Cibalo 37

Ikwiibaluka Jehova A Mwanaakwe

KOYEZYEEZYA kuti muntu umwi wakupa cipego cibotu kapati. Ino inga walimvwa buti?— Sena inga waile kwaamba kuti ndalumba mpoona akumuluba ooyo wakupa cipego eeco? Naa sena inga komuyeeya lyoonse alimwi aceeco ncaakakucitila?—

Jehova Leza wakatupa cipego cibotu kapati. Wakatuma Mwanaakwe ano anyika kuti azyootufwide. Sena ulikazyi kaambo Jesu ncaakeelede kutufwida?— Eeci ncintu ciyandika kapati ncotweelede kuteelela.

Mbubwenya mbotwakaiya mu Cibalo 23, Adamu wakabisya naakasotoka mulawo wa Leza uulondokede. Mpoonya swebo twakakona cibi kuzwa kuli Adamu, syaanene wesu toonse. Aboobo ino uyeeya kuti ncinzi ncotuyandika?— Munzila imwi, tuyandika syaanene uulondokede, wakazumanana kupona buumi bulondokede aano anyika. Ino uyeeya kuti nguni uunga waba syaanene wesu ooyo?— Jesu ulakonzya kuba nguwe.

Jehova wakatuma Jesu aano anyika ikutegwa abe mbuli syaanene kulindiswe muciindi ca Adamu. Ibbaibbele lyaamba kuti: “Muntu mutaanzi Adamu wakaba muntunsi muumi, Adamu musyaalizi wakaba muuya uupa buumi.” Ino Adamu mutaanzi wakali ni?— Mmuntu ooyo Leza ngwaakalenga kuzwa kubulongo. Ino Adamu wabili nguni?— Ngu Jesu. Ibbaibbele lilacitondezya eeci nolyaamba kuti: “Muntu mutaanzi [Adamu] wa[ka]zwa ansi, ngwabulongo, muntu wabili [Jesu] wa[ka]zwa kujulu.”—1 Ba-Korinto 15:45, 47; Matalikilo 2:7.

Mbwaanga Leza wakalonzya buumi bwa Jesu kuzwa kujulu akububikka mwida lya Mariya, Jesu kunyina naakakona cibi kuzwa kuli Adamu. Nkekaambo kaako Jesu ncaakali muntu uulondokede. (Luka 1:30-35) Alimwi nkekaambo mungelo ciindi Jesu naakazyalwa ncaakaambila beembeli kuti: “Sunu mwazyalilwa Mufutuli.” (Luka 2:11) Pele ikutegwa abe Mufwutuli wesu, ino ncinzi Jesu wakali muvwanda ncaakeelede kucita kutaanguna?— Wakeelede kukomena akuba mwaalumi, mbubwenya mbuli bwakali Adamu. Mpoona Jesu wakali kukonzya kuba ‘Adamu wabili.’

Jesu, Mmufwutuli wesu alimwi uyooba “Taateesu Uuteeli.” Oobo mbwaitwa mu Bbaibbele. (Isaya 9:6, 7) Inzya, Jesu uulondokede nguukonzya kuba syaanene muciindi ca Adamu, iwakaba muntu uutalondokede eelyo naakabisya. Munzila eeyo tulakonzya kulisalila kubaa ‘Adamu wabili’ kali syaaneneesu. Ee, Jesu Mmwanaa Jehova Leza.

Kwiinda mukwiiya makani aajatikizya Jesu, tulakonzya kumutambula kali Mufwutuli wesu. Sena uciyeeyede kuti tweelede kufwutulwa kunzyi?— Inzya, nkuu cibi alimwi alufwu nzyotwakakona kuli Adamu. Ibuumi bulondokede oobo mwaalumi Jesu mbwaakaaba kulindiswe bwaambwa kuti ncinunuzyo. Jehova wakapa cinunuzyo ikutegwa izibi zyesu zilekelelwe.—Matayo 20:28; Ba-Roma 5:8; 6:23.

Mmasimpe tatweelede kuzyiluba eezyo Leza alimwi a Mwanaakwe nzyobatucitila, tee kayi?— Jesu wakatondezya basikumutobela bakwe inzila iilibedelede iinga yatugwasya kunooyeeya nzyaakatucitila. Nkooko atwiibandike.

Koyezyeezya buyo kuti uli muŋanda yamujulu mu Jerusalemu. Nciindi camasiku. Jesu abaapostolo bakwe bali kutafwule. Aatafwule, kuli nyama yambelele iiyokedwe, zinkwa zipapalede alimwi awaini uusubila. Bali mukulya cilyo ciyandika kapati. Sena ulizyi kuti nkaambo nzi?—

Icakulya eeci ncakubayeezya eeco Jehova ncaakacita myaanda-myaanda yamyaka musyule, eelyo bantu bakwe, ibana Israyeli nobakali bazike mu Egepita. Kuciindi eeco, Jehova wakaambila bantu bakwe kuti: ‘Mukwasyi umwi aumwi aujaye kabelele, alimwi ibulowa bwako mubusansaile aamilyango yamaanda aanu.’ Mpoonya wakati: ‘Amunjile mumaanda aanu, mulye kabelele.’

Bana Israyeli bakacita oobo. Alimwi ibuzuba oobo mbubonya, imungelo wa Leza wakainda munyika ya Egepita yoonse. Mumaanda manji, imungelo wakajaya mwana wakusaanguna. Pele eelyo mungelo naakabona bulowa bwakabelele aamilyango, wakaindilila aaŋanda eeyo. Mumaanda aayo, kunyina mwana wakajayigwa pe. Farao, imwami waku Egepita wakayoowa kapati akaambo kaceeco mungelo wa Jehova ncaakacita. Aboobo Farao wakaambila bana Israyeli kuti: ‘Mwalubulwa mubuzike, kamuya kwenu. Amuzwe mu Egepita!’ Nobakamvwa boobo, bakabikka zibbudu zyabo aamankamela alimwi ambongolo akupola.

Jehova tanaakayanda kuti bantu bakwe balube mbuli mbwaakabaangulula mubuzike. Aboobo wakati: ‘Ciindi comwe amwaka muleelede kulya cilyo mbuli ceeci ncimwalya masiku aabuzuba bwasunu.’ Icilyo eeci ciyandika kapati bakaciita kuti ndipobwe Lyakwiindilila. Sena ulikazyi kaambo ncobakaliita boobo?— Nkaambo ibuzuba oobo mungelo wa Leza ‘wakaindilila’ maanda aakajisi mbaakani yabulowa.—Kulonga 12:1-13, 24-27, 31.

Jesu alimwi abaapostolo bakwe bali mukuyeeya makani aaya nobali mukulya cilyo capobwe Lyakwiindilila. Kuzwa waawo, Jesu wacita cintu cimwi ciyandika kapati. Pele katana kucicita, imwaapostolo uutasyomeki wazina lya Judase watandilwa anze. Mpoonya Jesu wabweza cinkwa cimwi cakasyeede, wacipailila, wacikomona alimwi akucipa basikwiiya bakwe. Wati: “Amubweze, mulye.” Mpoonya wabaambila kuti: ‘Icinkwa eeci ciiminina mubili wangu ngondiya kwaaba ndaakumufwida.’

Mpoonya Jesu wabweza kanywido kajisi waini uusubila. Naamana kulumba alimwi mumupailo, wakaabila kuli boonse akwaamba kuti: “Amunywide mulinkako nyoonse.” Alimwi wabaambila kuti: ‘Waini ooyu wiiminina bulowa bwangu. Lino-lino ndilatila bulowa bwangu kutegwa ndimwaangulule kuzibi zyanu. Kamucita oobu lyoonse kutegwa kamundiyeeya.’—Matayo 26:26-28; 1 Ba-Korinto 11:23-26.

Sena wamvwa kuti Jesu wakaamba kuti basikwiiya bakeelede kuzumanana kucita ceeci kutegwa kabamuyeeya?— Kunyina alimwi nobakacili kunoobaa pobwe Lyakwiindilila. Muciindi caboobo, ciindi comwe mumwaka, bakali kunoobaa cilyo eeci caalubazu ikuyeeya Jesu alimwi alufwu lwakwe. Icilyo eeci ciitwa kuti Mmulalilo wa Mwami. Sunu bunji bwaziindi tuciita kuti Nciibalusyo. Ino nkaambo nzi?— Nkaambo citwiibalusya eeco Jesu alimwi a Bausyi, Jehova Leza, nzyobakatucitila.

Icinkwa ceelede kutupa kuyeeya mubili wa Jesu. Wakalilisungwide kwaaba mubili wakwe ikutegwa tujane buumi butamani. Ino mbuti kujatikizya waini uusubila?— Weelede kutuyeezya impindu yabulowa bwa Jesu. Bulayandika kapati kwiinda bulowa bwakabelele kakajayigwa apobwe Lyakwiindilila mu Egepita. Sena ulikazyi kaambo ncokuli boobo?— Ibbaibbele lyaamba kuti nkaambo ibulowa bwa Jesu bulakonzya kutupa kulekelelwa zibi zyesu. Alimwi eelyo zibi zyesu zyoonse zyaakulekelwa, kunyina notucinoociswa, kucembaala alimwi akufwa. Eeci ncotweelede kuyeeya lyoonse notujanika ku Ciibalusyo.

Sena muntu woonse weelede kulya mukamu alimwi akunywa waini lya Ciibalusyo?— Jesu wakaambila baabo beelede kulya akunywa kuti: ‘Munoojisi lubazu mubwami bwangu alimwi muyookkala azyuuno zyabwami kujulu andime.’ (Luka 22:19, 20, 30) Eeci cakali kwaamba kuti bakali kuyoounka kujulu kuyooba bami antoomwe a Jesu. Aboobo balikke aabo bajisi bulangizi bwakuyooyendelezya antoomwe a Jesu kujulu mbabeelede kulya mukamu alimwi akunywa waini.

Pele nobaba baabo ibatalyi mukamu alimwi akunywa waini beelede kujanika ku Ciibalusyo. Sena ulikazyi kaambo ncobeelede kujanika?— Nkaambo Jesu wakaaba buumi bwakwe akulindiswe. Kwiinda mukujanika ku Ciibalusyo, tutondezya kuti tiitwaluba pe, pele tuciciyeeyede cipego ca Leza citaliboteli.

Imagwalo aatondezya mbociyandika cinunuzyo ca Jesu abikkilizya 1 Ba-Korinto 5:7; Ba-Efeso 1:7; 1 Timoteo 2:5, 6; alimwi a 1 Petro 1:18, 19.

[Zifwanikiso izili apeeji 193]

Ino mbuti Adamu alimwi a Jesu mbobakakozyenye, alimwi ino nkaambo nzi ncocakali kuyandika kapati kuti kabakozyenye?

[Cifwanikiso icili apeeji 194]

Ino mbuti bulowa bwakabelele mbobwakabakwabilila bana Israyeli?

[Cifwanikiso icili apeeji 194]

Ino ncinzi bulowa bwa Jesu, oobo mbwaakakozyanisya kuli waini ncobukonzya kutucitila?