Cibalo 19
Amuzumanane Kwaamba Jwi lya Leza Cabusicamba
1. (a) Ino mmakani nzi mabotu basikwiiya ba Jesu ngobakaambilizya, pele ino ncinzi ncobakacita bamwi ba Juda? (b) Mmibuzyo nzi njotunga twabuzya?
IMYAKA iitandila ku 2,000 yainda, Mwanaa Leza, Jesu Kristo wakananikwa kuba Mwami iwakali kuzyoolela nyika yoonse kumbele. Kwiinda mukuyunga kwabasinkondonyina bazikombelo, Jesu wakajaigwa pele Jehova wakamubusya kuzwa kubafwu. Kwiinda muli Jesu, buumi butamani lino bwakali kukonzyeka. Pele, basikwiiya ba Jesu nobakaambilizya makani mabotu aaya caantangalala, ikupenzyegwa kwakatalika. Bamwi akati kabo bakaangwa akubikkwa muntolongo, alimwi mane akuumwa zimboko akulaililwa kuti baleke kukanana makani aajatikizya Jesu. (Incito 4:1-3, 17; 5:17, 18, 40) Ino ncinzi ncobakali kunga bacita? Nomwakali ndinywe, ino nomwakacita nzi? Sena nomwakazumanana kukambauka cabusicamba?
2. (a) Mmakani nzi aakondelezya aayelede kwaambilizyigwa muciindi cesu cino? (b) Ino mbaani bajisi mukuli wakukambauka makani mabotu?
2 Mu 1914 Mwami wa Bwami bwa Leza, Jesu Kristo wakabikkwa acuuno cabwami kuti ayendelezye ‘akati kabasinkondonyina.’ (Intembauzyo 110:2) Kuzwawaawo, Saatani amadaimonaakwe bakawaalilwa anyika. (Ciyubunuzyo 12:1-5, 7-12) Imazuba aakumamanino aabweende oobu bubyaabi akatalika. Caakumana ciindi eeci, Leza uyoonyonyoona bweende bwazintu boonse ibweendelezyegwaa Saatani. (Daniele 2:44; Matayo 24:21) Basikufwutuka banoojisi bulangizi bwakupona kukabe kutamani munyika iiyooba Paradaiso. Ikuti naa mwakaatambula makani mabotu aaya, inga mwayanda kwaambila bamwi. (Matayo 24:14) Pele ino mweelede kulangila nzi nomucita boobo?
3. (a) Ino bantu bautambula buti mulumbe wa Bwami? (b) Mmubuzyo nzi ngotweelede kulibuzya?
3 Nomukambauka makani mabotu aa Bwami, bamwi bantu balakonzya kwaazumina, pele ibunji bwabo tabakooyooabikkila maano pe. (Matayo 24:37-39) Bamwi balakonzya kumusampaula naa kumukazya. Jesu wakacenjezya kuti, kukazyigwa kulakonzya kakuzwa kubasazinyoko. (Luka 21:16-19) Alimwi mulakonzya kukazyigwa kumilimo nkomubelekela antela kucikolo. Alimwi mane amumasena aamwi aamunyika, mulimo wa Bakamboni ba Jehova ulilesyedwe amfwulumende. Ikuti naa mwajanika mubukkale buli boobo, sena muyoozumanana kukanana jwi lya Leza cabusicamba alimwi ‘akukakatila mulusyomo’?—1 Ba-Korinto 16:13.
Ikutalisyoma Tobeni
4. (a) Ino ncinzi ciyandika kapati kutegwa tusinizye kuti tuli babelesi ba Leza ibasyomeka? (b) Nkaambo nzi miswaangano ya Bunakristo ncoyiyandika kapati?
4 Iciyandika kapati kuti muntu abe mubelesi wa Jehova uusyomeka nkusyoma zintu zibotu nzyatwaabilide izitugwasya munzila yakumuuya. Cimwi cazeezi mmiswaangano yambungano. Imagwalo atukulwaizya kutaleka kwiibikkila maano. (Ba-Hebrayo 10:23-25) Aabo ibazumanana kabali Bakamboni ba Jehova basyomeka balasoleka canguzu kujanika lyoonse aamiswaangano antoomwe abasyominyina. Aamiswaangano eeyi iluzibo lwesu lwamu Magwalo lulayungizyigwa. Kuyungizya waawo, iluzibo lwesu mukasimpe lulayungizyigwa alimwi tulapakamana kujatikizya mbotunga twakabelesya. Tulakamantana abakwesu Banakristo mukukomba antoomwe alimwi tulayumizyigwa kucita ncayanda Leza. Imuuya wa Jehova ulasololela kwiinda mumbungano, alimwi kwiinda mumuuya ooyo Jesu mpali akati kesu.—Matayo 18:20; Ciyubunuzyo 3:6.
5. Ino ncinzi cicitwa kujatikizya miswaangano ciindi Bakamboni ba Jehova nobalesyedwe milimo yabo?
5 Sena mulajanika lyoonse kumiswaangano yoonse, alimwi sena mulazibelesya eezyo zibandikwa nzyomumvwa? Zimwi ziindi Bakamboni ba Jehova milimo yabo nobalesyedwe, cilayandika kucita miswaangano mutubunga tusyoonto-syoonto mumaanda aabakwesu. Imasena alimwi aziindi zilakonzya kucinca alimwi miswaangano ilakonzya kucitwa aciindi citeelede, imwi ilakonzya kucitwa akaandabwe kabusiku. Pele nokuba kuti zintu zilakonzya kucitwa mubukkale bukatazya kapati alimwi bubikka bantu muntenda, ibakwesu alimwi abacizi basyomeka balasolekesya kujanika kumuswaangano umwi aumwi.
6. Ino mbuti mbotutondezya lusyomo ndotujisi muli Jehova, alimwi mbuti eeci mbocikonzya kutugwasya kuzumanana kukanana cabusicamba?
6 Ikusyoma muli Jehova kulatondezyegwa kwiinda mukupaila kulinguwe lyoonse cakusinizya, katuyeeyede kuti tuyandika lugwasyo lwa Leza. Sena mulacita oobo? Jesu wakali kupaila lyoonse naakali kucita mulimo wakwe anyika. (Luka 3:21; 6:12, 13; 22:39-44) Alimwi imasiku kataninga bambulwa, wakakulwaizya basikwiiya bakwe kuti: “Amulangile akukomba, kuti mutanjili mumatepauzyo.” (Marko 14:38) Ikuti naa twajana bantu batabikkili maano kumulumbe wa Bwami, tulakonzya kusunkwa akutalika kuyozya-yozya mumulimo wesu. Ikuti naa bantu batusampaula naa kutupenzya, tulakonzya kusunkwa kwiinda mukulimvwa kuti cilainda kubota kucileka buyo kukambauka kutegwa tutabi mumapenzi. Pele ikuti naa twapaila cakusinizya kulomba muuya wa Leza kutegwa utugwasye kuzumanana kukanana cabusicamba, tuyookwabililwa kukutapiluka munsi akaambo kamasunko aayo.—Luka 11:13; Ba-Efeso 6:18-20.
Makani Aabantu Bakakambauka Cabusicamba
7. (a) Nkaambo nzi cibalo cili ku Incito ncociyandika kapati kulindiswe? (b) Amwiingule mibuzyo iili kumamanino amuncali wa 7, akukankaizya mbwaakonzya kutugwasya makani aaya.
7 Imakani aalembedwe kubbuku lya Incito alayandika kapati kulindiswe toonse. Aamba baapostolo alimwi abasikwiiya bakusaanguna bamwi—ibantu balya maila mbubonya mbuli ndiswe—mbuli mbobakazunda zisinkilizyo akutondezya cakusinizya kuti bakali bakamboni ba Jehova basicamba alimwi basyomeka. Nkooko lino atulange-lange cibeela cacibalo eeco kwiinda mukubelesya mibuzyo alimwi amagwalo aatondezyedwe. Notucita boobu, amujane nzila mbomunga mwagwasyigwa kumakani ngomuli mukubala.
Sena baapostolo bakali baalumi bayiide kapati? Sena bakali bantu bakazyalwa kabatayoowi ibatakwe makani azintu zyakali kunga zyabacitikila? (Johane 18:17, 25-27; 20:19; Incito 4:13)
Ncinzi cakamugwasya Petro kukanana cabusicamba kumbele lyankuta yaba Juda yalo yakasampaude Mwanaa Leza? (Matayo 10:19, 20; Incito 4:8)
Ncinzi baapostolo ncobakali kucita mvwiki zili mbozibede kabatanaletwa ku Nkuta Mpati yaba Juda? (Incito 1:14; 2:1, 42)
Ino Petro alimwi a Johane bakaingula buti eelyo beendelezi bacisi nobakalailila baapostolo kuleka kukambauka muzina lya Jesu? (Incito 4:19, 20)
Ibaapostolo nobakaangululwa, ino nguni ngobakali kulangila kuti uyoobagwasya alimwi? Ino ncinzi ncobakacita, sena bakapailila kuti baleke kupenzyegwa naa kuli cimbi ncobakapailila? (Incito 4:24-31)
Ino wakabelesya nzila nzi Jehova kupa lugwasyo ciindi basikukazya nobakasola kulesya mulimo wakukambauka? (Incito 5:17-20)
Ino mbuti baapostolo mbobakatondezya kuti bakakateelela kaambo kakapa kuti baangululwe? (Incito 5:21, 41, 42)
Noliba leelyo basikwiiya banji nobakamwaikizyanya akaambo kakupenzyegwa, ino ncinzi ncobakazumanana kucita? (Incito 8:3, 4; 11:19-21)
8. Ino mbubotu nzi bwakajanwa akaambo kamulimo wabasikwiiya bakusaanguna, alimwi mbuti swebo mbotujatikizyidwe mumulimo ooyo?
8 Imulimo wakukambauka makani mabotu tiiwakali wabuyo pe. Basikwiiya basika ku 3,000 bakabbapatizyigwa lya Pentekoste mu 33 C.E. ‘Basyomi bakaindilila kuyungizyigwa ku-Mwami, makamu-makamu aabaalumi abakaintu.’ (Incito 2:41; 4:4; 5:14) Mukuya kwaciindi, naba sikupenzya bantu ba Leza wakali kuyoowegwa kapati Saulo waku Tarso, wakaba Munakristo alimwi wakatalika kukambauka kasimpe cabusicamba. Kumbele wakazoozyibwa kuti mwaapostolo Paulo. (Ba-Galatiya 1:22-24) Imulimo wakatalika mumwanda wamyaka wakusaanguna tauna kumana pe. Wayaambele kapati mumazuba aaya aakumamanino alimwi wasika mumbazu zyoonse zyanyika. Tulijisi coolwe cakutola lubazu mumulimo ooyo alimwi mbotuzumanana kucita boobo, tulakonzya kwiiya kucitondezyo ncobakapa Bakamboni basyomeka bakabeleka swebo katutana.
9. (a) Ino ninzila nzi Paulo nzyaakabelesya kukambauka? (b) Ino ninzila nzi nzyomubelesya nywebo kumwaya mulumbe wa Bwami kuli bamwi?
9 Ino ncinzi Paulo ncaakacita naakaiya kasimpe ka Jesu Kristo? “Ndilyonya wakakambauka . . . kuti Jesu Mwana a-Leza.” (Incito 9:20) Wakalukkomanina kapati luzyalo lwa Leza ndwaakatondezyegwa alimwi wakabona kuti bantu boonse bakali kuyandika makani mabotu ngaakatambwide. Paulo wakali mu Juda, alimwi kweelanaa cilengwa cakaliko kuciindeeco, wakainka muzikombelo kuyookambauka. Alimwi wakakambauka kuŋanda aŋanda akubandika abantu mumisika. Kuyungizya waawo, wakalilisungwide kwiinka mumasena mapya kuyookambauka makani mabotu.—Incito 17:17; 20:20; Ba-Roma 15:23, 24.
10. (a) Ino mbuti Paulo mbwaakatondezya kuti nokuba kuti wakali sicamba, wakabelesya bupampu mukukambauka kwakwe? (b) Ino mbuti mbotunga twatondezya bube mbwaakajisi Paulo notukambaukila basazima, babelesima antela basicikoloma?
10 Tweelede kuba mbuli Paulo iwakali sicamba pele alimwi mupampu. Kuba Juda wakakanana munzila iikulwaizya kujatikizya zisyomezyo zya Leza kuli bamawisi. Kuba Giliki wakakanana aazintu nzyobakazi kale. Zimwi ziindi wakali kubelesya zintu zyakamucitikila naakali kwiiya kasimpe kuba nzila yakupa bukamboni. Wakaamba kuti: “Zyoonse nzincita, nkaambo ka-Makani Mabotu nkinzicitila, kuti nkabe mwaabilanwa abo mulingao.”—1 Ba-Korinto 9:20-23; Incito 22:3-21.
11. (a) Ncinzi Paulo ncaakacita kutegwa atazumanani kukazyanya abasikukazya? (b) Cabusongo ndiilili notunga twaiya citondezyo ca Paulo, alimwi muunzila nzi? (c) Ino nkuukuli nguzu nkozizwa zipa kuzumanana kwaamba cabusicamba?
11 Nokwakalibonya kuti kuleelede kuti Paulo akakambaukile kubusena bumbi kwaciindi cili mbocibede akaambo kakukazyigwa, wakalongela kubusena oobo muciindi cakuzumanana kukazyanya abasikukazya. (Incito 14:5-7; 18:5-7; Ba-Roma 12:18) Pele taakwe naakali kubaa nsoni pe akaambo kamakani mabotu. (Ba-Roma 1:16) Nokuba kuti Paulo wakayaanaa bantu basicimpangwe, balwani nokuba kukazyigwa kwalunya kuzwa kuli basikukazya, wakaba “akaanzambwene muli-Leza wesu” kuti azumanane kukambauka. Wakaamba kuti: “Mwami ngowakandiiminina akundipa inguzu, kuti mulindime oonse aakambaukwa akondele.” (1 Ba-Tesalonika 2:2; 2 Timoteo 4:17) Jesu, Silutwe wambungano ya Bunakristo wazumanana kutupa nguzu nzyotuyandika kutegwa tuucite mulimo ngwaakasinsima kuti uyoocitwa muciindi cesu.—Marko 13:10.
12. Ino ncinzi citondezya busicamba mbobajisi Banakristo, alimwi nkaambo nzi kapati kabakulwaizya kuba basicamba?
12 Tulijisi twaambo tubotu ncotweelede kuzumanana kwaamba jwi lya Leza cabusicamba, mbubwenya mbuli Jesu alimwi ababelesi ba Leza basyomeka mbubakacita mumwaanda wamyaka wakusaanguna. Eeci tacaambi kutalanganya bamwi naa kusola kusungilizya mulumbe kulibaabo batauyandi. Pele tatuleki akaambo kakuti bantu balaukaka mulumbe; alimwi taakwe notupiluka munsi akaambo kakukazyigwa. Mbubonya mbuli Jesu, tulanga ku Bwami bwa Leza kuti nemfwulumende yeelede kweendelezya nyika yoonse mboizulwa. Tulakanana calusyomo akaambo kakuti twiiminina Jehova, Mwami Wakujulu Aansi alimwi akaambo kakuti mulumbe ngotukambauka tauli wesu pele uzwa kulinguwe. Alimwi iluyando ndotujisi kuli Jehova lweelede kuba nkakaambo kapati katukulwaizya kumutembaula.—Ba-Filipi 1:27, 28; 1 Ba-Tesalonika 2:13.
Mubandi Wakwiinduluka
• Ino nkaambo nzi ncociyandika kukambauka mulumbe wa Bwami kubantu boonse kuti katukonzya, pele ino nkutambulwa kuli buti
nkotukonzya kulangila?
• Mbuti mbotunga twatondezya kuti tatulisyomi tobeni notubelekela Jehova?
• Ino nziiyo nzi zigwasya kapati nzyotwiiya mubbuku lya Incito?
[Zifwanikiso izili apeeji 173]
Mbubwenya mbuli kaindi, babelesi ba Jehova sunu bakanana jwi lya Leza cabusicamba