MUNYIKA IIZWIDE MAPENZI

3 | Amucikwabilile Cilongwe Ncomujisi Abayandwa Banu

IKAAMBO NCOCIYANDIKA

Bantu mbobayaabwiindila kulibilika akaambo kamapenzi aali munyika, ibanji baleka kubabikkila maano bayandwa babo.

Bantu balalizandula kubalongwe babo.
Banabukwetene balaleka kweendelezyanya caluzyalo.
Bazyali balaleka kubikkila maano kujatikizya zintu nzyobalibilika bana babo.

Ncomweelede Kuzyiba

Balongwe balayandika kapati kutegwa mube abuumi buli kabotu, kwaambisya muziindi zyamapenzi.
Kutyompwa ikuboola akaambo kamapenzi aacitika munyika, kulakonzya kuleta mapenzi ngomutayeeyeli mumukwasyi.
Ciindi bana banu nobamvwa naa nobabona zintu zibyaabi anyuuzi, balakonzya kutalika kuyoowa kapati.

Ncomukonzya Kucita Lino

Bbaibbele lyaamba kuti: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.

Amulombe umwi uukonzya kumugwasya alimwi akumupa lulayo lugwasya. Balongwe bali boobu ibamuyanda balakonzya kumugwasya kuliyumya kumapenzi ngomukonzya kujana buzuba abuzuba.

MBOMUKONZYA KULIYUMYA—Nzila Zigwasya

Ciindi nomuli mumapenzi, amucikwabilile cilongwe canu abayandwa banu kwiinda mukutobela nzila eezyi

AMUYUMYE CIKWATI CANU

Amuyumye Cikwati Canu

Bbaibbele lyaamba kuti: “Bobilo bali kabotu kwiinda omwe, . . . Nkaambo ikuti umwi wabo wawa, ooyo umwi ulakonzya kumugwasya mweenzinyina kuti aimikile.” (Mukambausi 4:9, 10) Mucikwati, banabukwetene beelede kubelekela antoomwe ikutali kuzundana.

Mutanikweendelezyanyi munzila iitali kabotu akaambo buyo kamapenzi ngomujisi. Amusole kukkazika moyo.
Ambweni ciindi comwe ansondo, amubandike angomukwetene limwi mapenzi ngomujisi. Nomucita boobo, amubikkile maano kulwana penzi kutali kulwana mulicanu.
Amujane ciindi cakucita zintu nzyomukkomanina noonse nobilo.
Amubandike kujatikizya ziindi zikkomanisya nzyomwakali aanzizyo, ambweni kwiinda mukulanga mafwoto aamucado wanu naa zintu zimbi zikkomanisya.

“Talili lyoonse banabukwetene nobazuminana muzintu zyoonse, pele eeci tacaambi kuti tabakonzyi kubelekela antoomwe. Balakonzya kusala cakucita mpoonya akubelekela antoomwe kutegwa cintu eeco cizwidilile.”—Mbobakaamba ba David.

AMUZUMANANE KUMVWANA ABALONGWE BANU

Amuzumanane Kumvwana Abalongwe Banu

Kunze buyo lyakutambula lugwasyo kubalongwe banu, amusole kuyeeya nzila zimwi mbomukonzya kupa lugwasyo andinywe. Kwiinda mukugwasya bamwi, andinywe mulagwasyigwa.
Amusole kubandika abalongwe basiyene-siyene buzuba abuzuba kutegwa mumvwe mbobapona.
Amubabuzye balongwe banu kujatikizya mbobacikonzya kuliyumya kumapenzi aakozyenye angomujisi.

“Mapenzi inga twaakozyanisya kumvwula yaguwo pati. Ciindi mvwula yaguwo noyapa kuti cikatazye kubona, balongwe balakonzya kumugwasya kuzyiba busena mpomubede alimwi ankomweelede kuunka. Balacita oobo ambweni kwiinda mukumuyeezya buyo zintu nzyomuzyi kale. Balongwe balamubikkila maano kapati alimwi balizyi kuti andinywe mulababikkila maano.”—Mbobakaamba ba Nicole.

AMUBABIKKILE MAANO BANA BANU

Amubabikkile Maano Bana Banu

Bbaibbele lyaamba kuti: ‘Mweelede kufwambaana kuswiilila, kumuka kwaambaula.’ (Jakobo 1:19) Kumatalikilo, bana banu inga kabawayawaya kwaamba zintu zibalibilisya alimwi amapenzi aabo, pele kwiinda mukubaswiilila cakukkazika moyo, mulakonzya kupa kuti baanguluke kwaamba mbobalimvwa.

Amupe kuti bana banu balimvwe kwaanguluka kumwaambila mbobalimvwa. Bana bamwi balaanguluka kwaamba mbobalimvwa mbuli ciindi nobamana kulya naa nobali mukweendeenda, ikutali ciindi nobakkede kabalangene buya abazyali babo.
Amubone kuti bana banu tabaswiilili malipooti manji anyuuzi aanyonganya kapati.
Amubazyibye bana banu kujatikizya ntaamu nzyomwabweza kutegwa muukwabilile mukwasyi.
Amube aanzila yakubelesya ciindi nokwabbuka cintu cimwi cacibukilambuta, mpoonya amwiisole abana banu.

“Amubandike abana banu alimwi amubazumizye kwaamba mbobalimvwa. Ambweni inga kabataambi buyo pele inga kabayoowede, kabalibilikide naa kunyema kujatikizya cintu cimwi. Amubaambile kuti andinywe inga mbomulimvwa oobo, alimwi ancomucita kutegwa muleke kulimvwa boobo.”—Mbobakaamba ba Bethany.