Mbomunga Mwajana Cikombelo Cakasimpe

Ikuti kamuyanda kuba balongwe ba Leza, mweelede kuba mucikombelo ncakkomanina Leza. Jesu wakati ‘ibakombi’ bakasimpe bakali kuyoomukomba Leza “mubwini.” (Johane 4:23, 24) Kuli buyo nzila yomwe iiluzi yakukomba Leza. (Ba-Efeso 4:4-6) Icikombelo cakasimpe cisololela kubuumi butamani, pele cikombelo cakubeja cisololela kulunyonyooko.—Matayo 7:13, 14.

Mulakonzya kucizyiba cikombelo cakasimpe kwiinda mukulangilila basicikombelo eco. Mbwaanga Jehova mmubotu, ibakombi bakwe bakasimpe abalo beelede kuba bantu babotu. Mbubwenya icisamu camafwuleenke icibotu mbocizyala mafwuleenke mabotu, icikombelo cakasimpe cijisi bantu babotu.—Matayo 7:15-20.

Balongwe ba Jehova balalilemeka kapati Bbaibbele. Balizyi kuti Ibbaibbele lyakazwa kuli Leza. Imakani ngolibandika balaatobela akwaacita kuti ayendelezye maumi aabo, amanizye mapenzi aabo alimwi akubagwasya kwiiya makani aa Leza. (2 Timoteo 3:16) Balasoleka kucita ncobakambauka.

Balongwe ba Jehova balayandana. Jesu wakatondezya luyando lwakwe kubantu kwiinda mukubayiisya makani aa Leza alimwi akwiinda mukuponya baabo ibakali kuciswa. Abalo abo ibali mucikombelo cakasimpe balatondezya kuti balabayanda bantu bambi. Mbubwenya mbuli Jesu, kunyina nobabasampaula bacete naa ibamusyobo uumbi. Jesu wakati ibantu bakali kuyoobazyiba basikwiiya bakwe kwiinda mukubona luyando lwakali kunooli akati kabo.—Johane 13:35.

Balongwe ba Leza balalilemeka zina lya Leza, ilya Jehova. Ikuti muntu umwi wakaka kubelesya zina lyanu, sena muntu oyo inga kacinooli mulongwe wanu ngomuyandisisya? Peepe! Notujisi mulongwe, tulalibelesya izina lyakwe alimwi twaamba zintu zibotu kuli bamwi kujatikizya mulongwe oyo. Aboobo aabo ibayanda kuba balongwe ba Leza beelede kunoobelesya izina lyakwe alimwi akwaamba makani aajatikizya nguwe kuli bamwi. Eco Jehova ncayanda kuti tucite.—Matayo 6:9; Ba-Roma 10:13, 14.

Balongwe ba Leza bayiisya bantu kujatikizya Bwami bwa Leza mbubwenya bwakacita Jesu. Bwami bwa Leza nimfwulumende yakujulu iiyoopa kuti nyika ibe paradaiso. Balongwe ba Leza balatola lubazu mukwaambila bamwi makani mabotu aa Bwami bwa Leza.—Matayo 24:14.

Bakamboni ba Jehova balasoleka kuba balongwe ba Leza. Balalilemeka Ibbaibbele alimwi balayandana akati kabo. Balalibelesya akulilemeka izina lya Leza alimwi bayiisya bamwi kujatikizya Bwami bwa Leza. Bakamboni ba Jehova mbabali mucikombelo cakasimpe sunu anyika.