MAKANI 101

Jesu Wajaigwa

LANGA kubija cintu eeci cicitika! Jesu wajaigwa. Bamubikka acisamu. Bamugagaila misumali kumaanza akumaulu. Nkaambo nzi muntu ncanga wayanda kucita cintu eeci kuli Jesu?

Nkaambo kakuti bamwi bantu bali musulide Jesu. Hena ulibazyi? Umwi wabaabo mungelo mubi ngu Saatani Diabolosi. Ngowakapa kuti Adamu a Eva bamuzangile Jehova. Alimwi Saatani ngoopa kuti basinkondonyina a Jesu bacite cintu cibi boobu.

Kufwumbwa ciindi eeco Jesu katana gagailwa acisamu, basinkondonyina tiibakali kumubikkila maano. Koyeeya buyo mbobakaboola kumuunda wa Getesemane akumujata. Ino bakali baani basinkondonyina aabo? Bakali basololi bazikombelo. Atubone cicitika kuli Jesu.

Jesu bamujate basololi bazikombelo, baapositolo baccija. Bamusiya Jesu alikke abasinkondonyina nkaambo balo bayoowa. Pele baapositolo bobilo Pita a Johane tiibasakana kuccija. Bazyaacifwuuntila kutegwa babone cicitika kuli Jesu.

Bapaizi bamutola Jesu kumudaala Anasi wakali mupaizi mupati. Pele bantu tiibakkala kwaciindi cilamfwu kuno. Kumane bamutola Jesu kuŋanda ya Kayafa, walo ngomupaizi mupati lino. Ibasololi banji bazikombelo bavwoomana aŋanda yakwe.

Ano aŋanda ya Kayafa lwatalika lubeta. Bantu baletwa muŋanda kutegwa bamutamikizye Jesu. Boonse basololi bazikombelo bati: ‘Jesu weelede kujaigwa.’ Kumane bamuswida mate kumeso akumuuma mfwaindi.

Zyoonse eezyi nozicitika, Pita nkwali anze mulubuwa. Kuli mpeyo masiku, aboobo bantu bakunka mulilo. Kabayota mulilo, mubelesi musimbi wamulanga Pita, wati: ‘Awalo muntu ooyu bali limwi a Jesu.’

Pita wavwiila wati: ‘Peepe, tiitwali limwi!’

Kwaziindi zyotatwe bantu balati kuli Pita, mwali limwi a Jesu. Pele kufwumbwa baamba boobo, walo Pita ulati, nkubeja ooko. Ciindi catatu Pita naamba boobu, Jesu waceba wamulanga. Pita wausa kapati akaambo kakuti tanaamba camasimpe, aboobo wazwa anze akutalika kulila.

Nolyakapola zuba muli Bwasanu, bapaizi bamutola Jesu mu Nkuta Mpati nkobaswaanganina. Kuno babandika ncobeelede kumucita. Bamutola kuli Ponto Pilato, muleli wacisi ca Judaya.

Ibapaizi baambila Pilato kuti: ‘Ooyu muntu mubi. Weelede kujaigwa.’ Amane kumubuzya mibuzyo Jesu, Pilato wati: ‘Taku mulandu ngondajana ngwaacita.’ Kumane Pilato wamutumya Jesu kuli Heloda Antipa. Heloda ngomuleli mu Galilaya, pele ukkala mu Jelusalemu. Heloda awalo taku mulandu ngwaajana kuli Jesu, aboobo wamujosya kuli Pilato.

Pilato uyanda kumuleka Jesu kuti aunke. Pele basinkondonyina a Jesu bayanda kuti kubota kwaangululwa sintolongo uumbi ikutali Jesu. Ooyu muntu mubbi ngu Bbalabbasi. Lino nciindi camasyikati Pilato naamugusya Jesu anze. Wati kubantu: ‘Amulange! Mwami wanu!’ Pele bapaizi bapati boongolola bati: ‘Amumubweze! Amumujaye! Amumujaye!’ Aboobo Pilato wamwaangununa Bbalabbasi, akubweza Jesu kuti akajaigwe.

Masyikati muli Bwasanu, Jesu wagagailwa acisamu. Tokonzyi kubabona acifwanikiso, pele akumwi kulubazu lwa Jesu, kwagagailwa mubbi acisamu kuti bajaigwe. Kakuceede buyo asyoonto kuti Jesu afwe, umwi mubbi wati kuli nguwe: ‘Ukandiyeeye waakuba mubwami bwako.’ Jesu waingula wati: ‘Ndakwaambila kuti uya kuba andime mu Paladaiso.’

Hena eeci tacili cisyomezyo cibotu? Hena uluuzyi paladaiso Jesu ngwaamba? Ino wakali kuli paladaiso Leza ngwaakabambide kumatalikilo? Wakali anyika. Jesu aakulela kujulu kali mwami, uya kumubusya muntu ooyu akukkala mu Paladaiso mpya anyika calukkomano. Hena tatukonzyi kukkomana kumakani aaya?

Matayo 26:57-75; 27:1-50; Luka 22:54-71; 23:1-49; Johane 18:12-40; 19:1-30.