Cibalo 42
Jesu Wasinsa ba Farisi
JESU ulaamba, ikuti naa ninguzu zya Sataani nzyatanzya badaimona, nkokuti Sataani ulalilwisya mwini. Wazumanana ategwa, “Amwaambe kuti, Musamu mubotu, ayalo micelo yawo mibotu, nikuba kuti, Musamu mubi ayalo micelo yawo mibi, nkaambo kumicelo nkokuzibilwa musamu.”
Mbufwubafwuba ikupa mulandu wakuti mucelo mubotu wakutanda badaimona ulacitwa akaambo kakuti Jesu ubelekela Saatani. Ikuti naa mucelo kauli mubotu, musamu taukonzyi kuti kaubolede. Kulubazu lumbi, mucelo uubolede waba Farisi wakutamikizya kutakwe ankokuya alimwi akukazya Jesu kutakwe acisiko kutondezya kuti balo lwabo beni bali bolede. Jesu ulaamba: “Inywe nubana bacipile mbumuli babi mulakonzya buti kwaamba makani mabotu? nkaambo mulomo ulagwisya aata mumoyo.”
Mbwaanga majwi eesu atondezya ciimo camyoyo yesu, zintu nzyotwaamba zipa kuti kuzibwe bwini-bwini mbotubede. Jesu ulaamba: “Ndamwaambila kuti, ijwi isampu limwi alimwi ndibaamba bantu bazoobetekwa andilyonya mubuzuba bwalubeta. Nkaambo nkumajwi aako nkozoolulamisigwa nkabela nkumajwi aako nkozoopegwa mulandu.”
Nokuba kuti Jesu wacita milimo yanguzu, ibalembi aba Farisi balomba ategwa: “Mufundisi, tulayanda kubona citondezyo kulinduwe.” Nokuba kuti aaba baalumi bazwa ku Jerusalemu balakonzya kabatana libonena buya maleele aakwe, bumboni butakazyigwi buya nkobuli kujatikizya ngawo. Aboobo Jesu waambila basololi aba baci Juda ategwa: “Bantu basunu basizibi abasibwaamu balayandaula citondezyo, pele tabakoopegwa pe, nkutaamba kuti citondezyo ca-Jona musinsimi.”
Kapandulula ncocaamba eci, Jesu wazumanana kuti: “Jona mbwaakali mwida lyanswi impati mazuba otatwe isikati amasiku, mbuboobo alakwe Mwana a-Muntu mbazooba mumoyo wanyika mazuba otatwe isikati amasiku.” Naakamenwa answi Jona wakazikuzwa mbuli kuti wabusigwa buya aboobo Jesu usinsima kuti uyoofwa elyo mubuzuba bwatatu uyoobusigwa. Pele basololi baci Juda noliba ciindi nazyoobusigwa Jesu kumbele, balacikaka “citondezyo ca-Jona.”
Aboobo Jesu waamba kuti bantu baku Nineve ibakeempwa naakali kukambauka Jona bayooima mulubeta akupa mulandu ba Juda ibakaka Jesu. Mbubwena buyo, waamba makani aakozyenye aamwami mukaintu waku Seba wakeenda kuzwa kumamanino aanyika kuzooswiilila busongo bwa Solomoni elyo wakagambwa kuli nzyaakabona akumvwa. Jesu ulaamba: “Pele ano mpali umwi mupati kwiinda Solomoni.”
Mpoonya Jesu wapa cikozyanyo camuntu wazwisigwa muuya uusofweede. Nokuba boobo oyu muntu tazuzyi busena bwakwe azintu zibotu elyo ulanjilwa myuuya aimbi iili musanu aibili. Jesu ulaamba: “Mbuboobo mbukuzooba kubantu babi basunu.” Cisi cabana Israyeli cakalisalazidwe alimwi cakalibambuludwe—mbubwena mbuli kuzwa kwamuuya mubi kwakaindi kaniini buyo. Pele ikukaka kwabasinsimi ba Leza nkucakacita cisi eci kwalo kwakapa kuti bamukazye a Kristo lwakwe mwini, kutondezya kuti cili muciimo cibyaabi kwiinda kukusaanguna.
Kacaambaula boobu Jesu, banyina abanabokwabo basika baima mumabali-bali aankamu. Elyo umwi ulaamba: “Langa, banyoko abakwanu baliimvwi anze, balayanda kwaambaula ayebo.”
Jesu wabuzya ategwa: “Ino mbani bama? Mbani bakwesu?” Katambika janza kuli basikwiiya bakwe ulaamba: “Amulange, mbaaba bama abakwesu. Nkaambo umwi aumwi uucita luyando lwa-Taata uuli kujulu ngomukwesu amucizi wangu abama.” Munzila eyi Jesu utondezya kuti taciko makani ambwayanzene kapati abasazinyina, ulainda kuyanzana abasikwiiya bakwe. Matayo 12:33-50; Marko 3:31-35; Luka 8:19-21.
▪ Iba Farisi baalilwa buti kubotya “Musamu” antoomwe a ‘mucelo’?
▪ Ino “citondezyo ca-Jona” ninzi, alimwi cazyookakwa buti kumbele?
▪ Ino cisi ca Israyeli camumwaanda wamyaka wakusaanguna cakozyanya buti amuntu uulya wazwisigwa muuya mubyaabi?
▪ Ino Jesu wakukankaizya buti kuyanzana kwakwe abasikwiiya bakwe?