MAKANI 6

Mwana Uuli Kabotu A Mwana Mubi

LANGA Kaini a Abela. Boonse sunu bakomena baba basankwa. Kaini waba mulimi. Ulalima zisyango zyanseke, micelo alimwi azisyu.

Abela waba muvwubi wambelele. Ulayandisya kweembela twana twambelele. Twakomena akuba mbelele zipati, muciindi buyo cisyoonto Abela waba abutanga bwambelele bwakweembela.

Buzuba bumwi Kaini a Abela bakaleta zipego kuli Leza. Kaini wakaleta zilyo nzyaakalima. Walo Abela wakaleta mbelele iinda kubota. Jehova wakamukkomanina Abela acipego cakwe. Pele Kaini tanaakamukkomanina acipego cakwe. Hena ulicizyi ncaatakamukkomanina?

Takuli buyo kuti cipego ca Abela ncibotu kwiinda ca Kaini. Pele nkaambo kakuti Abela muntu uuli kabotu. Ulamuyanda Jehova amunyina. Pele Kaini mubi; tamuyandi munyina amwainda.

Aboobo Leza waambila Kaini kuti aleke nzila zyakwe zibi. Pele Kaini tamvwi. Wakalala kapati nkaambo Leza wayanda Abela. Aboobo Kaini waambila Abela kuti: “Atweende musokwe.” Okuya kabali balikke, Kaini wamuumputa Abela munyina. Wamuumputa canguzu cakuti wamujaya. Hena eeco tiicakali cintu cibi Kaini ncaakacita?

Nokuba kuti Abela wakafwa, Leza ucimuyeeyede. Abela wakali muntu uuli kabotu, alimwi Jehova tabalubi bantu bali boobo. Aboobo buzuba bumwi Jehova Leza uya kumubusya Abela. Aciindi eeco Abela taku naya kufwa kabili. Uya kupona ano anyika kukabe akutamani. Hena tacikabi cintu cibotu kuzyiba bantu bali mbuli Abela?

Pele Leza takkomani abantu bali mbuli Kaini. Aboobo Kaini naakamana kujaya munyina, Leza wakamusubula kwiinda mukumutanda kulamfwu amukwasyi. Kaini naakaunka kwaakukkala kulubazu lumwi lwanyika, wakatoleezya amucizyi wakwe akuba mukaintu wakwe.

Tiicakatola ciindi, Kaini amukaintu wakwe bakatalika kuba abana. Abamwi bana ba Adamu a Eva basankwa abasimbi bakakwatana alimwi abalo bakaba abana. Mukaindi buyo kasyoonto kwakaba bantu banji anyika. Atubaiye bamwi babaabo.

Matalikilo 4:2-26; 1 Johane 3:11, 12; Johane 11:25.