwuli kuciswa-ciswa.”—Mbobakaamba ba Justin.