Cibalo 114
Mulalilo wa Ciibalusyo
NAAMANA kusanzya zituta zyabaapostolo bakwe, Jesu wazubulula lugwalo lwa Intembauzyo 41:9, ulaamba: “Ooyo ngwelya aawe mutiba omwe wandibukila.” (BT) Mpoonya naakatazigwa kapati mumoyo wapandulula ategwa: “Umwi wanu uyoondyaaba.”
Ibaapostolo bausa kapati elyo umwi aumwi waambila Jesu ategwa: “Sa ndime?” Awalo Judase Iskariote wasangana kubuzya. Johane uulandabede munsi lya Jesu kutafule, wayaama acamba ca Jesu akumubuzya ategwa: “Omwami, nguni?”
Jesu waingula ategwa: “Nguumwi wabaabo bali ikumi ababili. Nguwenya ngutusunsa awe mumutiba. Nkaambo Mwana a-Muntu ulainka mbubonya mbukulembedwe anguwe, pele mayo kuliyooyo uucitya kuti Mwana a-Muntu aabwe. Anu buyo nocili cibotu kumuntu oyo kuti naatakazyalwa.” Kuzwa waawo, Saatani wamunjila Judase alimwi, wamulya coolwe akaambo kabubi bwaba mumoyo wakwe. Kumbele masiku ngaonya ayo, Jesu waamba Judase cakweelela kuti “wakeelede kunyonyooka.” (BT)
Lino Jesu waambila Judase ategwa: “Eco ncocita cifwanzaanye.” Kunyina mwaapostolo waciteelela ncaamba Jesu. Bamwi beezezya kuti mbwaanga Judase nguujisi nkomo yamali, Jesu umwaambila kuti: “Kaule ezyo nzotwabula zyapobwe,” naa kuti aunke akape bacete zintu zimwi.
Naazwa Judase, Jesu watalisya kusekelela kupya naa ciibalusyo abaapostolo bakwe basyomeka. Wabweza mukamu, walumba, wakomona wabaabila, ulaamba: “Amubweze, mulye.” Wapandulula ategwa: “Ngooyu mubili wangu uupedwe ndinywe, amukacite obo kuti mukandiyeeye.”
Umwi aumwi naalya mukamu, Jesu wabweza nkomeki yawaini, ilibonya kuti njane iibelesyegwa kupobwe lya Kwiindilila. Walumba alimwi akubaabila, wabaambila kuti banywe wati: “Nkomeki eeyi ncecizuminano cipya ca Leza, ciyumizigwa akukunka kwabulowa bwangu, akaambo kanu.” (BT)
Aboobo eci, nciibalusyo calufwu lwa Jesu. Mwaka amwaka mu Nisani 14 ceelede kwiindulukwa mbubwena Jesu mbwaamba, mukumuyeeya. Ciyooyeezya baabo basekelela nzyacitila bantu Jesu a Usyi wakujulu kuti banunuke kuzwa kukusinganizigwa kwalufwu. Kuba Juda ibaba basikutobela Kristo, ikusekelela kuyoobweza busena bwapobwe lya Kwiindilila.
Icizuminano cipya icitalisigwa kubeleka abulowa bwa Jesu butikide cibweza busena bwacizuminano ca Mulawo cakaindi. Jesu Kristo ngomwiiminizi akati kambazu zyobile—kulubazu lumwi Jehova Leza elyo kulilumwi, Mbanakristo bananikidwe aamuuya ibali 144,000. Kunze lyakulekelela zibi, icizuminino cipa kuti kubambwe musyobo wakujulu wabapaizi abami. Matayo 26:21-29; Marko 14:18-25; Luka 22:19-23; Johane 13:18-30; 17:12; 1 Ba-Korinto 5:7.
▪ Mbusinsimi nzi bwa Bbaibbele mbwaazubulula Jesu kujatikizya umwi mweenzinyina, alimwi wabupandulula buti?
▪ Nkaambo nzi baapostolo ncobausa, alimwi umwi aumwi wabuzya buti?
▪ Ino Jesu wamwaambila kucita nzi Judase, pele baapostolo bamwi baamvwa buti malailile aya?
▪ Nkusekelela nzi nkwaatalisya Jesu ciindi Judase naazwa, alimwi kulaa mulimo nzi?
▪ Nimbunga nzi zili mucizuminano cipya, alimwi cizuminano eci cacita nzi?