Cibalo 32

Mbwaakakwabililwa Jesu

ZIMWI ziindi Jehova ulacita zintu zigambya ikukwabilila baabo bacili bana alimwi ibatakonzyi kulikwabilila beni. Ikuti naa weendeenda musyokwe, ulakonzya kubona inzila yomwe Jehova mbwacita boobo. Pele kumatalikilo tokonzyi kuciteelela kabotu cicitika.

Ulakonzya ikubona kayuni ikakkala ansi munsi lyako. Kalakonzya kakalibonya kuti kalicisa. Ambweni inga ibbaba limwi kalakonzya kakalikwela buya eelyo nokayaacitija wasoleka kuswena munsi lyako. Mboyaabukatobela kayuni aako, akalo inga kakayaabutija. Mpoonya, kayuni aako kalakonzya kubbulumuka akuuluka. Ibbaba lyako tiilyaliciside abuniini! Sena ulicizyi ncokali kucita kayuni?—

Munsi lyampokakkalila ansi kayuni aako, ibana bako baliyubide muzisaka-saka. Ikayuni aako kaliyoowede kuti wali kukonzya kubajana bana bako akubajaya. Aboobo, kalicengeezya kuti kaliliciside akukutola kulaale kuzwa ali twana. Sena ulimuzyi uukonzya kutukwabilila mbubwenya kayuni kajisi bana mbokakwabilila bana bako?— Mu Bbaibbele, Jehova ukozyanisyidwe kumuyuni uutegwa sikwaze, uugwasya bana bakwe.—Deuteronomo 32:11, 12.

Imwanaa Jehova uuyandwa kwiinda boonse ngu Jesu. Jesu naakali kujulu, wakali muntu wamuuya uulaanguzu mbubwenya mbuli Bausyi. Wakali kukonzya kulilanganya. Pele eelyo Jesu naakazyalwa kali muvwanda anyika, wakanyina lukwabililo. Wakali kuyandika kukwabilila.

Ikutegwa azuzikizye kuyanda kwa Leza anyika, Jesu wakeelede kukomena akuba muntu uulondokede, imwaalumi uusimide. Pele Saatani wakasoleka kumujaya Jesu eezyi kazitana kucitika. Ikusoleka kumujaya Jesu ikwakacitwa naakacili mwana alimwi anzila mbwaakamukwabilila Jehova nkaano ikakondelezya kapati. Sena ulayanda kukateelela?—

Kakwiindide ciindi cisyoonto buyo kuzwa naakazyalwa Jesu, Saatani wakapa kuti icili mbuli nyenyeezi cimweke mujulu nkolili Kujwe. Ibaalumi ibayiide mbozyeenda nyenyeezi bakaitobela nyenyeezi kwamusinzo mulamfwu kapati kugama ku Jerusalemu. Nobakasika ooko, bakabuzya ooko ooyo wakali kuzyooba mwami waba Juda nkwaakali kuyoozyalilwa. Eelyo baalumi ibakazyi ncolyaamba Bbaibbele kujatikizya makani aaya nobakabuzyigwa, bakaingula kuti: “Mu-Betelehemu.”—Matayo 2:1-6.

Imwami wamu Jerusalemu mubyaabi wazina lya Heroda naakamvwa makani aaya aakuti ooyu mwami mupya wazyalwa mumunzi uuli afwaafwi wa Betelehemu, wakalailila basikulingula nyenyeezi kuti: ‘Amukamuyandaule akumujana mwana ooyo, eelyo mwaakumujana, amukapiluke muzyoondaambile.’ Sena ulikazyi kaambo Heroda ncaakayanda kuzyiba ooko nkwanga wajanwa Jesu?— Nkaambo Heroda wakabaa munyono eelyo wakayanda kuti amujaye!

Ino mbuti Leza mbwaakamukwabilila Mwanaakwe?— Eelyo basikulingula nyenyeezi nobakamujana Jesu, bakamupa zipego. Mpoonya Leza wakabacenjezya muciloto basikulingula nyenyeezi ikuti batapilukili kuli Heroda pe. Aboobo bakapiluka kumaanda aabo anzila iimbi kakunyina kwiinda ku Jerusalemu. Eelyo Heroda naakazyiba kuti basikulingula nyenyeezi bakapiluka kwabo, wakanyema kapati. Mukusoleka kumujaya Jesu, Heroda wakajaya bana balombe boonse mu Betelehemu ibakajisi myaka iitasiki kuli yobile! Pele aciindi eeco, Jesu wakalizwide kale mu Betelehemu.

Sena ulizyi mbwaakaloboka Jesu?— Mbobakatalikizya buyo basikulingula nyenyeezi mulweendo lwakuya kwabo, Jehova wakacenjezya Josefa, imulumi wa Mariya kuti ayumuke akutijila ku Egepita. Ooko Jesu wakali kwabilidwe kuli Heroda mubyaabi. Nokwakayinda myaka iili mbwiibede, eelyo ba Mariya a Josefa nobakapiluka a Jesu kuzwa ku Egepita, Leza wakamucenjezya Josefa alimwi. Muciloto wakamwaambila kuti aunke ku Nazareta, ooko Jesu nkwaakali kuyookwabililwa.—Matayo 2:7-23.

Sena wazyiba Jehova mbwaakamukwabilila Mwanaakwe?— Aboobo, ino nguni ngonga waamba kuti uli mbuli bana bakayuni ibasisidwe abanyina muzisaka-saka naa uuli mbuli Jesu eelyo naakacili mwana muniini? Sena yebo toli mbuli Jesu alimwi abana bakayuni?— Ayebo nkobali bantu bayanda kukutundulula. Sena ulibazyi kuti mbaani?—

Ibbaibbele lyaamba kuti Saatani uli mbuli syuumbwa wabutambo uuyanda kutulya. Alimwi mbubwenya basyuumbwa kanjikanji mbobabikkila maanu kutunyama tusyoonto, awalo Saatani amadaimona aakwe bunji bwaziindi babikkila kapati maanu kubana. (1 Petro 5:8) Pele Jehova ulaanguzu kwiinda Saatani. Jehova ulakonzya kubakwabilila bana bakwe naa kugusya cintu cibyaabi cili coonse Saatani ncabacitila.

Sena uciyeeyede kuzwa ku Cibalo 10 cabbuku eeli eeco Diabolosi alimwi amadaimona aakwe ncobasoleka kutusungilizya kucita?— Inzya, batusungilizya kuti katoonana munzila eeyo Leza njaamba kuti tailuzi. Pele ino mbaani balikke ibeelede koonana?— Inzya, mbantu bobile bapati, nkokuti mwaalumi amwanakazi ibakwetene.

Nokuba boobo, cilausisya kuti bamwi bapati bayanda koonana abana. Nobacita boobo, ibalombe abasimbi balakonzya kutalika kucita zintu zibyaabi kapati eezyo nzyobaiya kubapati aabo. Abalo bana aaba batalika kubelesya zizyo zyabo zyabwaalumi azyabwanakazi munzila iiteelede. Eeco ncicakacitika ikaindi mumunzi wa Sodoma. Ooko, Ibbaibbele lyaamba kuti ibantu, “nibaba banike nibaba bapati,” bakali kuyanda koonana abaalumi ibakaswayide Loti.—Matalikilo 19:4, 5.

Aboobo, mbubwenya Jesu mbwaakali kuyandika lukwabililo, ayebo uyandika kukwabililwa kubapati—alimwi mane akubananyoko bambi—ibanga bayanda koonana anduwe. Bunji bwaziindi, bantu aaba balicengeezya kuba balongwe bako. Alimwi mane balakonzya kukupa cintu cimwi ikuti wasyomezya kuti tokaambili bantu bambi kujatikizya eezyo nzyobayanda kucita anduwe. Pele bantu aaba balaliyanda, mbubwenya mbuli Saatani alimwi amadaimona aakwe, alimwi bayanda buyo kulikkomanisya beni. Aboobo basoleka kulikkomanisya kwiinda mukoonana abana. Eeci ncibi kapati!

Sena ulicizyi ncobanga bacita ikutegwa balikkomanisye?— Balakonzya kujatauka zizyo zyako zyabwaalumi naa zyabwanakazi. Naa balakonzya kucumba-cumba zizyo zyabo zyabwaalumi naa zyabwanakazi kuzizyo zyako. Pele toyelede kulekela muntu uuli woonse kukusobanya naa kukujatauka kubwaalumi naa kubukaintu. Naba munyoko naa mucizyi, banyoko alimwi abauso toyelede kubazumizya pe kucita boobo. Izizyo eezyi tazyeelede kujataukwa amuntu uumbi.

Ino inga walikwabilila buti kubantu ibacita zintu zibyaabi mbuli bwazeezyi?— Cakusaanguna, utazumizyi muntu uuli woonse ikusobanya zizyo zyako zyabwaalumi naa zyabwanakazi. Ikuti muntu umwi wasoleka kucita boobo, weelede kwaamba cakusinizya alimwi ajwi lyaatala kuti: “Kondileka! Ndilakwaamba!” Alimwi ikuti muntu waamba kuti nduwe walubizya kuli ceeco cacitika, utamusyomi pe. Nkubeja. Koide kuzumanana kumwaamba, kunyina makani naa nguni! Weelede kumwaamba nokuba kuti waamba kuti eezyo nzyomucita antoomwe mmaseseke akati buyo kanduwe anguwe. Nokuba kuti muntu ooyo wasyomezya kuti uyookupa zipego zibotu naa kukukonga kukuuma naa cintu cimbi, weelede kumutija akuyoomwaamba.

Toyelede kuyoowa pe, pele weelede kucenjela kapati. Eelyo bazyali bako nobakucenjezya kujatikizya bantu bamwi naa masena imukonzya kukucitikila zintu eezyi, weelede kubaswiilila. Ikuti wabaswiilila, uyoopa kuti muntu mubyaabi atajani ciindi cakukutundulula.

Bala kujatikizya mbonga walikwabilila kumicito yakoonana iitaluzi ku Matalikilo 39:7-12; Tusimpi 4:14-16; 14:15, 16; 1 Ba-Korinto 6:18; alimwi a 2 Petro 2:14.

[Cifwanikiso icili apeeji 167]

Ino mbuti kayuni aaka ikajisi bana mbokali mukukwabilila bana bako?

[Cifwanikiso icili apeeji 168]

Nkucenjezya nzi Leza nkwaakabaambila basikulingula nyenyeezi ikwakapa kuti Jesu avwunwe nobakazwaa kumuswaya?

[Cifwanikiso icili apeeji 169]

Ino mbuti Jesu naakacili mwana-mwana mbwaakavwunwa alimwi?

[Cifwanikiso icili apeeji 171]

Ino ncinzi ncoyelede kwaamba akucita ikuti muntu umwi wasola kukujata munzila iiteelede?