Cibalo 8
‘Ikulwana Amyuuya Mibi’
1. Nkaambo nzi milimo yamyuuya mibi ncotweelede kwiibikkila maano?
IBANTU banji balaamba cakusampaula kabakazya kuti kuli myuuya mibi. Pele aaya taali makani aakusobanina pe. Tacikwe makani naa bantu balasyoma oobo naa pe, imyuuya mibi nkwiili alimwi ilasoleka kubalwana bantu boonse. Ibakombi ba Jehova abalo balijatikizidwe. Ikwaamba masimpe, mbabalwanwa kapati. Imwaapostolo Paulo ulatucenjezya kukaambo aaka kaamba kuti: “Inkondo njitulwa tiiensi yakulwana abantu balya maila, pe, njakulwana abeendelezi [batalibonyi] abami [bamunyika] abasinguzu bamumudima waansi ano, tulalwana amyuuya yabubi iili mumyeenya yakujulu.” (Ba-Efeso 6:12) Mumazubeesu, ikulwanwa kuzwa kumyuuya mibi kwaindilila kwiinda lyoonse nkaambo Saatani wakawisigwa ansi kuzwa kujulu alimwi ulikalade kapati, mbwaanga ulizi kuti ciindi ncacijisi ncisyoonto.—Ciyubunuzyo 12:12.
2. Mbuti mbotunga twacikonzya kuzunda myuuya iilaanguzu kwiinda bantu?
2 Sena cilakonzyeka kuzunda nkamu zyamuuya zyilaanguzu kwiinda bantu? Inzya, pele nkwiinda mukubaa lusyomo lumaninide muli Jehova. Tweelede kumuswiilila alimwi akumvwida caamba Jwi lyakwe. Kwiinda mukucita boobo, tulakonzya kulikwabilila kumalwazi, akutalika kulilemeka munzila yeelede alimwi akutabaa mizeezo iicitikila baabo bali mubweendelezi bwa Saatani.—Jakobo 4:7.
Bami Bamunyika Ibakkala Mujulu
3. Ino mbaani Saatani mbakazya kapati, alimwi munzila nzi?
3 Jehova ulatupandulwida kabotu-kabotu mbozibede zintu munyika kweelanaa mbwazibona kuzwa kujulu. Wakapa mwaapostolo Johane cilengaano mwalo Saatani mwaakatondezyegwa kali mbuli “Simwaaba mupati uusalalisya mbuli mulilo.” Ikuti naakali kukonzya, wakalilibambilide kunyonyoona Bwami bwa Leza bwabu Mesiya mbobwakali kuzoozyalilwa buyo kujulu mu 1914. Naakakakilwa kucita boobo, Saatani wakatalika kubakazya kapati baiminizi ba Bwami oobo bakali aanyika. (Ciyubunuzyo 12:3, 4, 13, 17) Ino mbuti Saatani mbwaakali kuyooyilwana nkondo eeyi? Nkwiinda mubantu bakwe bamwiiminina.
4. Nguni uupa nguzu kumfwulumende zyabantu, alimwi ino tuzyi buti oobo?
4 Kuzwaawo Johane wakatondezyegwa cinyama cakajisi mitwe iili ciloba ameja aali kkumi, icinyama cakajisi nguzu zyakweendelezya “misyobo yoonse amikowa yoonse amyaambo yoonse amasi oonse.” Icinyama eeco ciiminina bweende boonse bwatwaambo twacisi munyika yoonse. Johane wakaambilwa kuti “Simwaaba [Saatani Diabolosi] wakamupa inguzu zyakwe acuuno cakwe abwami bunji.” (Ciyubunuzyo 13:1, 2, 7) Masimpe, Saatani nguupa nguzu alimwi abweendelezi kumfwulumende zyabantu. Aboobo, kweelanaa mbwaakalemba mwaapostolo Paulo, ‘bami bamunyika’ ibeni-beni “[m]myuuya yabubi iili mumyeenya yakujulu” iili mukweendelezya mfwulumende zyabantu. Boonse ibayanda kukomba Jehova beelede kubumvwisya bupanduluzi boonse bwamakani aaya.—Luka 4:5, 6.
5. Nkuli nkubabungikwa beendelezi bazisi mazubaano?
5 Nokuba kuti baleli bazisi banji balyaamba kuti mbakombi, kunyina cisi nociba comwe cilibombya kubulelo bwa Jehova naa ku Mwami ngwabikkide Jesu Kristo. Boonse balwanina buyo kuzumanana kubweendelezi bwabo. Sunu, kweelanaa mbocitondezya cibalo icili kubbuku lya Ciyubunuzyo, “myuuya yabadaimona” ili mukubungika baleli bazisi “kunkondo yabuzuba bupati bwa-Leza Singuzuzyoonse” ya Harmagedoni.—Ciyubunuzyo 16:13, 14, 16; 19:17-19.
6. Nkaambo nzi ncokuyandika kucenjela kutegwa tutayungwi mukusala bweende bwa Saatani?
6 Buzubaa buzuba, bantu balajatikizigwaa mazwanga aamutwaambo twacisi, aabukkale bwabantu, aamakwebo alimwi amubukombi, alo aali mukwaandaanya bantu. Mumazwanga aaya, cilidumide kubantu kuba kulubazu lumwi lwacisi, mube munkamu iibelesya mwaambo umwi naa ciinga cabantu ooko nkobazulilwa kwiinda mumajwi naa mumicito. Noliba leelyo bantu nobatajatikizidwe mumazwanga amwi, kanjikanji balijana kuti bali mukusala lubazu lomwe kwiinda lumwi akati kankamu. Tacikwe makani kufwumbwa naa mmuntu antela ninkamu njobasala, ino nguni mubwini ngobali mukugwasilizya? Ibbaibbele lilaamba cakusalazya kuti: “Nyika yoonse yeendelezyegwaa mubi.” (1 Johane 5:19, NW) Aboobo, ino mbuti muntu mbwakonzya kweeleba kuyungwa antoomwe abantu boonse? Ccita buyo kuti cakumaninina wasala Bwami bwa Leza alimwi akutatola lubazu naaceya mumazwanga aacitika munyika.—Johane 17:15, 16.
Inzila Zyabucenjezu zya Mubi
7. Mbuti bucenjezu bwa Saatani mbwacita mbobulibonya mukubelesya bukombi bwakubeja?
7 Kuzwa kaindi, Saatani wali kubasampaula alimwi akubapenzya bantu kutegwa abazandule kubukombi bwakasimpe. Alimwi wali kubelesya nzila zikatazya kuzyiba, nkokuti micito yalucengo alimwi anzila zyabucenjezu. Cabucenjezu wabikka bantu banji mumudima usiya mbi kwiinda mukubelesya bukombi bwakubeja, ikubapa kuyeeya kuti babelekela Leza. Akaambo kakubula luzibo lwini-lwini lwa Leza alimwi aluyando lwakasimpe, balakonzya koongelezyegwa akukomba kwamasalamuzi naa kukkomanisyigwaa milimo iigambya. (2 Ba-Tesalonika 2:9, 10) Pele tulacenjezyegwa kuti nokuba kuti tukkede akati kabaabo ibakali mubukombi bwakasimpe, “bamwi bayookuzwa kulusyomo, bakagame kumvwa myuuya yakweena amafundisyo aabadaimona.” (1 Timoteo 4:1) Ino eeco cakali kuyoocitika buti?
8. Mbuti Saatani mbwakonzya kutoongelezya mubukombi bwakubeja nokuba kuti kaindi twakali kukomba Jehova?
8 Cabucenjezu, Diabolosi ubelesya kukompama kwesu. Sena muntu tucizumanana kumuyoowa aino? Ikuti kakuli boobo, tulakonzya kuzundwa akusinikizyigwa kuzwa kubasazima naa basimukoboma kuti tutole lubazu mumicito yabukombi bwakubeja. Sena tulalisumpula? Ikuti kakuli boobo, tulakonzya kucimwa ciindi notwalaigwa naa ciindi bamwi nobatazuminizyi mizeezo yesu. (Tusimpi 15:10; 29:25; 1 Timoteo 6:3, 4) Muciindi cakucinca nzila njotulanga zintu kutegwa yeendelane acikozyanyo ca Kristo, tulakonzya kupakamika matwi eesu kulibaabo banga ‘batubotelezya kumvwa’ kwiinda mukwaamba kuti kubala buyo Bbaibbele alimwi akulilemeka nzeziyandika zyalo. (2 Timoteo 4:3) Kuli Saatani tacikwe makani naa twasanganaa nkamu iimbi yabukombi naa tulizumenene abukombi motubede, icipati kulinguwe nkuti katutakombi Jehova munzila njatutondezya kwiinda mu Jwi lyakwe alimwi ambunga.
9. Ino mbuti Saatani cabucenjezu mbwabelesya kulombozya kwakoonana kuti azuzikizye makanzaakwe?
9 Alimwi Saatani calucengo woongelezya bantu kukkutya kulombozya kwabo nkobabona kuti kuliluleme kwiinda mukubelesya nzila zibyaabi. Wacita oobo kwiinda mukulombozya koonana. Kwiinda mukutalilemeka kwaambwa mu Bbaibbele, ibantu banji munyika babona koonana kwabantu batakwetene kuba mbuli cintu cakulikondelezya ciluleme naa inzila yakusinizya kuti mbapati. Alimwi ino mbuti kujatikizya baabo bakwetene? Ibanji bacita bumambi. Noliba leelyo nokutakwe kutasyomeka mucikwati cabo, ibantu banji bayanda kulekana naa kwaandaana kutegwa batalike kukkalaa muntu uumbi. Inzila zyabucenjezu nzyabelesya Saatani ziyeeme aakuyunga bantu kuti kabapona buumi bwakulikondelezya lino, akutabikkila maanu kuzintu ziyootobela ziyakujatikizya bantu boonse bambi alimwi ikapati abulongwe bwabo a Jehova alimwi a Mwanaakwe bwalo buyakuba kukabe kutamani.—1 Ba-Korinto 6:9, 10; Ba-Galatiya 6:7, 8.
10. Muunzila nzi Saatani mwasola kunyonganya mizeezo yesu mukutalilemeka alimwi amukulwana?
10 Ikulombozya kumbi bantu nkobacita, nkulikondelezya. Iciindi kulikondelezya nokucitwa munzila mbotu kulakonzya kukatalusya kumubili alimwi amumizeezo. Pele ino tulimvwa buti ciindi Saatani cabucenjezu nabelesya ziindi zyakulikondelezya kusola kutulubya kuyeeya Leza? Mucikozyanyo, tulizyi kuti Jehova ulibusulide bwaamu alimwi akulwana. Sena tulazumanana kweebelela kakunyina kubweza ntaamu ciindi nokutondezyegwa zintu zili boobo mumabbasikopo, mumapulogilamu aacipekupeku alimwi amuzisobano? Alimwi kamuyeeya kuti Saatani uyoobona kwaamba kuti zintu zili boobo zyazumanana kusofwaala mbwaayabuswena mamanino alunyonyooko lwakwe, mbwaanga “bantu babi banooyoobija akubijila limwi. Bayooena bamwi alimwi akweenwa lwabo beni.” (2 Timoti 3:13, Ci) Aboobo tweelede kuzumanana kupakamana kujatikizya nzila zya Saatani.—Matalikilo 6:13; Intembauzyo 11:5; Ba-Roma 1:24-32.
11. Muunzila zili buti naaba muntu uuzyi kasimpe mwakonzya kucegwa kujatikizya mizimo ikuti katapakamene?
11 Alimwi tulizyi kuti aabo batola lubazu mumicito iili yoonse mbuli yamizimo, kusonda, bulozi naa kusola kukananaa bantu bafwide, balamusesemya Jehova. (Deuteronomo 18:10-12) Ikuti katuyeeya boobo lyoonse, kunyina notuya kuyeeya zyakubuzya makani kubaŋanga naa ikubatamba mumaandeesu kuti bacite milimo yabo yabudaimona. Pele sena inga twabaswiilila aabo ikuti balibonya aazipekupeku zyesu naa aamincini yakkompyuta iibelesyegwa mukubala akweebelela (Internet)? Nokuba kuti kunyina notunga twazumina kusilikwa amuŋanga, sena inga twaanga mwaneesu katambo kajisi musamu mucibuno naa munsingo katusyoma kuti kalakonzya kumukwabilila kuntenda? Mbwaanga tulizyi kuti Bbaibbele lilakasya kusinganya bamwi anguzu zyamasalamuzi, sena inga twazumizya simabibo kutweendelezya?—Ba-Galatiya 5:19-21.
12. (a) Ino nyimbo zibelesyegwa buti kuti zitupe kuyeeya makani ngotuzyi kuti mabyaabi? (b) Ino mbuti nsamino yamuntu, kubamba masusu naa ŋambawido yakwe mbozikonzya kutondezya kulombozya nkwajisi kulibaabo bajisi bukkale Jehova mbwatayandi? (c) Ncinzi ciyandika kulubazu lwesu ikuti katutayandi kucegwa munzila zya Saatani zyabucenjezu?
12 Ibbaibbele lyaamba kuti bwaamu amisyobo yoonse yabusofwaazi tazyeelede nikuba kwaambwa akati kesu (katujisi makanze mabyaabi). (Ba-Efeso 5:3-5) Pele ino mbuti kuti makani aali boobo kaali munyimbo zikondelezya alimwi zyeenzya mubili? Sena inga twatalika kutobelezya kwiimba nyimbo zyaamba koonana kwabantu batakwetene, izikulwaizya kubelesya misamu iikola mukulikondelezya alimwi amicito imwi mibyaabi? Nokuba kuti tulizyi kuti tatweelede kwiiya bukkale bwabantu batola lubazu muzintu zili boobo, sena tulasola kwiiya nsamino zyabo, naa kubamba masusu mbuli mbabo alimwi aŋambawido yabo? Elo nzyabucenjezu alimwi nzyabumpelenge kaka nzila nzyabelesya Saatani mukoongolezya bantu kuti batobele kuyeeya kwakwe kubyaabi! (2 Ba-Korinto 4:3, 4) Ikutegwa tutacegwi munzila zyakwe zyabucenjezu, tweelede kweeleba kutobela ziyanza zyabantu bamunyika. Tweelede kuti lyoonse katuyeeyede mbobabede ‘beendelezi bamumudima waansi aano’ alimwi akukulwana canguzu kuyunga kwabo.—1 Petro 5:8.
Ibalibambilide Kuti Babe Basikuzunda
13. Mbuti mbocinga cakonzyeka kuli umwi aumwi wesu akutalondoka nkotujisi ikuzunda nyika njayendelezya Saatani?
13 Katanafwa, Jesu wakaambila baapostolo bakwe kuti: ‘Amulimbe myoyo, ndaizunda nyika.’ (Johane 16:33) Abalo bakali kukonzya kuba basikuzunda. Nokwakainda myaka iisika ku 60, imwaapostolo Johane wakalemba kuti: “Nguni oyo uuzunda nyika cita oyo uuzumina kuti Jesu ngu-Mwana wa-Leza.” (1 Johane 5:5) Lusyomo luli boobo lulatondezyegwa notutobela milawo ya Jesu alimwi akusyoma mu Jwi lya Leza mbubonya mbwaakacita Jesu. Ino ncinzi cimbi ciyandika? Tweelede kukakatila kumbungano ooko nkwali Silutwe. Ciindi notwabisya, tweelede kweempwa cakusinizya alimwi akulomba kulekelelwa kuli Leza kwiinda mucituuzyo ca Jesu. Munzila eeyi, tacikwe makani akutalondoka alimwi akulubizya kwesu, andiswe tulakonzya kuba basikuzunda.—Intembauzyo 130:3, 4.
14. Amubale Ba-Efeso 6:13-17, mpoonya alimwi amubelesye mibuzyo amagwalo aapedwe mumuncali ooyu kubandika mpindu zijanwa kucilwanyo cimwi acimwi cakumuuya.
14 Ikutegwa tuzunde, tweelede kusama “zilwanyo zyoonse zya-Leza,” akutaubya-ubya cibeela cili coonse cijatikizidwe. Amujalule Bbaibbele lyanu kubbuku lya Ba-Efeso 6:13-17 akubala mbolizipandulula zilwanyo eezyo. Mpoonya, kwiinda mukwiingula mibuzyo iili ansaawa, amulange-lange mbomunga mwagwasigwa alukwabililo lujanwa kucilwanyo cimwi acimwi.
‘Zikungu zyaangidwe lutambo lwalusinizyo’
Nokuba kuti tulakonzya katukazyi kasimpe, mbuti ciiyo cicitwa lyoonse, kuzinzibala kuyeeya kujatikizya kasimpe ka Bbaibbele alimwi akujanika kumiswaangano mbokunga kwatukwabilila? (1 Ba-Korinto 10:12, 13; 2 Ba-Korinto 13:5; Ba-Filipi 4:8, 9)
“Cikwabilizyo cabululami [cakucamba]”
Nguni uulaa ceelelo eeci cabululami? (Ciyubunuzyo 15:3)
Amutondezye kutatobela zyeelelo ziluleme zya Jehova mbokukonzya kubikka umwi muntenda yakumuuya. (Deuteronomo 7:3, 4; 1 Samuele 15:22, 23)
‘Zituta zisamikidwe Makani Mabotu aaluumuno’
Ino mbuti mbocili cikwabililo kulindiswe kubelesya maulu eesu lyoonse kuya kukukananina bantu kujatikizya bubambe bwa Leza bwakuleta luumuno? (Intembauzyo 73:2, 3; Ba-Roma 10:15; 1 Timoteo 5:13)
“Intobo yalusyomo”
Ikuti katujisi lusyomo lutazungaani, ncinzi ncotunga twacita ciindi notuli muciimo cikonzya kutupa kuzumbauzya naa kuyoowa? (2 Bami 6:15-17; 2 Timoteo 1:12)
“Ingoani yalufutuko”
Mbuti bulangizi bwalufwutuko mbobugwasya kweeleba kunjila mukooze kakuciindizya kulibilika kujatikizya lubono? (1 Timoteo 6:7-10, 19)
‘Ipanga lya-muuya’
Mpaali mpotweelede kuyaama lyoonse ciindi swebo naa bamwi nobatulwana munzila yakumuuya? (Intembauzyo 119:98; Tusimpi 3:5, 6; Matayo 4:3, 4)
Ino ncinzi cimbi ciyandika kapati kutegwa tuzunde munkondo yakumuuya? Ceelede kucitwa ziindi zinji buti? Mbaani beelede kubikkilizyigwa? (Ba-Efeso 6:18, 19)
15. Mbuti mbotunga twabweza ntaamu mpati munkondo yakumuuya?
15 Mbotuli basikalumamba ba Kristo, tuli cibeela campi mpati iili mukutola lubazu munkondo yakumuuya. Ikuti twazumanana kupakamana alimwi akuzibelesya kabotu zilwanyo zyoonse zyankondo nzyatupede Leza, kunyina notuyoonyonyoonwa munkondo eeyi. Muciindi caboobo, tuyooyumya-yumya babelesima mukubelekela Leza. Tuyoolibambilida limwi alimwi tuyooyandisya kuzwidilila mukuzunda, tuyoozumanana kumwaya makani mabotu aa Bwami bwa Leza bwabu Mesiya, imfwulumende yakujulu yalo Saatani njakazya kapati.
Mubandi Wakwiinduluka
• Nkaambo nzi bakombi ba Jehova ncobatatoli lubazu naaceya mumazwanga aacitika munyika?
• Ninzila zili buti zimwi zyabucenjezu nzyabelesya Saatani kunyonyoona Banakristo munzila yakumuuya?
• Mbuti zilwanyo zyakumuuya nzyapede Leza mbozitukwabilila munkondo yesu yakumuuya?
[Zifwanikiso izili apeeji 76]
Imasi ali mukubungikwa kunkondo ya Harmagedoni