Ciiyo 15
Kugwasya Bambi Kucita Kuyanda kwa Leza
Nkaambo nzi ncomweelede kwaambila bambi zintu nzyomwiiya? (1)
Mbaani mbomunga mwaambila makani mabotu aaya? (2)
Ino kulilemeka kwenu inga kwabajatikizya buti bambi? (2)
Ndilili nomunga mwakambauka antoomwe ambungano? (3)
1. Mbumwataana waawa, mwaiya zintu zinji zibotu kuzwa mu Bbaibbele. Luzibo oolu lweelede kumupa kuti musumpule bube bwenu bwa Bunakristo. (Ba-Efeso 4:22-24) Luzibo luli boobu ncintu ciyandika kutegwa mukajane buumi butamani. (Johane 17:3) Nokuba boobo abambi balayandika kumvwa makani mabotu kutegwa abalo bakafwutuke. Boonse Banakristo beni-beni beelede kupa bukamboni kubantu bambi. Ooyu mmulawo wa Leza.—Ba-Roma 10:10; 1 Ba-Korinto 9:16; 1 Timoteo 4:16.
2. Mulakonzya kutalikila ali baabo mbomubambene limwi kubaambila zintu zibotu nzyomwiiya. Amuzyaambe kubanamukwasyi, beenzinyoko, basicikolonyoko, ababelesinyoko. Amube aluse akukkazika moyo nomucita boobu. (2 Timoteo 2:24, 25) Kamuyeeyede kuti bantu bafwini kulanga mbuli muntu mbwalilemeka kwiinda mbobaswiilila ncaamba. Aboobo kulilemeka kabotu kulakonzya kucita bambi kuti baswiilile mulumbe ngomubaambila.—Matayo 5:16; 1 Petro 3:1, 2, 16.
3. Muciindi, inga mwaakweelela kutalika kuya kukukambauka antoomwe ambugano ya Bakamboni ba Jehova nyinzi. Eeyi nintaamu mpati mukusumpuka kwenu. (Matayo 24:14) Ino inga cabota kaka kuti mwakonzya kugwasya umwi muntu kuba mubelesi wa Jehova akujana buumi butamani!—1 Ba-Tesalonika 2:19, 20.