Cibalo 36
Ilusyomo lwa Silumamba
ICIINDI Jesu naapa Mulumbe wakwe waa Cilundu, ulisikide akati-kati mumulimo wakwe wakubuleya. Caambilizya kuti uceede buyo amwaka omwe amyezi illi fwuka naa kwiinda awo kuti amanizye mulimo wakwe anyika.
Lino Jesu wanjila mumunzi wa Kapernauma, ikuli mbuli kuti nkokucisiko camumilimo yakwe. Oku, bapati baba Juda basika kulinguwe akumukumbila. Batumwaa silumamba wa Roma iwamasi, muntu wamukowa umbi kutali waci Juda.
Imubelesi wasilumamba ngwayanda kapati uyanda kufwa akaambo kakuciswa elyo uyanda kuti Jesu amuponye mubelesi wakwe. Iba Juda bamukombelezyela silumamba balaamba: “Uleelede oyu kuti umucitile boobo, nkaambo ulayanda mukowa wesu, nguwe uwakatuyakila cikombelo cesu.”
Kakunyina akusowa ciindi, Jesu waunka ambabo. Nokuba boobo, bacisika buyo afwaafwi, silumamba watuma beenzinyina kuti bakati: “Mwami, utalikataazyi, nseelede kuti ukanjile muŋanda yangu, alimwi ndati nseelede kuboola kulinduwe.”
Elo nkulibombya kaka ooku ikwasilumamba uuzibide kulailila bamwi! Pele ambweni kumwi uyeeya Jesu akaambo kakuziba kuti mulawo ulakasya ba Juda kweendelana abatali ba Juda. Naba Petro wakati: “Nywebo nobeni mulizi mbokutondwa kumuntu mu-Juda kuti aswaangane awamasi, aboole kulinguwe.”
Ambweni akaambo kakutayanda kuti Jesu apegwe cisubulo cakutatobela cilengwa eci, silumamba watuma beenzinyina kuti bamulombele kuti: “Koamba ejwi buyo, mwanaangu [mubelesi] ulapona. Nkaambo amebo ndi muntu uulaililwa, ndilijisi basilumamba munsi lyangu. Ndaambila oyu kuti, Koya, kai ulainka. Ndaambila umwi kuti Koboola, kai ulaboola. Ndaambila muzike wangu kuti, Cita obu, kai ulacita.”
Azikumvwe boobu Jesu wagambwa kapati. Ulaamba: “Ndamwaambila, nsinabwene lusyomo ululi bobuya nomuba mu-Israyeli.” Naamana kuponya mubelesi wasilumamba, Jesu wabelesya ciindi nciconya eci ikwaamba mbuli bantu batali ba Juda mbobayootambula zilongezyo nzyobakaka ba Juda batakwe lusyomo.
Jesu ulaamba: “Banji bazoozwa kujwe akumbo, bazookala antoomwe a-Abrahamu a-Izaka a-Jakobo mu-Bwami bwakujulu, pele bana ba-Bwami bazoosowelwa mumudima waanze, nkabela oko kuyooba kulila akuluma ntwino.”
“Bana ba-Bwami bazoosowelwa mumudima waanze” mbaama Juda bakumubili ibatacitambuli coolwe ncobapegwa cakuba balelinyinaa Kristo. Abrahamu, Izaka a Jakobo baiminina bubambe bwa Leza bwa Bwami. Aboobo Jesu waamba mbuli bantu bamasi mbobayootambulwa kuti bakkale antoomwe “mu-Bwami bwakujulu.” Luka 7:1-10; Matayo 8:5-13; Incito 10:28.
▪ Nkaambo nzi ba Juda ncobamukombelezyela silumamba wamasi?
▪ Ncinzi cikonzya kutupanduluda silumamba ncaatamuzumizyila kunjila Jesu muŋanda yakwe?
▪ Ncinzi ncaamba Jesu amajwi aakwe aamamanino?