NCOMUKONZYA KUCITA ZINTU NOZYADULA
Amube Baabi
Kuti kacimuyumina kubbadelela zintu nzyomuyandika, mulakonzya kulimvwa kuti cilakatazya kapati kuba baabi. Nokuba boobo, mulakonzya kujana kuti kuba baabi kulakonzya kumugwasya kucesya penzi lyakubula mali. Cilakonzyeka kuti kamuyobola mali aciindi nciconya kamuli baabi.
IKAAMBO NCOCIYANDIKA
Kuba baabi, nomuba mutuntu tusyoonto, kulakonzya kumupa kuba alukkomano akulibona munzila yeelede. Mubwini bamadokota bamwi baamba kuti, kupa kulakonzya kugwasya kuba abuumi buli kabotu alimwi akumupa kuliiba mumizeezo. Mucikozyanyo, kulakonzya kucesya-cesya kulibilika, kutyompwa, bulwazi bwa BP alimwi buya atucisa-cisa twamumubili. Kunze lyaboobo, kulakonzya kumugwasya kuba aciindi cinji cakoona.
Nomugwasya bamwi, ambweni kwiinda mukubapa mali naa cintu cimwi buyo, cilakonzya kuyoobaubila abalo kumugwasya mwaakuyandika lugwasyo. Ba Howard, bakkala ku England bakaamba kuti: “Ikujana nzila mbotukonzya kuba baabi alimwi akugwasya bamwi, cipa kuti mebo abakaintu bangu cituubaubile kutambula lugwasyo ndobatupa.” Masimpe ngakuti bantu baabi, tabalangili kupegwa cintu cili coonse nobamana kugwasya. Pele bulumbu mbobajana nkuba abalongwe beni-beni balo ibalyaabide kubagwasya ciindi nobayandika lugwasyo.
NCOMUKONZYA KUCITA
Amwaabane Abamwi Zintu Nzyomujisi. Nokuba kuti muli bacete, mulakonzya kubapa cintu cimwi bamwi. Mucikozyanyo mulakonzya kulida antoomwe cakulya. Ba Duncan alimwi amukwasyi wabo, balo ibakkala ku Uganda, mbacete nokuba boobo mbaabi. Bakaamba kuti: “Mu Nsondo, mebo abakaintu bangu inga tulaita muntu naba omwe kuŋanda kutegwa tulide antoomwe. Ziindi zili boobu zilatukkomanisya kapati.”
Masimpe ngakuti, ciindi nomwaabila bamwi, mweelede kuzilanga kabotu zintu. Tamweelede kupa bantu zintu cakuti mane mukwasyi wanu watalika kupenga buya.—Jobu 17:5
Amusole nzila eeyi: Amupe muntu umwi cakulya nokuba kuti taciduli naa kumutamba kutwakunywaanywa. Kuti kamujisi zintu nzyomutacibelesyi, inga mwazipa balongwe naa basimukobonyoko balo ambweni ibakonzya kuzikkomanina alimwi akuzibelesya.
Nzila zimwi izyakwaabila bamwi. Zipego zimwi zibotu taziyandiki mali buya. Mucikozyanyo, tulakonzya kwaaba ciindi cesu alimwi akutondezya kuti tulababikkila maano bamwi kwiinda mukubacitila zintu zimwi zikonzya kubagwasya. Naaba majwi aaluzyalo inga caba cipego. Aboobo amubaambile bamwi kuti mulabalumba kuzintu nzyobamucitila alimwi akuti mulabayanda kapati.
Amusole nzila eeyi: Amubagwasye bamwi kwiinda mukubacitila tulimo-limo tumwi twaaŋanda, mbuli kubambulula zintu alimwi akubaulila nzyobayandika. Amulembe kakkaadi kuzwa ansi amoyo naa ikutuma kagwalo kaafooni kumulongwe wanu ikumwaambila buyo kuti mulamuyeeya.
Ciindi nomwaabila bamwi zintu nzyomujisi munookkomene kapati mubuumi.