Cibalo 74
Ilulayo Kuli Marta a Malailile Kujatikizya Kupaila
ICIINDI Jesu nacita mulimo wakwe mu Judaya wanjila mumunzi wa Betaniya. Oku nkwakkala Marta, Mariya amwanookwabo Lazaro. Ambweni aba botatwe Jesu wakabaswaanganya kali mumulimo wakwe musyule elyo lino mulongwaabo wini-wini. Kufwumbwa naa cili buti, Jesu lino waunka kuŋanda ya Marta elyo watambulwa.
Marta uliyandide kucitila Jesu zintu zibotu nzyakonzya kucita. Masimpe nkulelekwa kapati ikuswaigwaa Mesiya uusyomezyedwe! Aboobo Marta wajata bubi kubamba cakulya cibotu kapati akucita zintu zimbi kutegwa kuswaya kwa Jesu kukondelezye alimwi kalikwaiyide.
Kulubazu lumwi, Mariya imwanookwabo Marta wakkala ansi kumatende aa Jesu akuswiilila makani aakwe. Nokwainda ciindi Marta waboola kuli Jesu ulaamba: “Omwami, sena tokwe amakani mwanaakwesu mbwaandisia endike mukubamba cakulya? Komwaambila azoondigwasye.”
Pele Jesu wakaka kwaamba cili coonse kuli Mariya. Pele walaya Marta akaambo kakubikkila kapati maanu kuzintu zyakumubili. Wamusinsa caluzyalo ategwa: “Marta, Marta, walikataazya akuyeeyesya zintu zinjizinji, anukuti iciyandika ncintu comwe.” Jesu waamba kuti takuyandiki kusowa ciindi kubamba zyakulya zinji. Icisyoonto buyo naa musyobo omwe nceciyandika.
Makanze aa Marta alikabotu; uyanda kuba simeenzu uusamausya. Pele akaambo kakulibilika kapati azintu zyakumubili, waindwa coolwe cakutambula malailile aazwa ku Mwanaa Leza! Aboobo Jesu wamanizya akuti: “Mariya walisalila caabilo cibotu ncatakooyoonyangwa.”
Mpoonya kuciindi cimbi, sikwiiya wa Jesu wabuzya ategwa: “Omwami, utwiisye kukomba, mbuli Johane mbwaakaiisya basikwiiya bakwe.” Kulalangilwa kuti oyu sikwiiya taakaliko mwaka omwe acisela wainda ciindi Jesu naakapa mupailo wacikozyanyo mu Mulumbe wakwe waa Cilundu. Jesu waindulula malailile aakwe pele wayaambele akupa cikozyanyo ikukankaizya mbokuyandika kuzumanana kupaila.
Jesu watalika ategwa: “Anooli umwi wanu uujisi mweenzinyina, eno wainka kulinguwe akati kamasiku wati, Mweenzuma, ndyaabila mikamu yotatwe, nkaambo mweenzuma umwi uwali mulweendo wasika kulindime, pele nsijisi cakumusomba, nkokuya uuli muŋanda avuwe kuti, Utandikataazyi, mulyango wajalwa kale, tuli abulo abana bangu, nsikonzya kubuka kukupa, ndamwaambila kuti, Naakaka kubuka kumupa mbwali mweenzinyina, nekubaboobo nkaambo kakukakatila kwakwe ulabuka amupe zyoonse nzyabula.”
Kwiinda mukukozyanisya oku, Jesu taambi kuti Jehova Leza talisungwide kwiingula nkombyo zyesu mbuli bwakacita mulongwe oyu mucaano. Peepe, pele utondezya kuti, ikuti naa mulongwe uutayandi ulamupa mweenzinyina uuzumanana kulomba, ino Taateesu wakujulu waluyando inga cainda aali! Aboobo Jesu wazumanana ategwa: “Aboobo ndamwaambila kuti, Amukumbile muzoopegwa, amuyandaule muzoojana, amukonkomone muzoojulilwa. Nkaambo umwi umwi uukumbila ulatambula, uuyandaula ulajana, uukonkomona ulajulilwa.”
Mpoonya Jesu wakozyanisya wisi mwana muntunsi uutalondokede sizibi ulaamba: “Alimwi nguuli wisi mwana akati kanu kuti mwanaakwe wakumbila nsima, sena ulamupa bbwe? Kuti wakumbila inswi, sena ulamupa nzoka, iitali nswi njiyonya na? Kuti wakumbila iji, sena ulamupa kabanze? Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?” Inzya, Jesu wapa kukulwaizya kuyumya-yumya kapati kwakuti tuzumanane kupaila. Luka 10:38–11:13.
▪ Nkaambo nzi Marta ncaalijaila boobu kukutaukila Jesu?
▪ Ncizi ncaacita Mariya, alimwi nkaambo nzi Jesu ncaamulumbaizya muciindi ca Marta?
▪ Ncinzi capa kuti Jesu aindulule malailile aakwe kujatikizya kupaila?
▪ Ino Jesu watondezya buti mbuli mbokuyandika kuzumanana kupaila?