Cibalo 21

Sena Kuli Ncotweelede Kulisumpwida?

INO kulisumpula caamba nzi? Sena ulicizyi ncocaamba?— Nceeci cikozyanyo. Sena kuli nowakasolede kucita cintu cimwi ncotazyi kabotu mbocicitwa? Ambweni wakali kuuma bbola. Naa wakali kusotoka ntambo nomucita kkoowe. Sena kuli wakakuseka ciindi nowatakacita kabotu kati, “He! He! Hee! Mebo ndakwiinda”?— Imuntu ooyo wakali kulisumpula.

Ino ulimvwa buti bantu nobacita boobo? Sena ulakkomana?— Aboobo, ino uyeeya kuti bamwi balimvwa buti eelyo nolisumpula?— Sena cili kabotu ikwaambila umbi kuti, “Ndakwiinda kucita ceeci”?— Sena Jehova ulabayanda bantu bali boobo?—

Kuli bantu bamwi ibakali kuyeeya kuti bakali babotu kwiinda bamwi mbaakazyi Mwiiyi Mupati. Bakali kulisumpula naa kulitukumuna alimwi akusampaula bantu bambi boonse. Aboobo bumwi buzuba Jesu wakabaanina kaano kutegwa abatondezye mbocakali cibi kulisumpula. Nkooko atukaswiilile kaano aako.

Ikaano aako kajatikizya mu Farisi alimwi asimitelo. Iba Farisi bakali bamayi bamuzikombelo ibunji bwaziindi ibakali kulibona mbuli kuti bakaliluleme naa bakali kusalala kwiinda bantu bambi. Imu Farisi wamu kaano ka Jesu wakaunka kutempele lya Leza kuyoopaila ku Jerusalemu.

Jesu wakati awalo simitelo wakaunka kutempele ooko kuyoopaila. Ibunji bwabantu tiibakali kubayanda pe basimitelo. Bakali kulimvwa kuti basimitelo bakali kubabbida. Alimwi ncamasimpe kuti basimitelo banji tiibakali kusyomeka pe lyoonse.

Kutempele, imu Farisi wakatalika kupaila kuli Leza ategwa: ‘O Leza, ndakulumba kuti nsili mubi mbuli bantu bambi. Tandibacengi bantu pe alimwi tandiciti zintu zibyaabi. Nsili mbuli simitelo uulya. Ndili muntu uululeme. Ndilaliimya kulya ziindi zyobile mumvwiki kutegwa ndibe aaciindi cinji cakuyeeya nduwe. Alimwi ndilapa kutempele cibeela cakkumi cazintu zyoonse nzyendijana.’ Imu Farisi ncobeni wakayeeya kuti wakali mubotu kwiinda bamwi, tee kayi?— Alimwi wakamwaambila naba Leza kujatikizya bubotu bwakwe.

Pele simitelo tanaakali boobo pe. Kunyina naakali kukonzya nokuba buyo kulanga kujulu naakali kupaila. Wakaima kule-kule kakoteme. Simitelo wakabijilwa kapati akaambo kazibi zyakwe, alimwi wakalyuuma-uma acamba akaambo kakupengana kapati. Kunyina naakasola kwaambila Leza kuti wakali mubotu munzila imwi. Muciindi caboobo, wakapaila kuti: ‘O Leza, kondeengelela mebo ndesizibi.’

Nguni akati kabaalumi aaba bobile ngoyeeya kuti wakamukkomanisya Leza? Sena mmu Farisi ooyo wakalibona kuti wakali mubotu kapati? Naa ngu simitelo ooyo wakabijilwa akufwa nsoni akaambo kazibi zyakwe?—

Jesu wakaamba kuti simitelo nguwakakkomanisya Leza. Nkaambo nzi? Jesu wakapandulula kuti: ‘Nkaambo muntu woonse uutondezya kuti mmubotu kwiinda bamwi naa uulisumpula uyoofwiinsigwa. Pele ooyo uulifwiinsya uyoosumpulwa.’—Luka 18:9-14.

Ino nciiyo nzi ncaakali kuyiisya Jesu mukaano kakwe?— Wakali kuyiisya kuti tatweelede kuyeeya kuti tuli babotu kwiinda bamwi. Inga katutaambi buya kuti tuyeeya kuti tuli babotu kwiinda bamwi, pele kwiinda muzintu nzyotucita, tulakonzya kutondezya kuti oobo mbotuyeeya ncobeni. Sena kuli nowakacitide zintu munzila eeyo?— Kolanga cikozyanyo camwaapostolo Petro.

Eelyo Jesu naakaambila baapostolo bakwe kuti boonse bakali kuyoomusiya aakwaangwa, Petro wakalitukumuna ategwa: ‘Nikuba kuti boonse bakusiye, mebo nsikookusiya pe!’ Pele Petro wakalubizya. Wakaciindizya kulisyoma. Imasimpe ngakuti wakamusiya Jesu. Nokuba boobo, wakeempwa mbubwenya mbotuyooyiya mu Cibalo 30 cabbuku lino.—Matayo 26:31-33.

Atubelesye cikozyanyo camazubaano. Ambweni yebo amweenzinyoko ngomwiiya limwi kucikolo mwabuzyigwa mibuzyo kucikolo. Ino mbuti ikuti kobuzyi bwiinguzi alimwi kokonzya kwiingula mboobuzyilwa buyo pele mweenzinyoko katacikonzyi? Ee, unookkomene nkaambo ulibuzyi bwiinguzi. Pele sena inga caba camaanu kulyeezyanisya kuli ooyo uutafwambaani kwiingula?— Sena cili kabotu kusoleka kulitondezya kuti ulaamaanu kwiinda mukucita cimwi cintu cipa kuti alibonye kuti takwe maanu walo?—

Eeco ncaakacita mu Farisi. Wakalisumpula akulitukumuna katondezya kuti wakali mubotu kwiinda simitelo. Pele Mwiiyi Mupati wakaamba kuti mu Farisi wakali lubizizye. Mmasimpe kuti muntu umwi ulakonzya kucita cintu cimwi kabotu kwiinda mbwakonzya kucicita uumbi. Pele eeco tacaambi kuti muntu ooyo mmubotu ncobeni pe.

Aboobo ikuti katujisi luzibo lunji kwiinda muntu uumbi, sena aako nkaambo kabotu ncotweelede kulisumpwida?— Kociyeeyela eeci. Sena ndiswe twakapanga bongo mbotujisi?— Peepe, Leza nguwakatupa bongo toonse. Alimwi zintu zinji nzyotuzyi, twakaziiya buya kumuntu uumbi. Ambweni twakazibala buya mubbuku. Naa ambweni kuli muntu wakatwaambila nzizyo. Neliba leelyo notwakabuzyiba bwiinguzi naa notwakacikonzya kumana penzi limwi tobeni, ino twakacikonzya buti?— Inzya, twakacikonzya kwiinda mukubelesya bongo oobo mbwaakatupa Leza.

Eelyo muntu nasoleka canguzu, icintu cibotu ncoyelede kucita nkwaamba cimwi cikonzya kumukulwaizya. Mwaambile kuti ulacikkomanina ncaacita. Ambweni ulakonzya akumugwasya kuti ayaambele kucita kabotu. Eeco ncecintu ncoyanda kuti bantu bakucitile, tee kayi?—

Bantu bamwi balaanguzu kwiinda bamwi. Ino mbuti kuti koli anguzu kwiinda munyoko naa mucizyi wako? Sena aako nkaambo nkoyelede kulisumpwida?— Peepe. Nzilyo nzyotulya izitupa nguzu. Alimwi Leza nguupa mumuni, imvwula alimwi azyoonse zimbi ziyandika kutegwa zyakulya zikomene, tee kayi?— Aboobo tweelede kulumba Leza ikuti naa tulaanguzu.—Incito 14:16, 17.

Kunyina akati kesu uukkomana namvwa naa nabona muntu umwi kalisumpula, tee kayi?— Katwaayeeya majwi aa Jesu aakuti: ‘Kufwumbwa oobo mbomuyanda kuti bantu bamucitile, amubacitile mbubonya anywebo.’ Ikuti twacita oobo, tatukabi mbuli mu Farisi uulya wakalisumpula mukaano nkaakaana Mwiiyi Mupati.—Luka 6:31.

Cimwi ciindi muntu umwi wakaamba Jesu kuti mmubotu. Sena Mwiiyi Mupati wakazumina akwaamba kuti, ‘Inzya, ndili mubotu’?— Peepe, tanaakaamba oobo pe. Muciindi caboobo wakaamba kuti: “Taakwe muntu mubotu, pele Leza alike ngumubotu.” (Marko 10:18) Nokuba kuti Mwiiyi Mupati wakalilondokede, kunyina naakalitukumuna pe. Muciindi caboobo, wakapa bulemu boonse kuli Jehova, Bausyi.

Aboobo sena kuli muntu ngotukonzya kulisumpwida?— Inzya, nkwali. Tulakonzya kulisumpula kujatikizya Mulengi wesu, Jehova Leza. Eelyo notubona kubota kwazuba ciindi nolibbila naa cilenge cimwi cibotu kapati, tulakonzya kwaambila bamwi kuti, ‘Leza wesu mubotu, nguwakacilenga eeci!’ Katulibambilide lyoonse ikukanana kujatikizya zintu zipati nzyacitide kale Jehova alimwi azeezyo nzyayoocita kumbele.

Bala eeco ncaamba Magwalo kujatikizya kulisumpula naa kulitukumuna, alimwi wiiye mbotunga twakweeleba kulisumpula: Tusimpi 16:5, 18; Jeremiya 9:23, 24; 1 Ba-Korinto 4:7; alimwi a 13:4.

[Cifwanikiso icili apeeji 113]

Nkaambo nzi Leza ncaakakkomanina simitelo ikutali mu Farisi?

[Cifwanikiso icili apeeji 115]

Sena cikupa kuba muntu mubotu eelyo nojisi luzibo lwiinda aali loolo lujisi umbi?

[Cifwanikiso icili apeeji 115]

Nkaambo nzi ncocilubide ikulitukumuna ikuti naa katujisi nguzu kwiinda muntu umbi?

[Cifwanikiso icili apeeji 116]

Ino ncinzi musankwa ooyu ncalitukumunina?