Cibalo 13
Inkamu Mpati Kumbele lya Cuuno ca Jehova ca Bwami
1. (a) Ino ncinzi ceelede kucitika kubabelsi ba Leza bakuciindi kabutana talika Bunakristo alimwi aba 144,000 kabatana tambula cipego cabo? (b) Ino ncinzi ciyoocitika“[ku]nkamu impati” yabantu ibapona kuciindi ecino camamanino?
IBABELESI ba Leza basyomeka kuzwa kuli Abelo kusikila kuli Johane Mubbapatizi bakabikka mulimo wakucita kuyanda kwa Leza mubusena butaanzi mubuumi bwabo boonse. Nokuba boobo, boonse bakafwa alimwi balindila kuti bakabusyigwe kubuumi munyika mpya ya Leza. Ibali 144,000, aabo bayoolela antoomwe a Kristo mu Bwami bwa Leza bwakujulu, abalo baleelede kufwa kabatana kutambula cipego cabo. Pele, ibbuku lya Ciyubunuzyo 7:9 litondezya kuti kumazuba aakumamanino aaya, kwakali kuzyooba “inkamu impati” yabantu kuzwa kumasi oonse ibatakali kooyoofwa pe, pele ibakali kuyoobaa bulangizi bwakupona kukabe kutamani anyika. Sena muli akati kabo?
Ikuzyiba Nkamu Mpati
2. Ino ncinzi cakasololela kukuteelelesya kujatikizya kuzyibwa kwankamu mpati yaambidwe kubbuku lya Ciyubunuzyo 7:9?
2 Mu 1923, ibabelesi ba Jehova bakazikuzyiba kuti “imbelele” zyamucaano ca Jesu cilembedwe kubbuku lya Matayo 25:31-46 alimwi a “mbelele zimwi” izyaambwa kubbuku lya Johane 10:16 kuti mbantu ibayoobaa coolwe cakupona kukabe kutamani anyika. Mumwaka wa 1931, aabo bantu baambidwe mubbuku lya Ezekieli 9:1-11 kuti bali mukulembwa citondezyo ankumo zyabo abalo bakabonwa kuti mbabaabo bajisi bulangizi bwabuumi anyika. Mpoonya mu 1935 kwakazoozyibwa kuti inkamu impati ncibeela caciinga cambelele zimwi Jesu nzyaakali kwaamba. Sunu, eeyi inkamu impati iiyandika ibalilwa kutuulunzuma twabantu.
3. Ino nkaambo nzi ikaambo kakuti “baliimvwi kunembo lyacuuno cabwami” ncokataambi ciinga cabaabo baya kujulu?
3 Kubbuku lya Ciyubunuzyo 7:9, inkamu mpati taitondezyedwe kuti iili kujulu pe. ‘Ikwiima kunembo lyacuuno cabwami’ ca Leza takwaambi kuti beelede kuba kujulu buya pe. Caamba buyo kuti balalibonya kuli Leza. (Intembauzyo 11:4) Ikasimpe kakuti inkamu impati “yabantu batabaliki kumuntu naba omwe” tacili ciinga cakujulu pe, kalalibonya kwiinda mukweelanya mweelwe wanjiyo uutazibidwe kabotu aceeco cilembedwe kubbuku lya Ciyubunuzyo 7:4-8 alimwi a Ciyubunuzyo 14:1-4. Ooko imweelwe wabaabo babwezyegwa kuzwaa nyika kuya kujulu ulitondezyedwe kuti ngu 144,000.
4. (a) Ino “mapenzi ayo mapati” ibankamu mpati ngobayoofwutuka ninzi? (b) Kweelenaa makani aalembedwe kubbuku lya Ciyubunuzyo 7:11, 12, ino mbaani balangilila inkamu mpati alimwi ibabasangana mukukomba?
4 Ikwaamba inkamu mpati, ibbuku lya Ciyubunuzyo 7:14 lyaamba kuti: “Mbaaba bakazwa kumapenzi ayo mapati.” Bayoofwutuka mapenzi mapati aatanabwenwe mubukkale bwabantu. (Matayo 24:21) Baakutondezya kulumba kwabo kuli Leza alimwi a Kristo akaambo kalufwutuko lwabo, izilenge zyoonse zisyomeka kujulu ziyoobasangana mukwaamba kuti: “Ameni! Zilongezyo abulemu abusongo amilumbo alulemeko anguzu abukozu azibe kuli-Leza wesu lyoonse alyoonse. Ameni!”—Ciyubunuzyo 7:11, 12.
Icitondezya Kuti Baleelelwa Kufwutulwa
5. Ino mbuti mbotunga twazyiba ziyandika ikutegwa tube cibeela cankamu mpati?
5 Ikufwutulwa kwankamu mpati mumapenzi mapati kulacitwa kweelanaa zyeelelo zya Jehova ziluleme. Ibube buzyibya baabo ibayoofwutulwa bulipanduludwe kabotu mu Bbaibbele. Aboobo, cilakonzyeka kulibaabo bayanda bululami kubweza ntaamu lino kutegwa basinizye kuti baleelelwa kuyoofwutuka. Ino ncinzi aabo ncobeelede kucita?
6. Ino nkaambo nzi ncoceelela kukozyanisya ibankamu mpati kumbelele?
6 Imbelele mbanyama batete moyo alimwi ibalibombya. Aboobo ciindi Jesu naakaamba kuti wakalijisi mbelele zimwi izyatakali zyaciinga cabaabo baya kujulu, wakali kwaamba bantu ibakali kuyoopona kukabe kutamani anyika alimwi ibakali kunooyoolibombya kunjiisyo zyakwe. Wakaamba kuti: “Imbelele zyangu zilamvwa ijwi lyangu, ndilizizi, zilandicilila.” (Johane 10:16, 27) Aaba mbantu bamuswiilila ncobeni Jesu alimwi akumumvwida ibacita zyeezyo nzyaamba, eeco calo cibapa kuba basikwiiya bakwe.
7. Ino mbube nzi basikutobela Jesu mbobeelede kuba ambubo?
7 Ino mbube nzi bumbi umwi aumwi wabasikutobela Jesu aaba mbwayelede kuba aambubo? Ijwi lya Leza liingula kuti: “Muleelede kuleka ziyanza zyanu zyaciindi abuntu bwanu bukulukulu . . . akulisamika buntu bupya bulengulwidwe mucinkonzya ca-Leza cabululami acabusalali bwinibwini.” (Ba-Efeso 4:22-24) Balasoleka kubaa bube butola ambele lukamantano lwababelesi ba Leza nkokuti—“luyandano, lukondo, luumuno, busicamba, buuya, bubotu, lusyomo, lubombo, kulyeendele[zy]a.”—Ba-Galatiya 5:22, 23.
8. Ino ncinzi ciyoobacitikila ibankamu mpati mbobaya buzumanana kugwasyilizya basyeede?
8 Ibankamu mpati bagwasyilizya baabo ibasyoonto ibajisi bulangizi bwabuumi bwakujulu ibasololela mumulimo wabukambausi. (Matayo 24:14; 25:40) Ibambelele zimwi balagwasyilizya munzila eeyi, nokuba kuti balizyi kuti bayookazyigwa akaambo kakuti kumatalikilo aamazuba aakumamanino, Kristo Jesu abaangelo bakwe bakawisya Saatani abadaimona bakwe kuzwa kujulu. Eeci cakali kwaamba ‘mapenzi munyika . . . nkaambo Diabolosi wakaseluka abukali bupati, nkaambo ulizi kuti ciindi ncacijisi nciniini buyo.’ (Ciyubunuzyo 12:7-12) Aboobo, Saatani waciindilizya buya kukazya babelesi ba Leza mamanino abweende bwazintu oobu mbwaayabuswena.
9. Ino mbuti mbubazwidilila babelesi ba Leza mukukambauka makani mabotu, alimwi ino nkaambo nzi?
9 Tacikwe makani akupenzyegwa kuliko, imulimo wabukambausi wazumanana kuyaambele. Ikuzwa kuzyuulu zisyoonto buyo zyabakambausi ba Bwami kumamanino aa Nkondo Yanyika Yakusaanguna, lino babalilwa kutuulunzuma buya, nkaambo Jehova wakasyomezya kuti: “Taakwe cilwisyo niciba comwe cibumbwa kukulwisya nduwe cikonzya kujana coolwe.” (Isaya 54:17) Awalo umwi wamu nkuta mpati yaba Juda wakabona kuti mulimo wa Leza taukonzyi kuzundwa pe. Ikujatikizya basikwiiya, wakaambila ba Farisi bamumwaanda wamyaka wakusaanguna kuti: “[A]mubaleke, nkaambo kwiisya oku amulimo oyu anooli ngwabantu ulamwaika. Kwalo na nguwa-Leza, tamukookonzya kuumwaya, ambweni mulajanwa kuti mulwanya Leza.”—Incito 5:38, 39.
10. (a) Ino “citondezyo” cijisi bambelele zimwi caamba nzi? (b) Ino mbuti babelesi ba Leza mbobalitobela “ijwi . . . lizwa kujulu”?
10 Aabo ibankamu mpati batondezyegwa kuti bali mukubikkwa cizibyo calufwutuko. (Ezekieli 9:4-6) “Citondezyo” eeco ncisinizyo cakuti balilyaabide kuli Jehova, bakabbapatizigwa kabali basikwiiya ba Jesu alimwi balazumanana kusoleka kubaa bube mbuli bwa Kristo. Balalitobela “ijwi . . . lizwa kujulu” lyalo ikujatikizya bulelo bwa Saatani bwanyika yoonse bwabukombi bwakubeja ilyaamba kuti: “Kamuzwa mulinguwe nobantu bangu, kuti mutavwelanizigwi azibi zyakwe, mutapenzegwi azipenzyo zyakwe.”—Ciyubunuzyo 18:1-5.
11. Muunzila nzi iiyandika kapati ibankamu mpati mobatondezya kuti mbabelesi ba Jehova?
11 Alimwi Jesu wakaambila basikumutobela kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Johane 13:35) Mukwiimpana, ibantu bali muzikombelo zyamunyika iino balajayana munkondo, ikanjikanji akaambo kakwiindana kwazisi mobazwa! Ijwi lya Leza lyaamba kuti: “Bana ba-Leza abana ba-Saatani balazibwa boobu. Umwi aumwi uutaciti bululami tali wa-Leza, naba oyo uutayand[i] mweenzinyina. . . . Tuleelede kuyandana. Tutabi mbuli Kaini, iwakali wa-Mubi, wakajaya munyina.”—1 Johane 3:10-12.
12. Ino ncinzi Jehova ncayoocita ciindi camapenzi mapati ‘kumisamu’ yazikombelo iizyala micelo mibi?
12 Jesu wakaambilizya kuti: “Musamu umwi aumwi mubotu ulazyala micelo mibotu, alimwi musamu uusampukide ulazyala micelo mibi. Musamu mubotu tuukonzyi kuzyala micelo mibi, alimwi musamu uusampukide tuukonzyi kuzyala micelo mibotu. Musamu umwi aumwi uutazyali micelo mibotu ulatemwa akusowelwa mumulilo. Aboobo micelo yabo njiiti muzibye mbubabede.” (Matayo 7:17-20) Imicelo iijanika muzikombelo zili munyika itondezya kuti ‘mmisamu’ mibi, eeyo yalo ino-ino iiyoonyonyoonwaa Jehova ciindi camapenzi mapati.—Ciyubunuzyo 17:16.
13. Ino mbuti ibankamu mpati mbobatondezya calukamantano kuti ‘baliimvwi kunembo lyacuuno cabwami’ ca Jehova?
13 Ibbuku lya Ciyubunuzyo 7:9-15 lilaamba kujatikizya twaambo tutondezya iciyoopa kuti ibankamu mpati bakafwutulwe. Calukamantano, balitondezyedwe ‘kabaimvwi kunembo lyacuuno cabwami’ ca Jehova, kabasumpula bweendelezi bwakwe bwakujulu aansi. “Bakasanzya zikobela zyabo akuzitubya mubulowa bwa-Mwanambelele,” icitondezya kuti balaciteelelesya cituuzyo ca Jesu cakumanya zibi. (Johane 1:29) Bakalyaaba kuli Leza alimwi bakakutondezya kwiinda mukubbapatizigwa mumaanzi. Aboobo mbalongwe ba Leza, calo citondezyedwe azisani zituba alimwi balamukutaukila milimo “isikati amasiku.” Sena kuli nzila nzyomunga mwayanda kutobela mubukkale bwanu ikutegwa bweendelane kapati azintu zyaambwaawa?
Izilongezyo Ziliko Lino
14. Ino nzilongezyo nzi zimwi zilibedelede nzyobajisi noliba lino ibabelesi ba Jehova?
14 Cakutadooneka mwalibonena zilongezyo zilibedelede nzyobajisi noliba lino aabo ibabelekela Jehova. Mucikozyanyo, nomwakaiya kujatikizya makanze aa Jehova aaluleme, mwakabona kuti kuli bulangizi bukkazika moyo kujatikizya buumi buli kumbele. Aboobo lino buumi bwanu bulaampindu yini-yini, mbwakubelekela Leza mwini-mwini kamujisi bulangizi bukondelezya bwabuumi butamani muparadaiso anyika. Inzya, Mwami Jesu Kristo ‘uyoosololela ibankamu mpati kutusensa twamaanzi aabuumi.’—Ciyubunuzyo 7:17.
15. Mbuti Bakamboni ba Jehova mbobagwasyigwa kwiinda mukukakatila kuzyeelelo zya Bbaibbele mumakani aajatikizya mfwulumende alimwi amukulilemeka?
15 Icilongezyo ncobajisi ibankamu mpati nduyando alimwi alukamantano luliko akati kababelesi ba Jehova nyika yoonse mbwiizulwa. Mbwaanga toonse tupegwa cakulya cakumuuya ceelene, toonse tutobela milawo alimwi azyeelelo zyeelene izili mu Jwi lya Leza. Nkakaambo kaako ncotutaandanizyidwe azintu zyaambwa amfwulumende naa njiisyo zyazisi. Alimwi tulakakatila kuzyeelelo zisumpukide zyabukkale eezyo Leza nzyayanda kuti batobele babelesi bakwe. (1 Ba-Korinto 6:9-11) Aboobo, muciindi cakuti kabazwangana, kabatavwani alimwi akulilemeka munzila iidumide munyika, ibantu ba Jehova balijisi cikonzya kwaambwa kuti nguparadaiso wakumuuya. Amubone makani aaya mbwaapandulwidwe kubbuku lya Isaya 65:13, 14.
16. Ino mbulangizi nzi ibankamu mpati mbobajisi nokuba kuti kuli mapenzi aadumide mubuumi?
16 Peepe, ibabelesi ba Jehova bantunsi tabalondokede pe. Abalo balijatikizidwe mumapenzi aadumide munyika eeyi, mbuli kubaa buyumuyumu mubuumi naa kupenzyegwa akujayigwa kabanyina mulandu munkondo zyamasi. Alimwi abalo balaciswa, balapenga alimwi balafwa. Pele balijisi lusyomo lwakuti munyika mpya, Leza “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.”—Ciyubunuzyo 21:4.
17. Nikuba kuti kuli zintu zikonzya kutucitikila lino, mbuumi nzi bwakumbele ibutaliboteli mbobalangila aabo bakomba Leza wakasimpe?
17 Nokuba kuti mwafwa lino akaambo kakucembaala, kuciswa, ntenda naa kupenzyegwa, Jehova uyoomubusya kuti mubaa buumi mu Paradaiso. (Incito 24:15) Mpoonya muya kukkomana apobwe lyakumuuya mu Myaka Iili Cuulu ya Bulelo bwa Kristo. Iluyando ndomujisi kuli Leza luyooyuma mwanoolibonena makanzaakwe kaazuzikizyigwa munzila iikondelezya. Alimwi izilongezyo zyakumubili nzyayakupa Jehova kuciindi eeco ziyooyungizya luyando ndomujisi kulinguwe. (Isaya 25:6-9) Tabuliboteli kaka bulangizi bwabuumi bwakumbele mbobajisi bantu ba Leza!
Mubandi Wakwiinduluka
• Ncintu nzi cilibedelede Bbaibbele ncolyaamba ciyakubacitikila ibankamu mpati?
• Ikuti katuyanda ncobeni kubikkilizyigwa munkamu mpati eeyo iikkomaninwaa Leza, ncinzi ncotweelede kucita lino?
• Ino muziyanda buti zilongezyo ibankamu mpati nzyobajisi lino alimwi anzyobayooba anzizyo munyika mpya ya Leza?
[Cifwanikiso icili apeeji 123]
Calukamantano ituulunzuma twabankamu mpati bakomba Leza mwini-mwini