MAKANI 105
Kabalindila mu-Jelusalemu
BANTU aaba bali waawa mbatobeli ba Jesu. Bakaccilila ncaakabaambila, aboobo bakakkala mu Jelusalemu. Boonse kabalindila, kwaba kuyobeka kupati muŋanda. Kulimvwisya mbuli kuti kuboola kambizi. Kumane milaka yamililo yatalika kulibonya amutwe aumwi waasikwiiya. Hena ulakonzya kuubona mulilo amuntu aumwi? Ino eeci caamba nzi?
Maleele aaya! Jesu wajokela kujulu kuli Baswaabo, eelyo watila muuya uusalala wa Leza kubatobeli bakwe. Hena ulicizyi muuya ooyu ncowabapa kucita? Boonse batalika kwaambaula mumilaka iindenyi-indenyi.
Bantu banji mu Jelusalemu bamvwa kuyobeka kube nkambizi kaboola, aboobo baboola kuzyi kubona cicitika. Bamwi bantu ibaboola kokuno kupobwe lyabana Isilayeli lya Pentekosite, bazwa kumasi aambi. Baile kwaankamana beenzu! Balimvwida beenzu mumulaka wabo basikwiiya kabaambaula zintu zibotu Leza nzyaabacitila.
Ibeenzu bati: ‘Bantu boonse aaba bazwa ku Galilaya. Ino bacikonzya buti kwaambaula milaka iindenyi-indenyi iizwa mumasi aakubanacisya?’
Pita lino waima kubapanduluda. Waamba cakoongolola kwaambila bantu mbuli Jesu mbwaakafwa akuti Jehova wakamubusya. Pita wati: ‘Lino Jesu uli kujulu kujanza lyalulyo lya Leza. Alimwi watila muuya uusalala ngwaakasyomezya. Nkakaambo kaako mwalibonena akulimvwida maleele aaya.’
Pita naamba makani aaya, bantu banji beetezyegwa kumvwa mbobakamucita Jesu. Babuzya bati: ‘Ino ncinzi ncotweelede kucita?’ Pita wabaambila kuti: ‘Mweelede kweempwa akubbapatizyigwa.’ Aboobo mubuzuba mbomunya oobo, bantu basika kuma 3,000 babbapatizyigwa akuba batobeli ba Jesu.