Cibalo 103

Ikuswaya Tempele Alimwi

JESU abasikwiiya bakwe bazwaa kumana busiku bwatatu mu Betaniya kuzwa ciindi nobakasika kuzwa ku Jeriko. Lino nolyapasula zuba lyamu Muhhulo mu Nisani 10 lyabajana bali kale munzila kuya ku Jerusalemu. Jesu wafwa nzala. Aboobo naabona mukuyu ulaa matu waunka kuyoobona naa ulijisi nkuyu.

Imatu aacisamu eci akafwambaana nkaambo ciindi cankuyu mmuu June pele lino nkuumamanino buyo aa March. Pele kubaanga Jesu uyeeya kuti mbwaanga matu afwambaana, azyalo nkuyu zyeelede kufwambaana. Pele watyompwa. Amucenga matu alo aacipa kulibonya mbocitabede cisamu. Mpoonya Jesu wasinganya cisamu ategwa: “Kuzwa sunu kutabi uulya micelo kulinduwe lyoonse.” Imucito wa Jesu wazibwa buzuba bwatobela mafwumofwumo alimwi ancowaamba.

Kabacizumanana, Jesu abasikwiiya bakwe basika ku Jerusalemu. Waunka kutempele lyalo ndyaakalangide-langide kumazuba buzuba bwainda. Nokuba boobo, sunu wabweza ntaamu mbubwenya mbwaakacitide myaka yotatwe musyule ciindi naakaboolede kupobwe lya Kwiindilila mu 30 C.E. Jesu wabatandila anze abo boonse baulisya akuula mutempele alimwi watingamuna matafwule aabasikucincana mali azyuuno zyabaabo bauzya nkwilimba. Taazumizya naba muntu omwe uuyumwide cintu kuti ainde mutempele.

Kasinganya baabo bacincana mali alimwi abauzya banyama mutempele, ulaamba: “Sa takulembedwe kuti, Iŋanda yangu inooambwa kuti niŋanda yakukombela yamasi oonse? Anu nywebo mwiicita kuti ibe ikoba lyababbi.” Mbabbi nkaambo bayanda mali manji kuzwa kuli baabo batajisi nzila imbi pele kuula kuli mbabo banyama bayandika kubelesya kucipaizyo. Aboobo makwebo aya, Jesu waalanga kuti nkubba.

Ibapaizi basilutwe, balembi alimwi abamwi-bamwi bantu balupati-pati nobamvwa ncaacita Jesu, alimwi bayandaula nzila mbobanga bamujaya. Aboobo batondezya kuti mbantu batakonzyi kucinca. Pele tabazyi mbobanga bamunyonyoona Jesu nkaambo bantu boonse bamunamatila kuti bamuswiilile.

Kunze lyabama Juda, abalo Bamasi baboola kupobwe lya Kwiindilila. Aaba mbasandule, nkokwaamba kuti bakasandulwa kuya kucikombelo caba Juda. Iba Helene bamwi balo balibonya kuti mbasandule, lino basika kuli Filipo akulomba kuti babone Jesu. Filipo waya kuli Andreya ambweni kuyoobuzya kuti naa ikubonana kuli boobu kuli kabotu. Kulibonya kuti Jesu ucili kutempele kwalo nkobakonzya kumubona ba Helene.

Jesu ulizi kuti uceede buyo amazuba masyoonto aabuumi aboobo ciimo cakwe wacipandulula kabotu-kabotu ulaamba: “Ciindi casika ncati lemezegwe Mwana a-Muntu. Ncobeni ndamwaambila kasimpe, Kuti nseke yabulotwe yatawida mwivu, akufwida mumo, inookede buyo ilike, pele kuti yafwa, ilazyala zilyo zinji.”

Inseke yomwe yamaila taigwasyi kapati pe. Pele ino kuti yabikkwa mubulongo “yafwa” akuleka kuba nseke? Ilamena mpoonya akuba cikuba cizyala nseke zyamaila zinjaanji. Mbubwenya buyo Jesu muntu omwe buyo uulondokede. Pele kuti wafwa kasyomeka kuli Leza uba nzila yakuleta buumi butamani kuli baabo basyomeka bajisi muuya wakulyaaba mbuli ngwajisi. Aboobo Jesu ulaamba: “Oyo uuyandisya buumi bwakwe ulabusweekelwa, awalo uusulide buumi bwakwe ansi ano, uyoobuyobola kubuumi ubutamani.”

Cilalibonya kuti Jesu taliyeeyi buyo lwakwe mwini nkaambo naamana ulaamba: “Muntu uuli buti uundibelekela andicilile, eno nkwembede mebo, awalo simulimo wangu uyooba nkuko. Muntu uundibelekela awalo Taata uyoomulemeka.” Bwabota bulumbu bwakutobela Jesu akumubelekela! Mbulumbu bwakulemekwa a Taata kuyoobelekelaamwi a Kristo mu Bwami.

Kayeeya mapenzi mapati alufwu lucisa ilumulindila, Jesu wazumanana ategwa: “Eno muuya wangu ulipengede, nandilatinzi? Taata, undivune kuciindi cino.” Nokwali mbwaaelebwa kaka mapenzi aamulindila! Pele kunyina mbubwenya mbwaamba ategwa: “Ncendazida kuciindi cino.” Jesu ulabuzuminizya bubambe boonse bwa Leza, kubikkilizya alufwu lwakwe lwacipaizyo. Matayo 21:12, 13, 18, 19; Marko 11:12-18; Luka 19:45-48; Johane 12:20-27.

▪ Nkaambo nzi Jesu ncalangila kujana nkuyu nokuba kuti tacili ciindi cankuyu?

▪ Nkaambo nzi Jesu ncaita bantu abo bauzya mutempele kuti ‘mbabbi’?

▪ Muunzila nzi Jesu mwali mbuli nseke yamaila yafwa?

▪ Ino Jesu ulimvwide buti akaambo kakupenga alufwu izimulindilila?