MAKANI 115

Paladaiso Mupya Anyika

LANGA zisamu eezyo zilamfwu, amaluba aataliboteli alimwi amalundu malamfwu. Hena taali abotu aawa? Langa mubabala nkwalya mujanza lyamwana. Langa basyuumbwa balede amahacci aimvwi mubwizu aalya. Hena tokonzyi kukkomana kukkala aŋanda iili mubusena buli boobu?

Leza uyanda kuti upone kukabe akutamani mupaladaiso anyika. Alimwi tayandi kuti kociswa-ciswa mbuli mbobaciswa bantu mazuba aano. Nkooku kusyomezya kwa Bbaibbele kuli baabo baya kukkala mupaladaiso mpya. Lilati: ‘Leza unakuli ambabo. Takukabi kabili lufwu nikuba kulila nikuba kuciswa. Zintu zyakaindi zyamaninina.’

Jesu uya kuyanda kuti kucinca ooku kubotu kwacitika ncobeni. Hena ulizyi nokuya kucitika? Ndileelyo aakumana kugusya bubi boonse abantu babi anyika. Koyeeya Jesu naakali anyika wakaponya bantu bakali kuciswa malwazi aamisyobo-misyobo alimwi wakabusya abafwide. Jesu wakacita eeci ikutondezya kuti uya kucicita nyika yoonse aakuba Mwami wabwami bwa Leza.

Koyeeya buyo mbokuya kubota mupaladaiso mpya anyika! Jesu kubikkilizya abaabo mbaasala, baya kulela anguwe kujulu. Baleli aaba bani kubalela kabotu bantu anyika cakuti boonse bani kukkomenyi. Atubone ncotweelede kucita kutegwa tube masimpe kuti Leza uya kutupa buumi butamani mupaladaiso yakwe mpya.

Ciyubunuzyo 21:3, 4; 5:9, 10; 14:1-3.