MAKANI 44

Lahabu Wabasisa Basikutwela

BANTU aaba bali mumapenzi. Alimwi beelede kuccija, kwataba boobo balajaigwa. Mbana Isilayeli basikutwela, pele mukaintu uubagwasya ngu Lahabu. Lahabu ukkala muŋanda iili kubwaanda bwamunzi wa Jeliko. Atubone capa kuti bantu aaba babe mumapenzi.

Bana Isilayeli bayanda kuzabuka Mulonga wa Jodano akunjila munyika ya Kenani. Pele kabatana zabuka, Josyuwa watuma basikutwela bobilo. Wabaambila kuti: ‘Kamuya mukalange nyika amunzi wa Jeliko.’

Basikutwela nibasika mu Jeliko, banjila muŋanda ya Lahabu. Pele umwi muntu waambila mwami wa Jeliko kuti: ‘Kwasika bana Isilayeli bobilo kulubundubundu kuzyi kulanga nyika.’ Amvwe makani aaya, mwami watuma bantu kuli Lahabu, eelyo bati kuli nguwe: ‘Balete kuno bantu aabo bali muŋanda yako.’ Pele Lahabu wabasisa basikutwela atala lyaciluli. Kumane wati, ‘kwakasika basankwa, pele tandizyi nkobakazyila. Bajokela masiku ngeena mulyango wamunzi kuutanajalwa. Ikuti mwafwambaana mulakonzya kubeenzya!’ Aboobo basankwa batalika kubatandila.

Mbobazwida buyo, Lahabu cakufwambaana waunka atala lyaciluli, wati kuli basikutwela: ‘Ndilizyi kuti Jehova ulamupa nyika eeyi. Twakamvwa mbwaakayuminizya Lwizi Lusalala nomwakali kuzwa mu Ijipiti, ambomwakajaya bami bobilo ba Sihoni a Ogi. Ndali kumufwida luzyalo, aboobo ndilomba kuti mundisyomezye kuti muya kundifwida luzyalo. Mukandifwutude bataata, bamaama, bakwesu alimwi abacizyi bangu.’

Basikutwela basyomezya kuti baya kucita oobo, pele Lahabu weelede kucita cimwi cintu. Basikutwela bati: ‘Bweza ntambo eeyi iisalala uyaange ampulungwido yako, wamana ulete boonse bamukowa wako muŋanda yako ukkale ambabo. Eelyo toonse twaakujoka ku Jeliko, tuya kwiibona ntambo eeyi ampulungwido yako, aboobo taku naba omwe ngotuya kujaya muŋanda yako.’ Bajokele buyo basikutwela kuli Josyuwa, bamwaambila zyoonse zyakacitika.

Josyuwa 2:1-24; Ba-Hebrayo 11:31.