Cibalo 95
Iziiyo Kujatikizya Kulekana a Kuyanda Bana
JESU abasikwiiya bakwe bali mulweendo kuya ku Jerusalemu kupobwe lya Kwiindilila lyamu 33 C.E. Bakosola Mulonga wa Jordano akutola nzila iinda mucooko ca Pereya. Jesu wakali mu Pereya nsondo zisyoonto zyainda pele wakaitwa kuya ku Judaya nkaambo mulongwaakwe Lazaro wakali kuciswa. Nakacili mu Pereya ciindi eco, Jesu wakabandika aba Farisi kujatikizya kulekana elyo lino bakabusya kaambo alimwi.
Akati kaba Farisi kuli mizeezo yaandeene kujatikizya kulekana. Musa wakaamba kuti mukaintu ulakonzya kulekwa akaambo ka “cintu cuusya insoni mulinguwe.” Bamwi basyoma kuti eci caamba buyo bumambi. Pele bamwi “cintu cuusya insoni” bacilanga kuti cibikkilizya tulandu tusyoonto-syoonto. Aboobo ikusunka Jesu, iba Farisi babuzya ategwa: “Sena muntu uleelede kuleka mukaintu wakwe mukaambo kali koonse?” (BT) Basyomede kuti kufwumbwa ncatiiambe Jesu cilamunjizya mumapenzi kuba Farisi balo balaa mizeezo yaandeene.
Jesu wawiingula mubuzyo cabusongo, kataambi muzeezo uli woonse wabantunsi pele waamba matalikilo aabubambe bwalukwatano. Wabuzya ategwa: “Sa tamubalide kuti oyo iwakabalenga kuzwa kumatalikilo wakabacita baalumi abanakazi? Alimwi wakaamba kuti, Nkaambo kaako mwaalumi asie wisi abanyina, akakatile mukakwe, kuti aba bobile babe nyama yomwe. Lino tabacili bobile pe, baba nyama yomwe. Nkaambo kaako, abo mbaakakakatizya Leza muntu atabapambukanyi.”
Jesu watondezya kuti makanze aa Leza aakumatalikilo ngakuti banabukwetene bakakatilane cakuti tabalekani. Ikuti kakuli boobo ba Farisi baingula balaamba, “pele nkaambonzi Musa wakalailila kuti amupe lugwalo lwacilekanino, elyo amuleke?”
Jesu waingula ategwa: “Nkaambo kabuyumu bwamyoyo yanu ncaakamuzuminina Musa kuleka banakazi banu. Nekubaboobo kuzwa kumatalikilo teekwakali boobo.” Inzya, Leza naakabikka zyeelelo zini-zini zyalukwatano mumuunda wa Edeni, kunyina naakaamba kuti kube kulekana.
Jesu wazumanana kwaambila ba Farisi ategwa: “Ndamwaambila kuti umwi aumwi uuleka mukakwe akukwata umbi, nkutaamba nkaambo kakuvuula luzutu [kuzwa kubbala lya Cigiliki lyakuti por·neiʹa], waba sibwaamu.” Aboobo watondezya kuti por·neiʹa, icaamba kuvwuula kwini-kwini, nkakaambo kalikke kazuminidwe a Leza kuti inga kwaba kulekana.
Nobaziba kuti lukwatano lweelede kuba cintu citamani kalujisi buyo kaambo aka kanga kapa kulekana, basikwiiya cabapa kubuzya ategwa: “Kuti makani aamwaalumi amukakwe ali boobo tacili cibotu kukwata.” Kunyina kudooneka kuti muntu uuyanda kukwata weelede kuyeeyesya kuti lukwatano ncintu citamani!
Jesu wazumanana kwaamba kujatikizya kutakwata. Wapandulula ategwa kuli basankwa bamwi bakazyalwa kabali bazibe kabatakonzyi kukwata nkaambo mbubakazyalwa buya. Bamwi bakacitwa bazibe abantu, kwiinda mukulemanikwa kubusankwa. Mpoonya bamwi balalilesya kulombozya kukwata akukkomanina koonana kutegwa bape ciindi cinji kuzintu zya Bwami bwakujulu. Jesu wamanizya ategwa: “Oyo uukonzya kutambula [kutakwata] atambule.”
Lino bantu batalika kuleta twana kuli Jesu. Nokuba boobo basikwiiya bakalalila bana akubatanda, kakunyina akudooneka kabayanda kukwabilila Jesu kuti batamukatazyi azintu zitakwe ankoziya. Pele Jesu ulaamba: “Amuleke twana, tuze kulindime, mutatukasyi pe, nkaambo Bwami bwa-Leza mbubwabo bali boobo. Ncobeni ndamwaambila kuti, Umwi aumwi uutatambuli Bwami bwa-Leza mbuli kana, takooyoonjila mulimbubo pe.”
Zyabota ziiyo nzyaapa Jesu aawa! Ikutegwa tutambule Bwami bwa Leza, tweelede kwiiya kulicesya alimwi akuba bantu balaa buyiisye mbuli bana. Pele cikozyanyo ca Jesu cilatuyiisya ambokuyandika ikapati kubazyali ikubaa ciindi cakukkala abana babo. Jesu lino watondezya mbwatuyanda twana kwiinda mukutubweza mumaanza aakwe akutulongezya. Matayo 19:1-15; Deuteronomo 24:1; Luka 16:18; Marko 10:1-16; Luka 18:15-17.
▪ Mizeezo nzi yaandeene njobajisi ba Farisi kujatikizya kulekana, aboobo bamusunka buti Jesu?
▪ Ino Jesu wakweendelezya buti kusunka kwaba Farisi, alimwi ncinzi ncaati nkakaambo kalikke kakonzya kupa kuti kube kulekana?
▪ Nkaambo nzi basikwiiya ba Jesu ncobaambila kuti ncibotu kutakwata, alimwi malailile nzi Jesu ngaapa?
▪ Ino Jesu watuyiisya nzi kwiinda munzila njaalanganya twana?