Cibalo 11

Johane Waubamba Mugwagwa

KWAINDA myaka iili 17 kuzwa ciindi Jesu naakali mwana wamyaka iili 12 kabuzya bamayi mutempele. Ncilimo camwaka wa 29 C.E., alimwi kuboneka kuti boonse baide kwaamba buyo zya munyina Jesu, Johane walo uukambauka mucisi coonse alimwi amunsi-munsi aa Mulonga wa Jordano.

Johane muntu uulamya mbuli mbwaboneka alimwi ambwaambaula. Masani aakwe ngaboya bwankamela alimwi usama lutambo lwacikanda mucibuno cakwe. Zilyo zyakwe ncisozi abuci bwamusokwe. Ino walo mulumbe wakwe? “Amweempwe, nkaambo kakuti Bwami bwakujulu buliswenede.”

Oyu mulumbe wabakonda baswiilizi bakwe. Ibanji baziba kuti bayandika kweempwa, nkokwaamba kuti bacince bukkale bwabo akuleka nzila zyabo zyabuumi bwamusyule akuzilanga kuti nzibyaabi. Lino bantu banji baboola kulinguwe kuzwa muminzi yoonse yeengelede Jordano alimwi akuzwa mu Jerusalemu, elyo wababbapatizya, kababbizya kunsi aamaanzi aa Jordano. Nkaambo nzi?

Johane ulababbapatizya bantu nkaambo balatondezya naa kuzumina kuti beempwa ncobeni zinyonyoono zyabo nzyobakacita kucizuminano ca Mulawo wa Leza. Aboobo naabona ba Farisi aba Saduki bamwi kababoola ku Jordano, Johane wabasinganya. Ulaamba, “Inywe nubana bacipile. . . Amuzyale micelo yakweempwa kwinikwini, nkabela mutayeeyi kwaamba mumyoyo yanu kuti, Tulijisi Abrahamu mbuli taateesu, pe, nkaambo ndamwaambila kuti Leza ulakonzya kusandula mabwe aya, abe bana bakwe Abrahamu. Lino beula lilibikidwe kale kumiyanda yamisamu, nkabela misamu yoonse iitazyali micelo mibotu ilatemwa akusowelwa mumulilo.”

Akaambo kakuti Johane waduma kapati, iba Juda batuma bapaizi aba Levi kulinguwe. Bamubuzya ategwa: “Nduweni?”

Johane wazumina kuti, “Endime Kristo pe.”

Bamubuzya ategwa, “Ino nduweni? Sena nduwe Eliya?”

Waingula ategwa, “Endime.”

“Sena nduwe musinsimi oyo?”

“Pe.”

Nkaambo kaako bamubuzisya kuti: “Ino kai nduweni? Twaambile kuti tukabalungulwide kabotu abo abakatutuma. Ulaamba buti?”

Johane wapandulula ategwa: “Ndime ijwi lyayooyo uuompolola munkanda uuti, Amululamike nzila ya-Jehova, mbubonya mbwaakaamba musinsimi Isaya.”

Bayanda kuziba balaamba: “Ino nkaambonzi ncobapatizya yebo, anooli toli Kristo naba Eliya, naba musinsimi oyo?”

Waingula ategwa: “Mebo ndabapatizya amaanzi. Akati kanu mpali omwe uuimvwi ngomutezi, nguwenya uuza munsi lyangu.”

Johane ubamba mugwagwa kwiinda mukucita kuti bantu babe amyoyo mibotu kutegwa bakamutambule Mesiya walo uuyooba Mwami. Kujatikizya Nguwe, Johane ulaamba: “Oyo uuza musule lyangu uli anguzu kwiinda ndime, nkabela mebo nsyeelede nikuba kuyumuna indyasyo zyakwe.” Mane Johane ulaamba akuti: “Uuza munsi lyangu ulandiinda, nkaambo wakaliko kale mebo nketanazyalwa!” (BT)

Aboobo mulumbe wa Johane wakuti, “Bwami bwakujulu buliswenede” caba cizibisyo kubuleya kuti mulimo wa Mwami uusalidwe aa Jehova, Jesu Kristo ulaafwaafwi kutalika. Johane 1:6-8, 15-28; Matayo 3:1-12; Luka 3:1-18; Incito 19:4.

▪ Mmuntu uli buti Johane?

▪ Nkaambo nzi ncabbapatizya bantu Johane?

▪ Nkaambo nzi Johane ncakonzya kwaambila kuti Bwami buliswenede?