Cibalo 79
Icisi Cakasoweka Pele Kutali Coonse
NOKWAINDA buyo ciindi cisyoonto kuzwa ciindi Jesu naali kubandika abantu babungene anze aŋanda yamu Farisi, bamwi bamwaambila “makani aaba-Galilaya, abulowa bwabo [mweendelezi waba Roma Pontiyo] Pilato mbwaakabuvwelanya azipaizyo zyabo.” Aba bana Galilaya ambweni mbambabo bakajaigwa ciindi zyuulu zyabama Juda nobakatondezya kutakkomana akaambo kanzila Pilato njaakabelesya mali kuzwa kuciyobwedo cakutempele kuti ayake mufwolo uuleta maanzi mu Jerusalemu. Aba baamba makani aya kuli Jesu ambweni baamba kuti bana Galilaya bakabaa mapenzi aya akaambo kamicito yabo beni mibyaabi.
Nokuba boobo, Jesu wabalulamika, wababuzya ategwa: “Sena muyeeya kuti ba-Galilaya abo bakali babi kwiinda ba-Galilaya boonse, mbobakafwa obo? Pe,” waingula Jesu. Mpoonya wabelesya kaambo aka kucenjezya bama Juda ategwa: “Mwatasanduka muyoofwidilila anywebo nyoonse.”
Kacizumanana, Jesu wayeeya imbi ntenda nyenzi, ambweni ayalo kuli mbwiiswaangene akuyaka kwamifwolo. Wabuzya ategwa: “Abaabo abakali kumi amusanu mubatatu abakawidwa ŋanda ndamfu yaku-Siloamu, iyakabajaya, sena muyeeya kuti abo bakali basimilandu kwiinda bantu boonse abakayakide ku-Jerusalemu?” Jesu ulaamba, peepe tabuli bubi bwabantu aaba bwakapa kuti bafwe. Pele bakasikilwa buyo “ziindi . . . zyamapenzi” zyalo izili kanjikanji nzyezileta ntenda zili boobu. Nokuba boobo, Jesu alimwi wabelesya ciindi eci kucenjezya ategwa: “Kuti mwatasanduka muyoofwidilila anywebo nyoonse.”
Mpoonya Jesu wayaambele kupa cikozyanyo ceelede kapandulula ategwa: “Muntu umwi wakali kujisi mukuyu uwakasimpidwe mumuunda wakwe, wakaboola kuzoolanga micelo kulinguwo, pele takiijene. Nkabela wakaambila mulimi kuti, Bona, myaaka yotatwe nkensika kuzoolanga micelo kulooyu mukuyu, pele nsiijani, uteme, usinkilanzi insi? Wakamuvuwa kuti, Omwami, uleke amwaaka uno, nkuulimine nkuubike bufumba. Kuti wazyala micelo ncibotu, kwalo kuti pe, uyooutema.”
Jesu wasoleka kwamyaka iinda kwiitatu kukomezya lusyomo akati kacisi caba Juda. Pele myaanda misyoonto buyo yabasikwiiya mbabakonzya kubalwa kuti micelo yamilimo yakwe. Lino mumwaka oyu wane wamulimo wakwe, wafwundumana, ikulimina akubikka mafwumba kwacikozyanyo kucisamu camukuyu caba Juda kwiinda mukusungwaala kukambauka akuyiisya mu Judaya alimwi amu Pereya. Pele kunyina cicitika! Icisi cakaka kusanduka aboobo cilangila kunyonyoonwa. Ibasyoonto buyo basyeede bamucisi mbobazumina.
Kuciinda buyo kaindi Jesu watalika kuyiisya mucikombelo mu Sabata. Okuya wabona mukaintu umwi wakoongomene musana akaambo kakupenzyegwa adaimona kwamyaka iili 18. Caluzyalo, Jesu wamwaambila kuti: “Bama, waangululwa kucilwazi cako.” Aambe boobo wabikka maanza alinguwe, woololoka ndilyona akutalika kulumbaizya Leza.
Nokuba boobo, mweendelezi wacikombelo wanyema. Ulaamba: “Kuli mazuba aali musanu mubumwi aakubeleka, amuboole mumazuba ayo, muponyegwe, mutabooli kubuzuba bwa-Sabata.” Aboobo mweendelezi ulazizumina nguzu zya Jesu zyakuponya pele wasinganya bantu akaambo kakuboola kuzikuponesyegwa mu Sabata!
Jesu waingula ategwa: “Nywebo nobasikuupaupa ameso, sena umwi umwi wanu tasungununi ŋombe yakwe niiba mbongolo yakwe ku-sabata, akwiitola kuyoonywa maanzi? Ayooyu mukaintu, mwana a-Abrahamu, uwakaangwa Saatani eyi myaaka iili kumi amusanu mwiitatu, sena takweelede kuti aangululwe kuliceeci caanzyo kubuzuba bwa-Sabata?”
Nobamvwa boobo, abo bakazya Jesu babaa nsoni. Nokuba boobo makamu aabantu babotelwa amilimo yoonse mibotu njebabona Jesu kacita. Mukwiingula Jesu waindulula zikozyanyo zyobile zyabusinsimi kujatikizya Bwami bwa Leza, ezyo zyaakaambide kali mubwato ku Lwizi lwa Galilaya ciindi citandila kumwaka omwe musyule. Luka 13:1-21; Mukambausi 9:11; Matayo 13:31-33.
▪ Nintenda nzi zyaambwa awa, alimwi nciiyo nzi Jesu ncaapa?
▪ Inga capandululwa buti cikozyanyo cijatikizya mukuyu uutazyali antoomwe akusoleka kucicita kuti cizyale?
▪ Ino mweendelezi watondezya buti kuzizumina inguzu zya Jesu zyakuponya, pele Jesu wayubulula buti busikuupaupa ameso bwamuntu oyu?