Cibalo 104
Ijwi lya Leza Lyamvwigwa Ciindi Catatu
JESU kacili mutempele, walikupengana akaambo kalufwu lwalo ndwayelede kufwa lino-lino. Ncabikkilide kapati maanu ndizina lya Usyi mbuli mboliyoojatikizigwa aboobo wakomba ategwa: “Taata, lemya zina lyako.”
Ucicita buyo boobo, kwazwa jwi pati kujulu iliti: “Ndalilemya kale, ndiyoolilemya alimwi.”
Makamu aabantu baimvwi munsi-munsi bakankamana. Bamwi batalika kwaamba kuti: “Angelo waamba awalo.” Bamwi bataminina ategwa yazuma. Pele mmasimpe, ngu Jehova Leza waamba! Nokuba boobo eci tacili ciindi cakusaanguna ijwi lya Leza nolyamvwigwa kujatikizya Jesu.
Iciindi calubbapatizyo lwa Jesu imyaka yotatwe acisela musyule, Johane Mubbapatizi wakamumvwa Leza kaamba kujatikizya Jesu ategwa: “Ngooyu mwanaangu uuyandika ngunkondelwa.” Mpoonya alimwi ciindi cimwi nolyakamana pobwe lya Kwiindilila lyamusyule Jesu naakasanduka kumpelaa Jakobo, Johane alimwi a Petro bakamvwa Leza kati: “Ngooyu mwanaangu uuyandwa ngwinkondelwa, amuswiilile nguwe.” Alimwi lino kwaciindi catatu, mu Nisani 10, kakuceede mazuba one kuti lufwu lwa Jesu lube, ijwi lya Leza lyamvwigwa alimwi. Pele cino ciindi Jehova waambaula kutegwa makamu-makamu aabantu bamvwe!
Jesu wapandulula ategwa: “Eli Jwi talizidide ndime, lyazida ndinywe.” Lyasinizya kuti masimpe Jesu Mwanaa Leza, Mesiya uusyomezyedwe. Jesu wazumanana ategwa: “Eno inyika ino ilabetekwa, eno mwami wenyika ino uyootandwa.” Ibuumi bwa Jesu bwakusyomeka businizya kuti Saatani Diabolosi mwami wanyika eyi, uyandika ‘kutandwa,’ anyonyoonwe.
Kaamba ziyoocitika lwaakwiinda lufwu lwakwe luboola Jesu ulaamba: “Mebo kuti ndasumpulwa kuzwa ansi, ndilakwela bantu boonse kulindime.” Ilufwu lwakwe taluli lwakuzudwa pe, nkaambo kwiinda mulindulo uyookwela bamwi kulinguwe kutegwa bakabe abuumi butamani.
Pele nkamu yakazya ategwa: “Tulimvwide mumulao kuti Kristo unookede lyoonse, eno yebo uamba buti kuti Mwana a-Muntu ulyeelede kusumpulwa? Ino Mwana a-Muntu nguni?”
Nokuba kuti kuli bumboni boonse obu kubikkilizya akumvwa jwi lya Leza mwini, ibanji tabasyomi pe kuti Jesu Mwanaa Muntu ncobeni, Mesiya uusyomezyedwe. Pele mbubwenya mbwaakacitide myezi iili cisambomwi yainda ku Pobwe lya Zilawo, alimwi Jesu walyaamba kuti “mumuni” aboobo wakulwaizya baswiilizi bakwe kuti: “Nomucijisi mumuni amusyome mumuni, kuti muzoobe bana bamumuni.” Naamana kwaamba zintu ezi, Jesu wazwa wayuba ambweni nkaambo kakuti buumi bwakwe buli muntenda.
Ikutasyoma kwaba Juda muli Jesu kuzuzikizya majwi aa Isaya kujatikizya ‘koofwazya meso aabantu akuyumya myoyo yabo kutegwa batasanduki kuti bakapone.’ Isaya wakabona lubuwa lwakujulu lwa Jehova mucilengaano kubikkilizya a Jesu mubulemu bwakwe katanaba muntunsi kali a Jehova. Pele bama Juda, ikuzuzikizya cakalemba Isaya, cankazi, bakaka bumboni bwakuti Oyu ngo Mufwutuli wabo uusyomezyedwe.
Kulubazu lumwi, ibeendelezi banji (balo balibonya kuti Mbaasinkuta Mpati yaba Juda) bamusyoma Jesu. Nikodemo alimwi a Josefa waku Aremateya mbabili bali akati kabeendelezi aba. Pele beendelezi aciindi awa, baalilwa kutondezya lusyomo lwabo ikuyoowa kutandwa azyuuno zyabo zyakucikombelo. Elo mbubalibuzya coolwe bali boobu!
Jesu wazumanana kwaamba kuti: “Oyo uundisyoma, tasyomi ndime, pele wasyoma nguwe uwakandituma. Awalo uundibona, ubona nguwe uwakandituma. . . . Anooli uumvwa majwi aangu, pele taabambi, nsimubeteki pe, nkaambo nsizide kubeteka nyika, pele kunununa nyika. . . . . Ijwi ndendakali kwaamba, ndendilyo iliti kamubeteke mubuzuba bwakumamanino.”
Ikuyandisya nyika yabantu nkokwakapa kuti Jehova atume Jesu kutegwa abo bamusyoma bafwutuke. Ikuti naa bantu bayoofwutulwa kuyoozibwa kwiinda mukubona naa balamumvwida Leza zintu nzyaakalailila Jesu kuti aambe. Ilubeta luyoocitwa “mubuzuba bwakumamanino” anoolela Kristo mu Myaka iili Cuulu.
Jesu waamanizya kwiinda mukwaamba kuti: “Nsilyaambilide ndemwini, pele Taata uwakandituma, nguwakandilailila mbwenjeelede kwaamba ambwenjeelede kukanana. Alimwi ndilizi kuti kulailila kwakwe mbobuumi ubutamani, nkaambo kaako makani ngeŋamba, ndaamba mbubonya mbwaakandyaambila Taata.” Johane 12:28-50; 19:38, 39; Matayo 3:17; 17:5; Isaya 6:1, 8-10.
▪ Mpaaziindi zili zyotatwe ijwi lya Leza mpolyakamvwigwa kujatikizya Jesu?
▪ Ino musinsimi Isaya wakabubona buti bulemu bwa Jesu?
▪ Mbaani beendelezi ibamusyoma Jesu, pele nkaambo nzi ncobatalitondezyi cantangalala?
▪ Ino “buzuba bwakumamanino” ninzi, alimwi zinzi zyobayoobetekelwa bantu?