MAKANI 63
Solomoni Mwami Musongo
SOLOMONI musankwa-sankwa buyo naaba mwami. Ulamuyanda Jehova alimwi ulaccilila malailile mabotu aakamupa wisi Davida. Jehova wamukkomanina Solomoni, aboobo buzuba bumwi masiku wati kuli nguwe muciloto: ‘Solomoni, ino ncinzi ncoyanda kuti ndikupe?’
Aciindi aawa Solomoni waingula wati: ‘Jehova Leza wangu, ndicili mwana kapati alimwi tandicizyi mbobalela bantu. Aboobo ndipe busongo bwakulela bantu bako munzila iili kabotu.’
Jehova wakukkomanina kulomba kwa Solomoni. Aboobo wati: ‘Akaambo kakuti walomba busongo ikutali kupona mazuba manji naa buvwubi, ndilakupa busongo bunji kwiinda muntu uuli woonse wakaponede. Pele ndilakupa alimwi azyeezyo nzyootalomba, nkokuti buvwubi abulemu.’
Muciindi buyo cisyoonto kwaboola bamakaintu bobilo bajisi penzi lipati. Umwi mukaintu wati: ‘Ooyu mukaintu tukkala limwi muŋanda yomwe. Ndakatumbuka mwana musankwa, kwiinde buyo mazuba obilo awalo mukaintuma wakatumbuka mwana musankwa. Kumane buzuba bumwi masiku mwana wakwe wakafwa. Nindakali koona wakabikka mwana wakwe uufwide kumbali lyangu amane nkubweza mwana wangu. Nindakabuka akulanga ndakajana kuti mwana uufwide, tali wangu.’
Aciindi aawa umwi mukaintu wati: ‘Peepe! Mwana uupona nguwangu, ooyo uufwide nguwakwe!’ Mukaintu wakutaanguna waingula wati: ‘Peepe! Ooyo uufwide nguwako, pele uupona nguwangu!’ Oobu mbombubo mbobakazyanya bamakaintu. Ino ncinzi Solomoni ncalaacite?
Watuma kuti bamuletele mupeni. Eelyo nobaleta, wati: ‘Amumutende mwana muumi muzyibeela zyobilo, aumwi mukaintu mumupe cibeela cimwi.’
Balila banyina mwana. ‘Ndakomba mutamujayi mwana. Amumupe mukaintuma!’ Pele mukaintu wabili wati: ‘Kutabi ngomupa, kamwiile kumutenda muzyibeela zyobilo.’
Kumamanino Solomoni wati: ‘Mutamujayi mwana! Amumupe mwana mukaintu mutaanzi. Mbabanyina ncobeni.’ Solomoni wazyiba nkaambo banyina ncobeni balamuyanda kapati mwana cakuti balizumide kumupa mukaintunyina kutegwa atajaigwi. Bantu nobamvwa Solomoni mbuli mbwaamana makani, bakkomana kuba amwami musongo uuli boobu.
Mumazuba aakulela kwa Solomoni, Leza wabaleleka bantu kwiinda mukubapa nyika iikomena bbusumili, maila, masaansa, nkuyu azyakulya zimwi. Bantu balasama zisani zibotu akukkala mumaanda mabotu. Boonse balijisi zintu zinji alimwi zibotu.