MAKANI 42

Mbongolo Yaambaula

HENA wakaimvwa kale mbongolo kayaambaula? Inga wavwiila kuti ‘peepe, banyama tabakonzyi kwaambaula.’ Pele Bbaibbele lyaamba mbongolo yakaambaula. Atubone mbocakacitika eeco.

Bana Isilayeli balaafwiifwi kunjila munyika ya Kenani. Bbalaki mwami wa Mowabu uli bayoowede bana Isilayeli. Aboobo waita muntu musongo wazina lya Bbalamu kuti azyikusinganye bana Isilayeli. Bbalaki wasyomezya Bbalamu kumupa mali manji. Aboobo Bbalamu watanta mbongolo yakwe waunka kwaakubona Bbalaki.

Jehova tayandi kuti Bbalamu asinganye bantu Bakwe. Aboobo watuma mungelo uujisi mupeni mulamfwu waima munzila kusinkila Bbalamu. Bbalamu tamubwenyi mungelo, pele mbongolo yakwe ili mubwenyi. Aboobo mbongolo yasoleka kuunka ooku akooku ikuleya mungelo, limwi nkoyakatazyigwa yaile koona munzila. Bbalamu wakalala kapati, waidinkula mbongolo yakwe ankoli.

Amane Jehova wakapa kuti Bbalamu amvwe mbongolo nkoyaambaula kuli nguwe. Mbongolo yabuzya kuti: ‘Ino ncinzi ncindakucita nconduumina boobu?’

Bbalamu wati: ‘Wandisampuzya. Ikuti nindalijisi cipeni nindakujaya sunu!’

Mbongolo yabuzya kuti: ‘Hena kuli nindakakucitide boobu?’

Bbalamu waingula kuti ‘peepe.’

Kumane Jehova wapa kuti Bbalamu amubone mungelo kajisi mupeni kaimvwi munzila. Mungelo wati: ‘Nkaambo nzi ncoyuumina mbongolo yako? Ndaboola kuzyi kukusinkila nzila nkaambo toyelede kuunka kwaakusinganya bana Isilayeli. Ikuti mbongolo yako niyatandileya nindakujaya sunu, pele yalo nindataijaya.’

Bbalamu wati: ‘Ndabisya. Tiindalizyi kuti waliimvwi munzila.’ Mungelo wamuleka Bbalamu, aboobo Bbalamu waunka kwaakubona Bbalaki. Uciyanda kusinganya bana Isilayeli, pele muciindi cakubasinganya, Jehova wamupa kuti alongezye Isilayeli kwaziindi zyotatwe.

Myeelwe 21:21-35; 22:1-40; 23:1-30; 24:1-25.