Cibalo 109
Jesu Wasinsa Basikumukazya
JESU wabazinga mpoceela basololi bacikombelo basikumukazya cakuti bayoowa kumubuzya ambi makani. Aboobo walo lwakwe watola ntaamu ikuyubulula kubula luzibo kwabo. Wabuzya ategwa: “Ino muyeeyanzi aa-Kristo? mwana wani?”
Iba Farisi baingula ategwa: “Nguwa-Davida.”
Nokuba kuti Jesu takaki kuti Davida nguwisi wa Kristo naa Mesiya munzila yakumubili, Jesu wabuzya ategwa: “Lino nkaambonzi Davida mumuuya [ku Intembauzyo 110] ulamwaamba Mwami? Wati, Jehova wakaambila mwami wangu kuti, kala kululyo lwangu, mane ndazike basinkondonyoko munsi azituta zyako. Kuti Davida ulamwaamba mwami, ino mwanaakwe buti?”
Iba Farisi baumuna buyo nkaambo tabamuzyi Kristo naa munanike mubwini. Mesiya tali muntu simukowa buyo wa Davida mbuli ba Farisi mbokuboneka kuti mbobasyoma pele wakaliko kujulu alimwi mmupati kuli Davida naa Mmwami wakwe.
Lino kalangide kumakamu aabantu akuli basikwiiya bakwe, Jesu wabacenjezya kujatikizya balembi aba Farisi. Mbwaanga aba bayiisya Mulawo wa Leza, “balakala acuuno ca-Musa” Jesu wakulwaizya ategwa: “Zintu zyoonse nzibamulailila amuzicite akuzijatisya.” Pele wayungizya ategwa: “Mutaciti mbuli incito zyabo, nkaambo balaamba buyo anukuti tabaciti pe.”
Mbaasikuupaupa ameso aboobo Jesu wabasinsa munzila iikozyenye aanjakabelesya ciindi naakali kulya muŋanda yamu Farisi myezi iili mbwiibede yainda. Ulaamba: “Nkabela milimo yabo yoonse balaicita kuti beebelwe kubantu.” Alimwi wapa zikozyanyo kaamba kuti:
“Balakomezya mafilakateri aabo.” Otu tukomo tusyoonto-syoonto itubikkwa ankumo naa kukwaanza tujisi zibeela zyone zya Mulawo: Kulonga 13:1-10, 11-16; alimwi a Deuteronomo 6:4-9; 11:13-21. Pele ba Farisi balaikomezya nsaizi yatukomo otu ikutegwa bantu babone kuti mbasungu ku Mulawo.
Jesu wazumanana kwaamba kuti “[balaa]lampya maaya aazikobela zyabo.” Kubbuku lya Myeelwe 15:38-40 ibana Israyeli balaililwa kubamba maaya kuzikobela zyabo, pele aabo ba Farisi balaalampya kwiinda aabamwi boonse. Zyoonse zintu zilacitwa munzila yamambonwa! Jesu ulaamba: “Balayandisya kukkala azyuuno zyabulemu.” (BT)
Cuusisya ncakuti abalo basikwiiya bakwe mwini bajatikizigwa mukulombozya bulemu kuli boobu. Aboobo Jesu walailila ategwa: “Pele nywebo mutaitwi kuti mwiiyi, nkaambo mulijisi mwiiyi omwe, nywebo nyoonse muli babunyina. Alimwi mutaiti muntu naba omwe ansi aano kuti Taata, nkaambo mujisi Uso omwe, ooyo uuli kujulu. Alimwi mutaitwi kuti basololi, nkaambo mujisi musololi omwe, ooyo uuli ngo [Kristo].” (BT) Basikwiiya beelede kulilesya kulombozya kuba bataanzi! Jesu walailila ategwa: “Mupati akati kanu uzooba mulanda wanu.”
Mpoonya waamba mulongo wamapenzi aali kubalembi aba Farisi, kaindulula kubaamba kuti mbaasikuupaupa ameso. Ulaamba, “[Ba]lajalila Bwami bwakujulu kubusyu bwabantu.” Alimwi ‘balalya imbono zyabamukabafu, akukomba itololongo cakuupaupa ameso.’
Jesu ulaamba: “Maawe inywe nubeenzyi boofu.” Wabasinganya ba Farisi akaambo kakutalemeka zyakumuuya kwalo ikubonwa kwiinda mulwaandaano ndobaamba caambaambe. Mucikozyanyo balaamba, ‘kuti naa umwi wakonkezya tempele ukonka cabuyo, pele kuti umwi wakonkezya ingolida yatempele ulaa mulandu.’ Kwiinda mukubikkila kapati maanu kungolida yatempele kwiinda mbobacita kuzintu zyakumuuya zyakubusena bwakukomba kuyubulula boofu bwabo.
Mpoonya mbubwenya mbuli mbwaakacitide musyule, Jesu wabasinganya ba Farisi akaambo kakutabikkila maanu ku “makani mapati aa-Mulao . . . , nkukuti lubeta aluzyalo alusyomo” kakuli babikkila maanu kupa cimanyakumi naa cibeela cakkumi cazisyu zitako ankoziya.
Jesu waamba ba Farisi kuti “[m]beenzyi boofu, mulaminununa insenya, inkamele mulaimena.” Insenya balaliminununa muwaini wabo ikutali buyo kuti nkaambo nkauka pele balacita obo akaambo kakuti talisalali. Pele ikusulaika makani mapati aa Mulawo nkobacita kulikozyenye akumena nkamele, imunyama uulangwa kuti awalo ulisofweede. Matayo 22:41–23:24; Marko 12:35-40; Luka 20:41-47; Levitiko 11:4, 21-24.
▪ Nkaambo nzi ba Farisi ncobaumunina ciindi Jesu naababuzya kujatikizya ncaakaamba Davida ku Intembauzyo 110?
▪ Nkaambo nzi ba Farisi ncobakomezyela tukomo twabo twa Malembe amaaya aazikobela zyabo?
▪ Mmalailile nzi Jesu ngaapa basikwiiya bakwe?
▪ Nkwaandaanya nzi nkobaamba caambaambe ba Farisi, alimwi Jesu wabasinganya buti akaambo kakutabikkila maanu kumakani mapati?