Cibalo 40

Mbonga Wamukkomanisya Leza

INO ncinzi ncotunga twacita kutegwa tumukkomanisye Leza? Sena tweelede kumupa cintu cimwi?— Jehova waamba kuti: “Banyama boonse bamusokwe mbibangu.” Alimwi waamba kuti: “Insiliva njiyangu, ayalo ingolida njiyangu.” (Intembauzyo 24:1; 50:10; Hagai 2:8) Nokuba boobo, nkocili ncotukonzya kumupa Leza. Ino ncinzyi?—

Jehova ulatulekela kuti tulisalile kumubelekela naa pe. Tatusinikizyi kucita zintu nzyayanda kuti tucite. Atusole kuteelela kaambo Leza ncaakatulenga kuti katulisalila buya kumubelekela naa pe.

Ambweni ulizyi kuti kuli mincini iibambilidwe kuti kiicita milimo imwi bantu njobacita. Imincini eeyi ibambidwe kuti kiicita kufwumbwa eeco bakaipanga ncobayanda kuti icite. Imincini iili boobo kunyina noinga yalisalila cakucita pe. Naakayanda, toonse Jehova naakatupanga kuba mbuli mincini eeyo. Naakatupanga kuti katucita buyo zintu nzyayanda kuti tucite. Pele Leza tanaakacita boobo pe. Sena ulikazyi kaambo ncaatakacitila boobo?— Izyakusobanya zimwi zili buyo mbuli mincini njotwazwaa kwaamba. Ikuti watyanka aabusena bumwi, zicita buyo eeco sikuzipanga ncaakayanda kuti kazicita. Sena wakacibona kale cakusobanya cili boobo?— Bunji bwaziindi, ibantu balacimwa ikusobanya cintu cicita buyo cintu comwe ncocakabambilwa kuti kacicita. Leza tayandi kuti katumumvwida akaambo kakuti twakalengelwa kuti katumubelekela. Jehova uyanda kuti katumubelekela akaambo kakuti tulamuyanda alimwi nkaambo tulayanda kumumvwida.

Ino uyeeya kuti Taateesu wakujulu ulimvwa buti eelyo notumumvwida akaambo kakuliyandila kucita boobo?— Kondaambila, ino balimvwa buti bazyali bako kujatikizya mbolilemeka?— Ibbaibbele lyaamba kuti mwana musongo “ulakondezya wisi” pele mwana mufwubafwuba “ulaletela banyina insoni.” (Tusimpi 10:1) Sena wabona kuti banyoko abauso balakkomana eelyo nocita eeco ncobakutuma kuti ucite?— Pele ino balimvwa buti eelyo notabamvwidi?—

Lino atuyeeye Taateesu wakujulu, Jehova. Ulatwaambila ncotweelede kucita kutegwa tumukkomanisye. Bweza Bbaibbele lyako akujalula ku Tusimpi 27:11. Ooko Leza utwaambila kuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” Sena ulicizyi ncocaamba kusampaula muntu?— Muntu ulakonzya kukusampaula kwiinda mukukuweela naa kwaamba kuti tokonzyi kucita eeco ncowaamba kuti inga wacicita. Ino Saatani umusampaula buti Jehova?— Atubone mbwacita boobo.

Koyeeya, mu Cibalo 8 cabbuku eeli twakaiya kuti Saatani uyanda kuba Mutaanzi lyoonse alimwi uyanda kuti boonse kabamumvwida. Saatani waamba kuti bantu balamukomba Jehova akaambo kakuti Jehova uyoobapa buumi butamani ikuti bacita oobo. Eelyo Saatani naakayunga ba Adamu a Eva kuzangila Jehova, Saatani wakalwana Leza kwiinda mukumutamikizya boobo. Wakaambila Leza kuti: ‘Bantu balakubelekela nkaambo buyo kazintu nzyobapa. Kondipa buyo ciindi, ndilakonzya kuzandula muntu uuli woonse kuzwa kulinduwe.’

Mmasimpe kuti majwi aayo meni taako pe mu Bbaibbele. Pele eelyo notubala zyamwaalumi wazina lya Jobu, cilasalala kuti Saatani wakaambila Leza majwi aali boobo. Cakali kuyandika kapati, kuli Saatani alimwi akuli Jehova, kuzyiba naa Jobu wakali kusyomeka kuli Leza naa pe. Atujalule ma Bbaibbele eesu kuli Jobu caandaano 1 alimwi a 2 kutegwa tumvwe cakacitika.

Kobona kuti kuli Jobu caandaano 1 Saatani nkwali kujulu eelyo bangelo nobaboola kuzyoobona Jehova. Aboobo Jehova wakabuzya Saatani kuti: ‘Ino wazwidayi?’ Saatani wakaingula kuti wakali kweendeenda anyika. Aboobo Jehova wakamubuzya kuti: ‘Sena wamubona Jobu, kuti mmuntu uundibelekela alimwi kunyina cibi ncacita?’—Jobu 1:6-8.

Ndilyonya Saatani wakatalika kulilulamika. ‘Ulakukomba Jobu nkaambo kakuti unyina mapenzi. Ikuti waleka kumukwabilila akumulongezya, ulakusinganya kolimvwidide.’ Aboobo Jehova wakaingula kuti: ‘Mbubo Saatani, ulakonzya kucita kufwumbwa ncoyanda kulinguwe, pele utamujayi lwakwe Jobu.’—Jobu 1:9-12.

Ino ncinzi ncaakacita Saatani?— Wakacitya bantu kubba ŋombe zya Jobu ambongolo alimwi akujaya bakali kuzyeembela. Mpoonya kwakalaba ndabo, izyakaanda akujaya mbelele abakali kuzyeembela. Kumbele bantu bakaboola akubba nkamela akubajaya aabo bakali kuzyeembela. Kumamanino Saatani wakapa kuti kube guwo ilyakanyonyoona ŋanda mwakakkede bana ba Jobu ibali kkumi, alimwi boonse bakajayigwa. Jobu wakacili kubelekela Jehova nokuba kuti wakacitikilwa zintu eezi.—Jobu 1:13-22.

Eelyo Jehova naakamubona Saatani alimwi, Jehova wakamwaambila kuti Jobu wakacili kusyomeka. Saatani wakalilulamika alimwi, kaamba kuti: ‘Ikuti wandilekela kumucisa amubili wakwe, uyookusinganya kolimvwidide.’ Aboobo Jehova wakalekela Saatani kumucisa amubili Jobu pele wakamucenjezya buyo kuti atamujayi buya.

Ndilyonya Saatani wakamupa bulwazi Jobu cakuti mubili wakwe wakatalika kuzwa tulonda-londa. Tulonda ooto twakali kununka kapati cakuti kunyina muntu wakali kuyanda kuswena munsi lyakwe. Naba mukaintu wa Jobu wakamwaambila kuti: “Mutukile Leza kuti ufwe!” Aabo bakali kulicengeezya kuti mbalongwe ba Jobu bakaboola kuzyoomuswaya pele bakamupa kulimvwa bubi kapati kwiinda mukwaamba kuti kuli zintu zibyaabi kapati nzyaakacitide izyakapa kuti abe aamapenzi aayo. Nokuba kuti Saatani wakaletela Jobu mapenzi mapati amacise, Jobu wakazumanana kubelekela Jehova cakusyomeka.—Jobu 2:1-13; 7:5; 19:13-20.

Ino uyeeya kuti kusyomeka kwa Jobu kwakamupa kuti alimvwe buti Jehova?— Kwakamukkomanisya akaambo kakuti Jehova wakali kukonzya kwaambila Saatani kuti: ‘Kolanga Jobu! Ulandibelekela akaambo kakuliyandila kucita boobo.’ Sena unooli mbuli Jobu, imuntu ooyo Jehova ngwanga watondeka akwaamba kuti ncikozyanyo citondezya kuti Saatani mmubeji?— Masimpe, ncoolwe ikupa bwiinguzi kukulitaminina kwa Saatani kwakuti ulakonzya kuzandula muntu uuli woonse kukubelekela Jehova. Cakutadooneka Jesu wakacibona kuti ncoolwe kucita boobo.

Imwiiyi Mupati kunyina naakazumina kuti Saatani amupe kucita cintu cili coonse cibi. Koyeeya buyo mbocakabakkomanisya Bausyi cikozyanyo cakwe! Jehova wakali kukonzya kutondeka Jesu akwiingula Saatani kuti: ‘Kolanga Mwanaangu! Wazumanana kusyomeka kulindime cakulondoka akaambo kakuti ulandiyanda!’ Alimwi koyeeya zyalukkomano ndwajisi Jesu mukukondezya moyo wa Bausyi. Akaambo kalukkomano oolo, Jesu mane wakaliyumya mane wafwa aacisamu cakupenzezya.—Ba-Hebrayo 12:2.

Sena ulayanda kuba mbuli Mwiiyi wesu Mupati alimwi akukkomanisya Jehova?— Kozumanana kwiiya nzyayanda kuti ucite Jehova, alimwi komukkomanisya kwiinda mukuzicita!

Kobala eezyo Jesu nzyaakacita kutegwa akkomanisye Leza alimwi azyeezyo nzyotweelede kucita aswebo ku Tusimpi 23:22-25; Johane 5:30; 6:38; 8:28; alimwi a 2 Johane 4.

[Cifwanikiso icili apeeji 207]

Ino nkaambo nzi Leza ncaatakatulenga kuti tube buyo mbuli muncini ooyu?

[Cifwanikiso icili apeeji 208]

Ino mbuti mbonga wamukkomanisya Jehova alimwi abazyali bako?

[Cifwanikiso icili apeeji 209]

Ino mbuti Saatani mbwaakamulwana Jehova nobakazwaa kubisya ba Adamu a Eva?

[Cifwanikiso icili apeeji 210]

Ino nzinzyi Jobu nzyaakaliyumya, alimwi ino nkaambo nzi eeci ncocakamukkomanisya Leza?