Cibalo 22

Ncotuteelede Kubeja

KOYEZYEEZYA kuti musimbi umwi waambila banyina kuti: “Inzya, ndilaboola mbotutiizwide buyo kucikolo.” Pele amana taciti oobo pe, muciindi caboobo wazumanana kusobana abeenzinyina akuzikwaambila banyina kuti: “Baiyi bandikkazyika notwazwa cikolo.” Sena cili kabotu ikwaamba makani aali boobo?—

Naa ambweni musankwa waambila bausyi kuti: “Peepe, tiindali kusobanina bbola muŋanda.” Pele ino mbuti kuti naa nincobeni wali kusobanina muŋanda? Sena ncibi ikukazya kuti kunyina naasobanina muŋanda?—

Imwiiyi Mupati wakatutondezya cintu ciluzi ncotweelede kucita. Wakati: ‘Kwaamba kwanu akube ‘Iiyi’ naa ‘Peepe,’ nkaambo zyoonse ziyungizyigwa aawa zizwa kumubi.’ (Matayo 5:37) Ino ncinzi Jesu ncaakali kwaamba mukaambo aako?— Wakali kwaamba kuti tweelede kuzicita eezyo nzyotwaamba.

Kuli kaano kamwi mu Bbaibbele ikatondezya mbociyandika kapati ikwaamba zintu zyamasimpe. Kajatikizya bantu bobile ibakali kulyaamba kuti mbaasikwiiya ba Jesu. Atubone cakacitika.

Kakutanainda myezi yobile kuzwa ciindi Jesu naakafwa, ibantu banji kuzwa kumasena aakule bakaunka ku Jerusalemu kupobwe lyaba Juda lyakali kuyandika kapati litegwa Pentekoste. Imwaapostolo Petro wakakanana makani mabotu kapati oomo mwaakaambila bantu kujatikizya Jesu, ooyo Jehova ngwaakabusya kuzwa kubafwu. Kubantu banji bakaunkide ku Jerusalemu, eeci cakali ciindi cakusaanguna cakwiiya makani aajatikizya Jesu. Lino bakali kuyanda kwiiya makani aambi manji. Aboobo, ino ncinzi ncobakacita?

Bakakkala kwaciindi cilamfwu kwiinda mbobakeelede. Pele nokwakainda ciindi cili mbocibede, bamwi akabamanina mali eelyo bakali kuyandika lugwasyo kutegwa baule zyakulya. Basikwiiya ibakali mu Jerusalemu bakali lisungwide kubagwasya beenzu. Aboobo, ibanji akati kabo bakasambala zintu nzyobakajisi eelyo mali aakajanwa bakaapa baapostolo ba Jesu. Mpoonya baapostolo bakapa mali aayo kulibaabo bakali kuyandika lugwasyo.

Hananiya amukaintu wakwe Safira, ibamumbungano ya Bunakristo mu Jerusalemu bakasambala muunda wabo. Kunyina muntu wakabalomba kuti bausambale. Ibeni mbabakalisalila kucita boobo. Pele tiibakacita boobo akaambo kaluyando ndobakajisi kuli basikwiiya ba Jesu ibapya. Mubwini, ba Hananiya a Safira bakali kuyanda kuti bantu bayeeye kuti mbantu bali kabotu kakuli tiibakali boobo pe. Aboobo bakamvwana kuti baambe kuti bayoopa mali oonse ngibaya kujana kutegwa bagwasye bamwi. Pele muciindi cakupa mali oonse mbuli mbobakaamba, bakapa buyo cibeela camali aayo. Ino uciyeeyela buti eeco?—

Hananiya wakaunka kubaapostolo. Wakabapa mali aayo. Nokuba boobo, Leza wakalizyi kuti tanaakaapa mali oonse pe. Aboobo Leza wakazyibya mwaapostolo Petro kuti Hananiya wakali kubeja buyo.

Mpoonya Petro wakati: ‘Hananiya, nkaambo nzi ncowazumizya Saatani kuti akupe kucita ceeci? Imuunda wali wako. Tiiwali kuyandika kuusambala ikuti nowatali kuyanda. Alimwi neliba leelyo nowamana kuusambala muunda, cali kulinduwe kulisalila cakucita amali ngoojana. Pele ino nkaambo nzi ncotucenga kuti wapa mali oonse kakuli wapa buyo cibeela camali aayo? Akaambo kaceeci, uli mukubeja, tobejeli buyo ndiswe pe, pele wabejela Leza.’

Aaya mmakani mapati ncobeni. Hananiya wakabeja! Tanaakacita eezyo nzyaakali kwaamba kuti uyoozicita. Wakali kwiile kulicengeezya buyo kuti wakali kuzicita. Ibbaibbele lilatwaambila cakatobela. Lyaamba kuti: ‘Naakamvwa majwi aa Petro, Hananiya wakawida ansi, wakafwa.’ Leza wakamujaya Hananiya! Kuzwa waawo, imutumba wakwe wakagusyigwa anze amunzi akuyoozikkwa.

Nokwakainda mawoola aatandila kuli otatwe, Safira wakanjila. Kunyina naakazyi cakacitikilide mulumaakwe. Aboobo, Petro wakamubuzya kuti: ‘Sena nywebo nyobile mwakasambala muunda amweelwe wamali ngomwatupa?’

Safira wakaingula kuti: ‘Inzya, muunda woonse twakausambala aamweelwe wamali ngoonaayo.’ Pele ooko kwakali kubeja! Imali amwi ngobakajene bakalaasiside kutegwa baabelesye. Aboobo Leza wakamujaya awalo Safira.—Incito 5:1-11.

Ino ncinzi ncotweelede kwiiya kuli ceeco cakacitikila Hananiya alimwi a Safira?— Cituyiisya kuti Leza tabayandi bantu babeja. Lyoonse uyanda kuti katwaamba zintu zyakasimpe. Pele bantu banji baamba kuti cili buyo kabotu kubeja. Sena uyeeya kuti bantu aabo baliluzi?— Sena ulizyi kuti malwazi oonse, macise alufwu iziliko anyika zyakacitika akaambo kakubeja?—

Koyeeya kuti, Diabolosi wakacenga mwanakazi wakusaanguna Eva. Wakaambila Eva kuti, kunyina naakali kuyoofwa pe ikuti naakazangila Leza kwiinda mukulya mucelo Leza ngwaakaambide kuti tanaakeelede kuulya. Eva wakamusyoma Diabolosi eelyo wakaulya mucelo. Amane wakasungilizya Adamu kuti awalo alye. Lino bakabisya, alimwi bana babo boonse bakali kuzyoozyalwa bakali kunooli basizibi. Alimwi akaambo kakuti bana ba Adamu boonse bakali basizibi, boonse buyo bakapenga alimwi akufwa. Ino mapenzi aaya oonse akatalika buti?— Akatalika akaambo kakubeja.

Anu Jesu ncaakaamba kuti Diabolosi “mmubeji alimwi ngowisi wababeji boonse”! Nguwakali mubeji mutaanzi. Eelyo muntu uuli woonse nabeja, ucita eeco ncaakacita Diabolosi kukusaanguna. Tweelede kunoowayeeya makani aaya lyoonse notusunkwa kwaamba zyakubeja.—Joni 8:44, Ci.

Ino ndiilili nonga wasunkwa kuti ubeje?— Sena talili leelyo nowacita cintu cimwi citeelede?— Neliba leelyo notaciciti acaali, ulakonzya kupwaya cintu cimwi. Ikuti wabuzyigwa kujatikizya wacipwaya cintu eeco, sena weelede kutamikizya munyoko kuti nguwacipwaya? Naa sena weelede kulicengeezya kuti tozyi mbocapwayika?—

Ino mbuti kuti weelede kucita mulimo umwi wakucikolo kocili kuŋanda, pele tiiwaumanizya? Sena inga waamba kuti wakaucita woonse nokuba kuti teewakaumanizya?— Tweelede kuyeeya cakacitikila Hananiya alimwi a Safira. Kwiinda mukusisa twaambo tumwi, bakabeja. Alimwi Leza wakatondezya mbocakali cibi kucita boobo kwiinda mukubajaya.

Aboobo kunyina makani azintu nzyotukonzya kucita, ciyoopa kuti zintu zibijile limwi ikuti twatalika kubeja alimwi mane tatweelede kwaamba naaba makani ngitutazyi kabotu. Ibbaibbele lyaamba kuti: ‘Amwaambe zyakasimpe.’ Alimwi lyaamba kuti: “Mutaambilani cakubeja, pe.” Lyoonse Jehova waamba zyakasimpe, alimwi uyanda kuti aswebo katucita mbubwena.—Ba-Efeso 4:25; Ba-Kolose 3:9.

Tweelede kwaamba zyakasimpe lyoonse. Aaya ngemakani aambwa ku Kulonga 20:16; Tusimpi 6:16-19; 12:19; 14:5; 16:6; alimwi a Ba-Hebrayo 4:13.

[Cifwanikiso icili apeeji 117]

Ino ncibi nzi ncaacita musankwa ooyu?

[Cifwanikiso icili apeeji 118]

Ino nkubeja nzi Hananiya nkwali mukwaambila Petro?

[Cifwanikiso icili apeeji 119]

Ino ncinzi cakacitikila Hananiya akaambo kakuti wakabeja?

[Cifwanikiso icili apeeji 120]

Ino nguni Jesu ngwaakaamba kuti nguwakaamba bubeji bwakusaanguna, alimwi ino ncinzi cakacitika akaambo kabubeji oobo?

[Cifwanikiso icili apeeji 121]

Ino ndiilili nonga wasunkwa kuti ubeje?