MAKANI 82

Modekayi a-Esita

ATUJOKE munsi kwamyaka misyoonto Ezara katanaunka ku Jelusalemu. Modekayi a Esita nenkumenkume mu Isilayeli mubwami bwa Persia. Esita mwami mukaintu, eelyo imunyina Modekayi nguumuccilila mubulelo. Atubone eeci mbocakaba.

Bazyali ba Esita bakafwa kacili mwana muniini, aboobo Modekayi ngookamukomenzya Esita. Ahasuera mwami wa Persia ulijisi ŋanda yabwami mumunzi wa Susani, eelyo Modekayi ngumwi wababelesi bakwe. Buzuba bumwi Vasiti muka mwami tanaakamulemeka mulumi wakwe, aboobo mwami wasala mukaintu mupya kuba mukaintu wakwe. Hena ulimuzyi mukaintu ngwaasala? Ngu Esita deede lyamwana.

Hena wamubona muntu ooyu uulisumpula bantu ngobapa bulemu? Ngu Hamani. Muntu uulemekwa kapati mu Persia. Hamani uyanda Modekayi ooyu ngobwenyi waawa kuti awalo amupe bulemu. Pele Modekayi tanaamulemeka. Tanaacibona kuba camaano kupa bulemu muntu mubi boobu. Eeci capa kuti Hamani akalale kapati. Aboobo nceeci ncaacita.

Hamani waambila mwami makani aakubejekezya bana Isilayeli aakuti: ‘Mbantu babi bataccilili milawo yako. Beelede kujaigwa.’ Ahasuera tazyi kuti mukaintu wakwe Esita muna Isilayeli. Aboobo wamvwa zyaamba Hamani, eelyo wabikka mulawo wakuti bana Isilayeli boonse bakajaigwe buzuba bumwi.

Modekayi naakaumvwa mulawo wakacimwa kapati. Watumya mulumbe kuli Esita wati: ‘Umwaambile mwami, alimwi umulombe kuti atuvwune.’ Nkutyola mulawo mu Persia kuunka kwaakubona mwami watakwiita. Pele Esita waunka kakunyina akwiitwa. Mwami wabweza nkoli yakwe yangolida naasika Esita kuli nguwe icaamba kuti teelede kujaigwa. Esita waita mwami a Hamani kupobwe lipati. Mwami wamubuzya Esita kuti aambe naa kuli ncayanda kuti acitilwe. Esita wati uya kumwaambila ikuti mwami a Hamani bakaboole kucakulya mubuzuba buccilila.

Nobakali kulya, Esita waambila mwami kuti: ‘Bantu bangu andime tuyanda kujaigwa.’ Mwami wakalala. Wabuzya kuti: ‘Ngwani uuyanda kucita cintu eeco?’

Esita wati: ‘Muntu sinkondoma mubi ngu Hamani ooyu.’

Elo kaka mwami wakalala! Walailila kuti Hamani ajaigwe. Kumane mwami wabikka Modekayi kuba uumuccilila mubwami. Modekayi lino wabona kuti mulawo mupya wabikkwa uuzumizya bana Isilayeli kulwanina buumi bwabo mubuzuba oobo mbobeelede kujaigwa. Mbwaanga lino Modekayi muntu uulemekwa, bantu banji babagwasya bana Isilayeli eelyo bavwunwa kuli basinkondonyina.

Bbuku lya Bbaibbele lya Esita.