Cibalo 108
Baalilwa Kumuteya Jesu
AKAAMBO kakuti Jesu walikuyiisya mutempele alimwi wazwaa kwaambila basinkondonyina basicikombelo zikozyanyo zyotatwe iziyubulula bubi bwabo, iba Farisi bakalala aboobo basola kumuteya kutegwa aambe kaambo katipe kuti aangwe. Babamba kakole elyo batuma basikwiiya babo antoomwe abasicipani cabasikutobela Heroda kuti bamoonge.
Aba baalumi balaamba: “Mufundisi, tulizi kuti uli musyomesi, ulaiisya inzila ya-Leza cakusinizya, tolikataazyi bantu, nkaambo tolangilili busyu bwabantu. Lino twaambile mboyeeya. Sa cililuleme kupa Kaisara mutelo na pe?”
Jesu taaongwa pe akulumbaizya oku kwakulicengeezya. Waziba kuti, kuti aambe kuti ‘Peepe takuli mumulawo naa kuti takululeme kupa mutelo’ ulabaa mulandu wakubukila cisi ca Roma. Pele kuti waamba kuti ‘Inzya mweelede kupa mutelo’ bama Juda balo basulaika kweendelezyegwaa bama Roma balamusula. Aboobo waingula ategwa: “Ino nkaambonzi mulandisunka nubasikuupaupa ameso? Amunditondezye mali aabutelo.”
Nobamuletela isheleni, wabuzya ategwa: “Ino ncicani cikozyanyo eci, abulembo obu?”
Baingula ategwa: “Nzizya-Kaisara.”
“Mbuboobo amupe Kaisara zintu zya-Kaisara, akwa-Leza zintu zya-Leza.” Aba baalumi nobamvwa kwiingula kwa Jesu kwabusongo, bagambwa. Elyo bainka bamusiya.
Nobabona kuti ba Farisi baalilwa kumujanina mulandu Jesu, iba Saduki balo baamba kuti taakwe bubuke bwabafwu, baboola kulinguwe akubuzya ategwa: “Mufundisi, Musa wakaamba wati, Na muntu wafwa tajisi bana, munyina uleelede kukwata mwanakazi wakwe akuzyalila munyina bana. Lino kulindiswe kakuli babunyina bali musanu ababili. Nkabela mutaanzi wakakwata, wakafwa, katajisi bana, wakasiila munyina mwanakazi wakwe. Alakwe wabili wakacita mbubonya, awatatu, kusikila kumusanu ababili. Lino nibakamana kufwa boonse, mwanakazi wakafwa alakwe. Ino kububuke bwabafu nguli akati kabo bali musanu ababili uzooba amwanakazi oyo? nkaambo bakalimukwete boonse buyo?”
Mukwiingula Jesu ulaamba: “Sa embo mbombubo obo ncimwasweekela, nkaambo tamuzi malembe niziba inguzu zya-Leza? Ikuti ciindi ncibayoobuka kubafu, tabakwati nikuba kukwatizigwa pe, pele bali mbuli baangelo bakujulu. Pele kumakani aakubuka kwabafu, sa tamunabalide mubbuku lya-Musa, kunkani yaciteu, mbwaakamwaambila Leza, wakati, Ndime Leza wa-Abrahamu, a-Leza wa-Izaka, a-Leza wa-Jakobo? Tali Leza wabafu pe, ngwabaumi. Anu ncobeni mwasweeka.”
Alimwi makamu-makamu aabantu bagambwa kukwiingula kwa Jesu. Nobaba balembi bamwi bazuminizya ategwa: “Mufundisi, waamba kabotu.”
Lino ba Farisi nobabona kuti Jesu wabamana mate ba Saduki, baboola kulinguwe antoomwe. Ikuzumanana kumusunka, umwi mulembi akati kabo wabuzya ategwa: “Mufundisi, nguli mulazyo mupati wamu-Mulao?”
Jesu waingula ategwa: “Mulazyo mupati ngooyu, Komvwa, yebo Israyeli, Jehova ngu-Leza wesu, Jehova ngumwi. Uleelede kuyandisya Jehova Leza wako amoyo wako woonse, [abuumi bwako boonse, Cipangano Cipya 1996 (Lenje)] akukuyeeya kwako koonse, akunguzu zyako zyoonse. Awabili ngooyu, Koyandisya mweenzinyoko mbubonya mboliyanda omwini. Taakwe mulazyo umbi uuinda yeeyi.” Mane Jesu wayungizya akuti: “Amilazyo eyi yobile mpaanzikidwe Mulao woonse abasinsimi.”
Oyu mulembi wazuminizya ategwa: “Mufundisi, ncobeni waamba kabotu mbowati ngumwi buyo, taakwe umbi pele alike du. Alimwi, kuyanda nguwe amoyo woonse akukuyeeya koonse akunguzu zyoonse, akuyanda mweenzinyoko mboliyanda omwini, kulainda kutenta mutunta uuenzene wacipaizyo azituuzyo zyoonse.”
Naabona kuti mulembi waingula camaanu, Jesu wamwaambila kuti: “Toli kule a-Bwami bwa-Leza.”
Kwamazuba otatwe lino—mu Nsondo, mu Muhhulo alimwi amuli Bwabili—Jesu walikuyiisya mutempele. Ibantu bali kumuswiilila cakukkomana, pele basololi bacikombelo bayanda kumujaya pele kusika aciindi awa makanze aabo atyompekezyegwa. Matayo 22:15-40; Marko 12:13-34; Luka 20:20-40.
▪ Nkakole nzi nkobabamba ba Farisi kuti bamuteye Jesu, alimwi ncinzi cinga cacitika kuti wapa bwiinguzi bwakuti Ii naa peepe?
▪ Ino Jesu waatyompya buti makanze aba Saduki aakumoonga?
▪ Nkusunka nzi akumbi ba Farisi nkobacita kuli Jesu, alimwi ncinzi cacitika?
▪ Muciindi camulimo wakwe wamamanino mu Jerusalemu, mazuba ongaye ngaaiisya Jesu mutempele, alimwi bantu balimvwa buti?