LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • gt cibalo. 12
  • Ilubbapatizyo lwa Jesu

Kunyina vidiyo aawa mpomwasala.

Vidiyo yakaka kulila.

  • Ilubbapatizyo lwa Jesu
  • Muntu Mupati Kwiinda Iwakaponede
  • Makani Aakozyenye
  • Jesu Wabbapatizyigwa
    Jesu—Nenzila, Ngokasimpe, Mbobuumi
  • Johane Wamu Bbapatizya Jesu
    Bbuku Lyangu lya Makani Aamu Bbaibbele
  • Ncolwaamba Lubbapatizyo Lwanu
    Amukombe Leza Mwini-Mwini Uuli Alikke
  • Jesu Waba Mesiya
    Ziiyo Nzyomukonzya Kwiiya Kuzwa mu Bbaibbele
Amubone Azimwi
Muntu Mupati Kwiinda Iwakaponede
gt cibalo. 12

Cibalo 12

Ilubbapatizyo lwa Jesu

KAKWIINDIDE myezi iitandila kucisambomwi kuzwa ciindi naakatalika kukambauka Johane, Jesu uulaa myaka iili 30 lino, waboola kulinguwe ku Jordano. Kuzyoocita nzi? Sena nkuzyoomuswaya buyo? Sena Jesu uyanda buyo kuziba mbuli mulimo wa Johane mbuyaambele? Peepe, Jesu walomba Johane kuti amubbapatizye.

Mpoonya-mpoonya Johane wakazya ulaamba: “Ndime enjeelede kubapatizigwa kulinduwe, anukuti yebo weza kulindime?” Johane ulizi kuti imunyina, Jesu, Mmwanaa Leza uulibedelede. Johane wakasamba cakukkomana mwida lyabanyina ciindi Mariya kamitide Jesu naakabaswaya! Cakutadooneka, Elizabeta, banyina Johane beelede kuti bakazyoomwaambila makani aya. Alimwi beelede kuti bakamwaambila zyamulumbe wamungelo kujatikizya kuzyalwa kwa Jesu alimwi akulibonya kwabangelo kubeembezi busiku bwakazyalwa Jesu.

Aboobo Jesu tali mweenzu pe kuli Johane. Alimwi Johane ulizi kuti lubbapatizyo lwakwe taluli lwakubbapatizya Jesu pe. Ndwabaabo beempwa zinyonyoono zyabo, pele Jesu takwe cinyonyoono pe. Pele nokuba kuti Johane wakazya, Jesu wazumanana ategwa: “Akube boobo, nkaambo kakuti mbuboobo mbutweelede kuzulizya ziluleme zyoonse.”

Nkaambo nzi ncociluzi kuti Jesu abbapatizigwe? Nkaambo kakuti lubbapatizyo lwa Jesu tacili citondezyo cakweempwa zinyonyoono zyakwe pele ncakuti walipa ikucita kuyanda kwa Wisi. Jesu walimubezi pele lino ciindi casika cakuti atalike mulimo ngwaakamutuma Jehova Leza kuti azikucite anyika. Sena muyeeya kuti Johane ulangila kuti kulacitika cimwi cintu cikankamanisya amubbapatizya Jesu?

Johane ulaamba: “Oyo uwakandituma kuyoobapatizya amaanzi, walo wakandaambila kuti, Oyo ngoyoobona kuti Muuya waseluka alinguwe akumukala, ngonguwe uubapatizya a-Muuya Uusalala.” Aboobo Johane ulangila muuya wa Leza kuboola aliyooyo ngwabbapatizya. Nokuba boobo, antela tagambidwe kapati ciindi Jesu nazwa mumaanzi, Johane naabona “Muuya wa-Leza, ulaseluka mbuli inziba, uleza kulinguwe.”

Pele nkocili acimbi cacitika aciindi Jesu nabbapatizigwa. ‘Ijulu lyajaluka.’ Ino eci caamba nzi? Caamba kuti ciindi nali mukubbapatizigwa, wayeeya buumi mbwaakajisi kujulu katanaba muntunsi. Aboobo lino Jesu wabuyeeya buumi bwakwe kali mwana wa Jehova Leza wamuuya kubikkilizya azintu zyoonse nzyaakamwaambila Leza kacili kujulu katanaba muntunsi.

Kunze lyaboobo, aciindi calubbapatizyo lwakwe, ijwi kuzwa kujulu lilaamba: “Ngooyu mwanaangu uuyandika ngunkondelwa.” Ndijwi lyani elyo? Sena ndijwi lya Jesu nguwenya? Peepe! Ndilya Leza. Cilalibonya kuti Jesu Mwanaa Leza kutali kuti ngo Leza mbuli mbobaamba bamwi.

Nokuba boobo Jesu mmwanaa Leza muntunsi mbubwena bwakali muntu wakusaanguna Adamu. Siciiya Luka naakamana kupandulula lubbapatizyo lwa Jesu wakalemba kuti: “Jesu mwini naakatalika mulimo wakwe, wakali emyaaka iyati kabe makumi otatwe, mbwaakayeeyedwe wakali mwana a-Josefa, Josefa mwana a-Heli, . . . mwana a-Davida, . . . mwana a-Abrahamu, . . . mwana a-Nowa, . . . mwana a-Adamu, . . . mwana a-Leza.”

Mbubwena Adamu mbwaakali “mwana a-Leza” awalo Jesu mbubona. Jesu ngomuntu mupati wakaponede calo cilibonya notulanga-langa buumi bwakwe. Nokuba boobo, aciindi calubbapatizyo lwakwe, Jesu wanjila mukuyanzana kupya a Leza, waba Mwanaa Leza wamuuya. Cili mbuli kuti Leza lino wamwiita alimwi kujulu, kwiinda mukumutalisya munzila iiyoopa kuti akaabe buumi bwakwe kusika kutamani kwiinda mucituulo akaambo kabantu basinganizidwe. Matayo 3:13-17; Luka 3:21-38; 1:34-36, 44; 2:10-14; Johane 1:32-34; Ba-Hebrayo 10:5-9.

▪ Nkaambo nzi Jesu ncatali mweenzu kuli Johane?

▪ Mbwaanga kunyina cinyonyoono ncaakacita, nkaambo nzi ncabbapatizilwa Jesu?

▪ Ikweelana azintu nzyazi Johane kujatikizya Jesu, nkaambo nzi ncatakonzyi kugambwa ciindi muuya wa Leza nowamusikila Jesu?

    Chitonga Publications (1991-2024)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi