Paradaiso Ilaafwaafwi!

Izintu zibyaabi izili mukucitika lino anyika zitondezya kuti Paradaiso ilaafwaafwi. Ibbaibbele lyakasinsima kuti tuzyoolibonena ziindi zikatazya kwaakusyaala ciindi cisyoonto buyo kuti nyika ibe Paradaiso. Lino tukkede kuciindi nozili mukucitika zintu zili boobo! Nzeezi zintu zimwi Ibbaibbele nzyolyakasinsima kuti zyakali kuzyoocitika:

Inkondo zipati. “Cisi cizoolwana acisinyina, abwami buzoolwana abwaminyina.” (Matayo 24:7) Ibusinsimi obu bwazuzikizigwa ncobeni. Kuzwa mumwaka wa 1914, kwacitika nkondo zyanyika zyobile alimwi ankondo zinji ziniini-niini. Ituulunzuma twabantu bajaigwa munkondo eezi.

Ikuvwula kwamalwazi. Kwakali kuzyooba “zilwazi mumasena aandeene.” (Luka 21:11) Sena eci cacitika ncobeni? Inzya. Ibulwazi bwakkansa, ibulwazi bwamoyo, kakweekwe, ntuntumaanzi, bulwazi bwasikalileke (AIDS) alimwi amalwazi aambi ajaya tuulunzuma twabantu tuli mbotubede.

Ikubulilana kwazyakulya. Inyika yoonse mbwiizulwa kuli bantu ibanyina cakulya cikkwene. Ituulunzuma tuli mbotubede twabantu balafwa anzala mwaka amwaka. Eci ncitondezyo cimbi cakuti Paradaiso ilaafwaafwi. Ibbaibbele lyaamba kuti: “Inzala iyookola.”—Marko 13:8.

Mizuzumo yanyika. “Kuzooba . . . mizuzumo yanyika mumasena aansininsini.” (Matayo 24:7) Acalo eci cazuzikizigwa kuciindi cesu. Ibantu ibainda kukaulunzuma komwe bafwa mumizuzumo yanyika yacitika kuzwa mu 1914.

Bantu babi. Ibantu bakali kuzyooba “basimuyanda mali” “[a]basikuliyanda.” Bakali kuzyooba ‘basikuyandisya misalo yaansi kwiinda Leza.’ Ibana bakali kuzyooba baabo “batamvwi bamawisi.” (2 Timoteo 3:1-5) Sena tamuzumini kuti sunu nkobali ibantu banji ibali boobo? Tabamulemeki Leza pe, alimwi balabapenzya aabo ibasoleka kwiiya makani aa Leza.

Milandu. Alimwi kwakali ‘kuzoovwula milandu.’ (Matayo 24:12) Cakutadooneka mulazumina kuti milandu yaindila kwiinda mbuli mboyakabede myaka yamusyule. Ibantu koonse-koonse balalibilika kubbidwa akweenwa naa kucisigwa.

Zintu ezi zyoonse zitondezya kuti Bwami bwa Leza bulaafwaafwi. Ibbaibbele lyaamba kuti: “Mwabona ezi zintu kuti zilacitika, amuzibe kuti Bwami bwa-Leza buli afwaafwi.” (Luka 21:31) Ino Bwami bwa Leza ninzi? Nimfwulumende ya Leza yakujulu iiyooleta Paradaiso anyika ino. Bwami bwa Leza mbobuyoobweza busena bwamfwulumende zyabantunsi.—Daniele 2:44.