Ciiyo 9
Babelesi ba Leza Beelede Kusalala
Nkaambo nzi ncotweelede kusalala munzila zyoonse? (1)
Ino caamba nzi kusalala munzila yakumuuya? (2)
kusalala mukulilemeka? (3) kusalala mumizeezo? (4) kusalala kumubili? (5)
Nkwaambaula kwamusyobo nzi kusofweede nkotweelede kutantamuka? (6)
1. Jehova Leza ulasalala alimwi ulisetekene. Bakombi bakwe uyanda kuti kabazumanana kusalala—munzila yakumuuya, mukulilemeka, mumizeezo alimwi akumubili. (1 Petro 1:16) Kusalala kumeso aa Leza ncintu ciyandika kusola canguzu. Tukkede munyika iisofweede. Alimwi tuli mukulwana atumpenda twesu twakuyanda kucita cilubide. Pesi tatweelede kutyompwa pe.
2. Kusalala Kwakumuuya: Kuti katuyanda kubelekela Jehova, tatukonzi kuzumanana ziyiisyo naa ziyanza zili zyoonse zyabukombi bwakubeja. Tweelede kuzwa mubukombi bwakubeja akutabugwasilizya munzila iili yoonse pe. (2 Ba-Korinto 6:14-18; Ciyubunuzyo 18:4) Twamana kwiiya kasimpe kajatikizya Leza, tweelede kucenjela kuti tutacengwi abantu bayiisya zyakubeja.—2 Johane 10, 11.
3. Kusalala Kwakulilemeka: Jehova uyanda kuti bantu bakwe kabalilemeka mbuli Banakristo ciindi coonse. (1 Petro 2:12) Ulabona zyoonse nzyotucita, noziba zyamaseseke. (Ba-Hebrayo 4:13) Tweelede kukutantamuka kutalilemeka kujatikizya koonana alimwi amicito iisofweede yanyika eyi.—1 Ba-Korinto 6:9-11.
4. Kusalala Kwamizeezo: Kuti mizeezo yesu twiizuzya zisalala, izibotu, inga tunoolilemeka kabotu. (Ba-Filipi 4:8) Pele kuti twazumanana kuyeeya zintu zisofweede, ciyootupa kucita micito iisofweede. (Matayo 15:18-20) Tweelede kutantamuka misyobo yazyakulikondelezya izinga zyasofwaazya mizeezo yesu. Tulakonzya kuzuzya mizeezo yesu azintu zisalala kwiinda mukwiiya Jwi lya Leza.
5. Kusalala Kwakumubili: Akaambo kakuti baiminina Leza, Banakristo beelede kwiibamba kiisalala mibili yabo alimwi azyakusama. Tweelede kusamba kumaanza twamana kubelesya cimbuzi, alimwi tweelede kusamba mbubwena notutana kulya naa kujatauka cakulya. Kuti kamutakwe bubambe bwacimbuzi, tubi tweelede kuzikkwa. (Deuteronomo 23:12, 13) Kusalala amubili kulagwasya kupona kabotu. Munzi wa Munakristo weelede kuba wabulondo alimwi uusalala moonse mukati aanze. Weelede kulibonya akati kabuleya kuti ncikozyanyo cibotu.
6. Majwi Aasalala: Babelesi ba Leza lyoonse beelede kwaamba zyamasimpe. Babeji tabakanjili mu Bwami bwa Leza pe. (Ba-Efeso 4:25; Ciyubunuzyo 21:8) Banakristo tababelesyi majwi mabi. Tabaswiilili nokuba kwaamba masesya aakutukila naa zyaano zyacisapi pe. Akaambo kakwaambaula zyamaanu, balaandeene kumilimo naa kucikolo alimwi amubuleya.—Ba-Efeso 4:29, 31; 5:3.
[Zifwanikiso izili apeeji 18, 19]
Babelesi ba Leza beelede kusalala munzila zyoonse